Səudiyyə Ərəbistanının Şanxay Əməkdaşlıq Təşkilatında dialoq üzrə tərəfdaş statusu təsdiqlənib

Bakı, 29 mart, AZƏRTAC

Səudiyyə Ərəbistanının Kralı Salman bin Əbdüləziz Krallığa Şanxay Əməkdaşlıq Təşkilatında (ŞƏT) dialoq üzrə tərəfdaş statusu verən Anlaşma Memorandumunu təsdiqləyib.

Avrasiya regionunun siyasi, iqtisadi, beynəlxalq təhlükəsizlik və müdafiə təşkilatı olan Şanxay Əməkdaşlıq Təşkilatına Hindistan, Qazaxıstan, Qırğızıstan, Rusiya, Tacikistan, Pakistan və Özbəkistan daxildir. AZƏRTAC Saudi Press agentliyinə istinadla xəbər verir ki, müvafiq sənəd Ciddədəki Əl-Salam sarayında Kralın başçılığı ilə Səudiyyə Ərəbistanı Nazirlər Kabinetinin iclası zamanı imzalanıb. İclasda Kral Salman bin Əbdüləziz, həmçinin Krallıq və Çin arasında texniki və peşə təhsilinin başlanmasına dair sazişi təsdiq edib.

İclasda Səudiyyə Ərəbistanının lideri ötən cümə günü Türkiyənin Danimarkadakı səfirliyi qarşısında baş vermiş müqəddəs Qurani-Kərimin yandırılmasını pisləyib və dialoq, tolerantlıq və hörmət dəyərlərinin möhkəmləndirilməsinin vacibliyini vurğulayıb.