Hörmətli mərasim iştirakçıları!

Bu gün biz əlamətdar bir hadisə - Lerik rayonuna təbii qazın verilməsi ilə əlaqədar buraya toplaşmışıq. Cənab Prezident, mən “Azəriqaz” Səhmdar Cəmiyyətinin çoxminlik kollektivi adından böyük fərəh və iftixar hissi ilə Sizə məruzə edirəm ki, verdiyiniz tapşırıq - Lerik və Yardımlı rayonlarının qazlaşdırılması qısa müddətdə, bir il ərzində yerinə yetirilmişdir.

Cənab Prezident, Lerik rayonunun mərkəzinə çəkilmiş magistral qaz kəməri texnoloji baxımdan çox mürəkkəb bir layihə olmasına baxmayaraq, müəyyən etdiyiniz müddətdə başa çatdırılmışdır.

Xatırlatmaq istəyirəm ki, hələ 2000-ci ildə ulu öndərimiz Heydər Əliyevin imzaladığı müvafiq Fərmana uyğun olaraq, əvvəllər qaz təminatı dayandırılan şəhər və rayon mərkəzlərinə qazın verilməsinə başlanılmışdır. Qısa müddət ərzində 32 rayon mərkəzinin qaz təminatı bərpa edilmişdir. Cənab Prezident, ulu öndər Heydər Əliyevin siyasətinin davamı olaraq, Sizin apardığınız məqsədyönlü işlər nəticəsində 13 illik fasilədən sonra blokada şəraitində yaşayan Naxçıvan Muxtar Respublikasına 2005-ci ilin sonunda təbii qaz verilmişdir. Həmin il İmişli rayon mərkəzinin də qaz təminatı bərpa edilmişdir.

Möhtərəm cənab Prezident!

Bu işlərin davamı kimi, 2005-ci ilin sentyabr ayında verdiyiniz tapşırıq artıq yerinə yetirilmiş, ölkənin ucqar bölgələri sayılan Lerik və Yardımlı rayon mərkəzlərinə təbii qaz çatdırılmışdır. Astara-Qazıməmməd qaz kəmərinin 65 kilometrindən, Masallı rayonunun Tüklə kəndi yaxınlığından başlayaraq, təzyiqi 15 atmosfer olan 28 kilometr 325 millimetrlik, 15 kilometr 219 millimetrlik magistral qaz kəməri çəkilib istismara verilmişdir. Lerik rayon mərkəzində bir qazpaylayıcı stansiya inşa edilmiş və 40 kilometrdən artıq müxtəlif diametrli qaz xətləri çəkilmiş, 11 ədəd qaztənzimləyici quraşdırılmışdır.

Magistral xətlər dəniz səviyyəsindən 1200-1500 metr hündürlükdə, 36 yol, 6 çay keçidi, 12 kilometr uzunluğunda sıldırım qayalardan və 10 kilometr sıx meşələrdən ibarət ərazilərdən keçməklə çəkilmişdir. Lerik rayon mərkəzində qaz təminatına və ölçü qovşağına nəzarət məqsədilə normal iş şəraiti və kommunikasiyalarla təmin olunan operator binası, qaz istismarı idarəsi üçün inzibati bina tikilib istifadəyə verilmişdir.

Tikinti işləri yerli şirkətlər və “Azəriqaz” təmir-tikinti idarəsi tərəfindən həyata keçirilmişdir. Ümumilikdə layihənin icrası ilə bağlı cəmi 11 milyon 500 min manatlıq, o cümlədən büdcə vəsaiti hesabına 9 milyon 180 min manatlıq iş görülmüşdür. Lerik qaz istismar idarəsi üzrə 25 nəfər daimi işlə təmin olunmuşdur.

Möhtərəm cənab Prezident!

Sizin tapşırığınızla Lerik və Yardımlı rayon mərkəzlərində təbii qaz veriləcək bütün abonentlər “Azəriqaz” Səhmdar Cəmiyyətinin vəsaiti hesabına qaz pilətəsi və sayğacla təmin olunacaqdır. Hazırda Lerik rayon mərkəzində evlərdə mətbəx sobaları, sayğaclar quraşdırılır və ilin sonuna kimi başa çatdırılacaqdır.

Möhtərəm cənab Prezident!

“Azəriqaz” Səhmdar Cəmiyyətinin kollektivi adından Sizi əmin edirəm ki, respublikada əhalinin və iqtisadiyyatın təbii qazla fasiləsiz və təhlükəsiz təmin olunması üçün bütün imkanlardan istifadə edərək, verdiyiniz tapşırıqları vaxtında və layiqincə yerinə yetirəcəyik.