İDMAN
Azərbaycan boksçuları birinci Avropa Oyunlarında komandamızın 15-ci qızıl medalını qazanıblar
Bakı, 25 iyun, Samirə Allahverdiyeva, Abbasəli Yadigarov, AZƏRTAC
Birinci Avropa Oyunlarında Azərbaycana 15-ci qızıl medal sevincini iyunun 25-də boksçumuz Teymur Məmmədov yaşadıb.
AZƏRTAC xəbər verir ki, 81 kiloqram çəki dərəcəsində mübarizə aparan Azərbaycan boksçusu gərgin keçən final qarşılaşmasında italiyalı Valentino Manfredonianı 3:0 hesabı ilə məğlub edərək birinci Avropa Oyunlarının çempionu olub. Bu çəki dərəcəsində bürünc medallara rusiyalı Pavel Silyagin və ukraynalı Aleksandr Xijniak layiq görülüblər.
Günün birinci yarısında Azərbaycanın qadın boksçusu Anna Əlimərdanova (51-54 kq) yarımfinal mərhələsində rusiyalı Yelena Savelyevaya 0:3 hesabı ilə məğlub olaraq bürünc medalla kifayətlənməli olub. Bu çəki dərəcəsinin finalında rusiyalı Yelena Savaleva italiyalı Marzia Davide ilə qarşılaşacaq.
Qadınlar arasında ikinci yarımfinal görüşündə İtaliya idmançısı Valentina Alberti (60-64kq) polşalı Aneta Rigelskanı, Rusiya boksçusu Anastasiya Belyakova isə Böyük Britaniya təmsilçisi Sandi Rayanı mübarizədən kənarlaşdıraraq finala vəsiqə qazanıblar.
Kişilərin yarışında 52 kiloqram çəki dərəcəsində mübarizə aparan Elvin Məmişzadə yarımfinalda almaniyalı Hamza Tuba üzərində 3:0 hesabı ilə qələbə qazanaraq adını finala yazdıran ikinci Azərbaycan boksçusu olub. Avropa çempionatının mükafatçısı E.Məmişzadə finalda İtaliya boksçusu Vinçenzo Pikardi ilə döyüşəcək.
İkiqat Azərbaycan çempionu Kollazo Sotomayor (46 kq) yarımfinalda ukraynalı Viktor Petrovu mübarizədən kənarlaşdırıb – 3:0. Qızıl medal uğrunda döyüşdə onun rəqibi almaniyalı Kastriot Sopanı məğlub edən İtaliya boksçusu Vinçenzo Manyakapredir.
Doxsan bir kiloqramdan ağır çəki dərəcəsində yarımfinala vəsiqə qazanan Avropa və ikiqat dünya çempionu, Olimpiya Oyunlarının bürünc mükafatçısı Məhəmmədrəsul Məcidov əvvəlki görüşdə aldığı ağır zədə səbəbindən rinqə çıxmayıb. Onun rəqibi Rusiya idmançısı Qasan Qimbatov birbaşa finala vəsiqə qazanıb. Rusiyalı atletin finaldakı rəqibi Böyük Britaniya boksçusu Coy Coys olacaq.
Birinci Avropa Oyunlarının boks yarışlarının ilk çempionları axşam seansında müəyyənləşib.
Qadınların yarışında 48-51 və 69-75 kiloqram çəki dərəcələrində müvafiq olaraq Nikola Adams və Niderland idmançısı Nuşka Fontiyn çemponluq sevinci yaşayıblar.
Kişilərin mübarizəsində 46-49 və 56 kiloqramlarda Rusiya idmançıları çempion olublar. Bator Saqaluyev irlandiyalı Brendan İrvinə, Baxtovar Nazirov isə belaruslu Dmitri Asanauya qalib gəlib. Yarımfinalda B.Nazirova uduzan Azərbaycan boksçusu Tayfur Əliyev (56 kq) bürünc medalla kifayətlənib.
Beləliklə, boks yarışlarının onuncu günündə 5 çəki dərəcəsində qaliblər müəyyənləşib.