“ABADçı”lar Qubadakı “ABAD Factory” İstehsalat Kompleksində 5 sahə üzrə fəaliyyət göstərəcək VİDEO
Quba, 8 noyabr, Elxan Yusifli, AZƏRTAC
Noyabrın 8-də Qubadakı “ABAD Factory” İstehsalat Kompleksinə media nümayəndələri üçün press-tur təşkil olunub.
AZƏRTAC-ın bölgə müxbiri xəbər verir ki, ikimərtəbəli, ümumi sahəsi 1500 kvadratmetrə yaxın olan müasir istehsalat kompleksində “ABADçı”lar 5 istehsal sahəsi üzrə fəaliyyət göstərəcək. Bura quru meyvələr, kompot, qənnadı, süd və ət məhsulları daxildir.
“ABAD” publik hüquqi şəxsin direktoru Rüfət Elçiyev media nümayəndələrinin diqqətinə çatdırıb ki, ailə təsərrüfatlarına verilən dəstək proqramı uğurla davam etdirilir. Sahibkarların xammalının istehsalata ötürülməsi, milli məhsulların istehsalı və biznesin formalaşdırılması yönündə mühüm işlər görülür.
Bildirilib ki, Azərbaycan iqtisadiyyatının əsas sektorları üzrə strateji yol xəritələrinin mühüm istiqamətlərindən biri məhz kənd təsərrüfatı məhsullarının istehsalı və emalı, kiçik və orta sahibkarlıq səviyyəsində istehlak mallarının istehsalı, eyni zamanda, regionlarda özünüməşğulluq səviyyəsinin artırılmasıdır. Quba rayonunda “ABAD Factory” İstehsalat Kompleksinin təsis edilməsi də bu fəaliyyətə yönəlmiş növbəti addımdır. Kompleksin açılış mərasimi oktyabrın 11-də Prezident İlham Əliyev və birinci xanım Mehriban Əliyevanın iştirakı ilə keçirilib.
Media əməkdaşlarının diqqətinə çatdırılıb ki, Quba-Xaçmaz regionunun iqtisadiyyatının əsasını kənd təsərrüfatı təşkil edir. Bu sahə əsasən tərəvəz və meyvə istehsalı üzrə ixtisaslaşıb. Quba, həmçinin son zamanlar turizmin ən çox inkişaf etdiyi rayonlardandır.
Sahibkarlıq fəaliyyətinin səmərəli təşkili məqsədilə Quba “ABAD Factory” ərazisində müvafiq infrastruktur yaradılıb. Burada 10 “ABADçı” ailənin (30 nəfərə yaxın) fəaliyyət göstərməsi nəzərdə tutulub. Məhsul dövriyyəsi çoxaldıqca bu sayın 50 nəfərədək artırılması planlaşdırılır. Bundan əlavə, istehsal prosesində “ABADçı”ları xammalla təchiz edəcək yeni “ABADçı”ların layihəyə qoşulması da nəzərdə tutulur. Bu da ümumilikdə, regionda yaşayan 70-80 ailənin məşğulluq və əlavə gəlir əldə etməsinə şərait yaradacaq.
Kompleksdə “Pasha Holding”ın dəstəyi ilə “ABAD Gastro Village” layihəsi və onun nəzdində olan “Food truck”lər (təkərli qoşqular) parkı salınıb. “ABAD Gastro Village”in səyyar şəkildə fəaliyyət göstərməsi şimal regionlarında yaradılmış turizm infrastrukturunu daha cəlbedici edir. “Truck”lər 5 istiqamət üzrə satış aparır. Bura dönər, burger, pizza, şirniyyat və “ABAD” etno-butiki daxildir. Bu layihədə 20 nəfərin işlə təmin olunması nəzərdə tutulub.
Rüfət Elçiyev qeyd edib ki, ölkəmizdə turizm sahəsində müşahidə olunan inkişaf meyillərinin saxlanılması üçün daim yeni və cəlbedici ictimai iaşə xidmətlərinin təklif edilməsi zəruridir. Bu baxımdan təkərli qoşqular vasitəsilə icra edilmiş “ABAD Gastro Village” layihəsinin ölkəmizin müxtəlif bölgələrində, əsasən də şimal rayonlarında səyyar şəkildə fəaliyyət göstərmək imkanına malik olması və tərtibat baxımından cəlbediciliyi layihənin uğurlu olacağını deməyə əsas verir. “ABAD Gastro Village” kompleksinin səyyar yerdəyişmələr istisna olmaqla, daimi fəaliyyət nöqtəsi Quba “ABAD Factory”nin önündə təşkil edilmiş “Food truck park”ındadır.
“ABAD” publik hüquqi şəxs Prezident İlham Əliyevin 2016-cı ildə imzaladığı Fərmana əsasən yaradılıb. Əsas məqsədi ölkənin sosial-iqtisadi tərəqqisində vətəndaşların fəal iştirakını, kiçik və orta sahibkarlığın inkişafını, əhalinin məşğulluq səviyyəsinin artırılmasını təmin etmək olan “ABAD” rəqabətqabiliyyətli ailə təsərrüfatlarının formalaşdırılmasına dəstək verir, sosialyönümlü layihələrin həyata keçirilməsində birbaşa iştirak edir.
“ABAD” öz fəaliyyətini regional mərkəzlər vasitəsilə qurur. Masallı, Balakən, Quba, İmişli və Şəki rayonlarında artıq belə mərkəzlər fəaliyyətə başlayıb. Dekorativ-tətbiqi xalq sənətkarlığı və qida məhsullarının istehsalı sahəsində fəaliyyət göstərən ailə bizneslərinə dəstək verən layihə çərçivəsində “ABADçı” ailələr mürəbbə, cem, ət və süd məhsullarının istehsalı üçün xüsusi konteynerlərlə təmin olunub. İndiyə qədər dekorativ-tətbiqi sənətlə məşğul olan, 300-dən çox qida məhsulları istehsalı sahəsində çalışan 50-dək ailəyə dəstək göstərilib. Satışları təşkil etmək məqsədilə “ABAD” paytaxt Bakıda 9 etno-butik yaradıb.
Bundan başqa, “ABADçı”lar tərəfindən istehsal olunan 40-a yaxın brend altında olan qida məhsulları “Bravo” marketlər şəbəkəsində və “Bravo Koroğlu”da yaradılmış xüsusi “ABAD” Bakaleyada satışa çıxarılır.
Bölmənin digər xəbərləri
