Bakı, 30 yanvar, AZƏRTAC

Yanvarın 30-da Milli Məclisin səhiyyə komitəsinin iclası keçirilib.

AZƏRTAC xəbər verir ki, iclas çərçivəsində “Qlobal çağırışlar və öhdəliklər: Azərbaycanda vərəmlə mübarizə” mövzusunda dinləmələr olub.

Komitənin sədri Əhliman Əmiraslanov tədbirin keçirilməsinə verdiyi dəstəyə görə Milli Məclisin rəhbərliyinə təşəkkürünü bildirib. O deyib ki, vərəm xəstəliyi müalicə olunmadıqda əlillik və ölümlə nəticələndiyi üçün bir sosial bəla kimi həm dövlətin, həm də bütövlükdə cəmiyyətin problemi hesab olunur. Dünya Səhiyyə Təşkilatının statistik məlumatına əsasən, dünyada il ərzində 9 milyondan artıq insan bu xəstəliyə tutulur və 1,8 milyon insan həmin xəstəlikdən vəfat edir. Bu səbəbdən vərəm problemi dünya səhiyyə sisteminin qlobal problemi olaraq cəmiyyətin sağlam inkişafına təhlükə yaradır. Müalicə olunmayan bir vərəm xəstəsi bir ildə 10-15 insanda bu xəstəliyin yaranmasına səbəb olur. Hesablamalara görə, 2015-ci ildə dünyada 10,4 milyon insan vərəm xəstəliyinə tutulub. Vərəm dünya üzrə 10 ən çox ölümə səbəb olan xəstəliklərin siyahısındadır. 2015-ci ildə dünyada 1 milyon uşaq vərəm xəstəliyinə yoluxub, 210 min uşaq vərəmdən dünyasını dəyişib. Vərəm dünyanın bütün bölgələrində yayılıb, lakin ölüm hallarının çoxu Asiyanın və Afrikanın payına düşür. Dünyada 2000-2015-ci illər ərzində 49 milyon insan vərəmdən müalicə alıb və onların həyatı xilas edilib. Lakin aşkarlanma və müalicə sahəsində hələ də xeyli problemlər mövcuddur. Azərbaycanda isə son beş ildə xəstəliyə yoluxmanın dinamikasında müsbət dəyişikliklər - azalma müşahidə olunur. Penitensiar sistemdə 1993-cü illə müqayisədə ölüm halları 105 dəfə azalıb. Son illərdə dünya üzrə vərəm epidemiyasının stabilləşməsi meyilləri müşahidə edilməkdədir. Lakin buna baxmayaraq, son illərdə vərəmin mövcud dərman preparatlarına davamlı olan yeni forması yayılmağa başlayıb. 93 ölkədə bu forma qeydə alınıb. Vərəmin bu forması daha çətin və uzunmüddətli müalicə tələb edir.

Dinləmələrdə məruzə ilə çıxış edən komitə üzvləri Sədaqət Vəliyeva və Məlahət İbrahimqızı Azərbaycanda vərəmlə mübarizə sahəsində görülən işlər, qəbul edilən sənədlər və qarşıda dayanan vəzifələr barədə məlumat veriblər. Bu xəstəliyin kökünün kəsilməsi üçün bölgələrdə maarifləndirmə işlərinin aparılmasının vacibliyi vurğulanıb.

İclasda çıxış edən Milli Məclisin əmək və sosial siyasət komitəsinin sədri Hadi Rəcəbli və ailə, qadın və uşaq məsələləri komitəsinin sədri Aqiyə Naxçıvanlı dinləmələri yüksək qiymətləndiriblər. Qeyd olunub ki, bu xəstəliyin qarşısının alınması onun nəticələrini aradan qaldırmaqdan asandır. Bunun üçün təkcə həkimlər yox, vətəndaşlar özləri də diqqətli olmalıdırlar. Təklif olunub ki, nikaha daxil olan vətəndaşlardan müayinəsi tələb olunan xəstəliklərin siyahısına vərəmin müayinəsi də əlavə edilsin.

Dinləmələrdə çıxış edən deputatlar Musa Quliyev, Qənirə Paşayeva, Rəşad Mahmudov, Kamilə Əliyeva, Səhiyyə Nazirliyinin, Ədliyyə Nazirliyinin nümayəndələri, tibb mütəxəssisləri vərəmlə mübarizə barədə fikirlərini bildirib, təkliflərini veriblər. Çıxışlarda Azərbaycanda vərəm xəstəliyi ilə bağlı qeydiyyatdan yayınmaya görə məsuliyyətin müəyyənləşdirilməsinin vacibliyi vurğulanıb. Qeyd olunub ki, həkimlər xəstələri rəsmi qeydiyyata saldırmadan müalicə etməməlidirlər.

Dinləmələrə yekun vuran səhiyyə komitəsinin sədri Əhliman Əmiraslanov aparılan müzakirələrin faydalı olduğunu qeyd edib. Bildirib ki, komitə bununla bağlı qanunvericiliyə dair veriləcək təklifləri müzakirə etməyə hazırdır.

Sonra iclasda “Sanitariya-epidemioloji salamatlıq haqqında” Qanuna təklif olunan dəyişikliklər müzakirəyə çıxarılıb. Məsələ barədə məlumat verən Milli Məclis Aparatının sosial qanunvericilik şöbəsinin müdir müavini Mehdi Qurbanov bildirib ki, təklif olunan dəyişikliklər Prezidentin “Azərbaycan Respublikasında qida təhlükəsizliyi sisteminin təkmilləşdirilməsi ilə bağlı əlavə tədbirlər haqqında” 2017-ci il 10 fevral tarixli Fərmanına əsasən hazırlanıb və müvafiq qanunvericiliyin daha da təkmilləşdirilməsinə xidmət edir.

Deputatlar “Sanitariya-epidemioloji salamatlıq haqqında” Qanuna təklif olunan dəyişiklikləri yüksək qiymətləndiriblər və layihəni Milli Məclisin plenar iclasında müzakirəyə tövsiyə ediblər.