Zərdab, 17 sentyabr, AZƏRTAC

Zərdab rayonunda pambıq yığımı sürətlə davam edir və qısa vaxtda 176 ton məhsul toplanıb.

Rayon Dövlət Aqrar İnkişaf Mərkəzindən AZƏRTAC-ın bölgə müxbirinə bildirilib ki, cari mövsümdə Zərdabda 2780 hektar sahədə pambıq yetişdirilib. Sahələrin 1700 hektarı “MKT İK” MMC-yə, 1080 hektarı isə “P-AQRO” MMC-yə məxsusdur. Hazırda bütün qüvvələr məhsulun tez və itkisiz yığılmasına səfərbər edilib. Hər gün sahələrə 250 nəfərdən çox işçi qüvvəsi çıxır. Əksər ərazilərdə, xüsusilə Bəyimli qəsəbə, Şahhüseynli, Qoşaoba kənd və bir sıra digər ərazi icra nümayəndəliklərində “ağ qızıl” toplanması daha sürətlə və mütəşəkkil təşkil olunub.

Qeyd edək ki, builki mövsümdə sahələrin 2300 hektarında məhsulun pambıqyığan maşınlarla yığılması nəzərdə tutulub. Bu məqsədlə “MKT İK” və “P-AQRO” MMC-lər tərəfindən 12 pambıqyığan maşın, 46 traktor və 74 qoşqu hazırlanıb. Artıq pambıqyığan maşınlar sahələrə çıxarılıb.