REGİONLAR


“ARB Günəş”dən yeni sosial layihə - “Gözləri ilə danışan mələklər”

Xaçmaz, 16 noyabr, Elxan Yusifli, AZƏRTAC

Azərbaycanın ilk uşaq televiziya kanalı “ARB Günəş” “Gözləri ilə danışan mələklər” adlı yeni sosial layihəyə start verib.

AZƏRTAC-ın bölgə müxbiri xəbər verir ki, telekanal eşitmə və nitq qüsurlu uşaqların cəmiyyətə inteqrasiyası mövzusunu özündə əks etdirən sosial klipin çəkilişlərinə başlayıb.

Layihənin məqsədi bu qəbildən olan uşaqların cəmiyyətdə özünə layiqli yer tutmasına, sağlam ruhda böyüməsinə, təlim və tərbiyəsinə, eləcə də, onların təhsilinə diqqəti yönəltməkdir. Sosial əhəmiyyət daşıyan ekran işi xüsusi qayğıya ehtiyac duyan uşaqların gündəlik həyatda - ailə və cəmiyyət içində yaşadığı problemləri gündəmdə saxlamağa xidmət edir.

Klipin ssenarisi nitq və eşitmə qüsurlu uşaqların, eləcə də, onların mənsub olduğu ailə üzvlərinin aldığı psixoloji və mənəvi zərbələrin ağırlığından bəhs edir. Çəkilişlərin bir qismi Sağlamlıq İmkanları Məhdud Uşaqlar üçün 2 saylı Xüsusi internat məktəbində aparılır.

Xalq artisti Gülyanaq Məmmədovanın ifa etdiyi mahnının sözlərini övladı eşitmə və nitq qüsurlu olan valideyn Esmira Etibarqızı qələmə alıb. Mahnının musiqisi bəstəkar Yaqut Almazlıya, aranjimanı isə Faiq Kazımova məxsusdur.

Sosial mövzulu klipdə rolları Xalq artisti Gülyanaq Məmmədova, Əməkdar artist Mehriban Xanlarova, aktrisa Ülviyyə Rza, aktyor İlqar Musayev canlandırıb. Mehriban Xanlarova həm də klipdə səsləndirilən şeiri ifa edir. Əməkdar artist M.Xanlarovanın hər iki valideyni eşitmə və nitq qüsurlu olub. Uşaq rolunu mahnının sözlərinin müəllifi Esmira Etibarqızının real həyatda da eşitmə və nitq qüsurlu olan 6 yaşlı övladı Aytən Bağırova canlandırır. Aytən Bağırova Bakı şəhər Sağlamlıq İmkanları Məhdud Uşaqlar üçün 3 nömrəli Respublika xüsusi internat məktəbinin 1-ci sinif şagirdidir.

Layihədə jest dilindən istifadə olunması planlaşdırılır. Bu da məhz eşitmə və nitq qüsurlu tamaşaçıların ekran işini daha səmərəli şəkildə izləyə bilməsinə imkan yaradacaq.

Sosial layihənin rəhbəri və ssenari müəllifi Məhsim Məhsimov, baş prodüser Yaşar Əhmədov, quruluşçu rejissoru Vüsal Məmmədov, prodüseri isə Sadiq Şahbazovdur.

“ARB Günəş” televiziyası fiziki məhdudiyyətli uşaqların cəmiyyətə inteqrasiyası mövzusuna hər zaman xüsusi diqqət və həssaslıqla yanaşır. Telekanal mütəmadi olaraq, bu uşaqların həyatını əks etdirən videomateriallar, süjet və verilişlər hazırlayır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.