DÜNYA


ABŞ FEDERAL MƏHKƏMƏSİ DARVİNƏ HAQQ QAZANDIRDI

AZƏRTAC xəbər verir ki, Britaniyanın “Teleqraf” qəzetinin yazdığına görə, ABŞ Federal Məhkəməsi məktəbdə kreasionist nəzəriyyəsinin (Darvin nəzəriyyəsinə dini baxımdan etiraz edilməsi) təkamül nəzəriyyəsi ilə birlikdə tədrisinin qanunsuz olduğunu təsdiqləmişdir. Darvinizmin müdafiəsi barədə tələblə məhkəməyə Pensilvaniya ştatından olan on bir şagirdin valideynləri müraciət etmişdilər. Onlar biologiyaya dair yeni məktəb proqramından narahat olduqlarını bildirmişdilər.

Məhkəmənin rəyinə görə, Darvinin baxışlarına alternativ olan baxışların məktəbdə tədrisi dini təhsili ümumicbari etmək cəhdindən başqa bir şey deyildir ki, bu da ABŞ Konstitusiyasına ziddir. Məhkəmənin qərarı hələlik ancaq Pensilvaniya ştatının məktəblərinə şamil edilir. Lakin ekspertlərin fikrincə, bu qərar həmin məsələ barədə ümummilli diskussiya aparılmasına gətirib çıxarmalıdır.

Kanzas ştatının təhsil komissiyası yeni təhsil standartını bəyəndikdən sonra insanın meydana gəlməsinə elmi və dini baxışların tərəfdarları arasında münaqişə kəskinləşmişdir. Standartda deyilirdi ki, problemin hər iki təfsiri məktəblilərə eyni cür izah edilməlidir, çünki Darvinin görüşü ancaq fərziyyədir.

Qərar qəbul olunmazdan əvvəl 38 Nobel mükafatı laureatı komissiyaya müraciət etmişdir. Onlar bildirmişlər ki, kreasionist nəzəriyyəsi elmə əsaslanmır, müasir elmin bütün nəticələri isə təkamülə sübutdur.

Xatırladaq ki, Darvinizmin tədrisi ilə bağlı problemin məhkəmə yolu ilə həll olunduğu ilk hadisə 1925-ci ilə aiddir. O vaxt “meymun işi” kimi məlum olan məhkəmə araşdırması alimlərin etirazına səbəb olmuş və tezliklə məhkəmənin qərarına qarşı şikayət verilmişdi.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.