Ələşrəf Veysəl oğlu Məmmədov
Ələşrəf Məmmədov 1931-ci il noyabrın 1-də Qax rayonunun İlisu kəndində anadan olmuşdur. Orta məktəbi bitirdikdən sonra o, ali təhsilini 1948-1953-cü illərdə Azərbaycan Dövlət Universitetinin geoloji-coğrafiya fakültəsinin geologiya şöbəsində almışdır.
Ələşrəf Məmmədov universitet təhsilini başa vurduqdan sonra həyatını bütünlüklə Azərbaycan Milli Elmlər Akademiyası ilə bağlamışdır. O, burada Geologiya İnstitutunda kiçik elmi işçi kimi əmək fəaliyyətinə başlamış, 1953-1956-cı illərdə institutun aspiranturasında oxumuş, 1956-1958-ci illərdə Azərbaycan Elmlər Akademiyasının Neft Ekspedisiyasında işçi qrupuna rəhbərlik etmiş, 1958-1970-ci illərdə Geologiya İnstitutunun tektonika laboratoriyasında baş elmi işçi vəzifəsində çalışmışdır. Ələşrəf Məmmədov 1956-cı ildə namizədlik, 1970-ci ildə isə doktorluq dissertasiyası müdafiə etmişdir.
Ələşrəf Məmmədov 1971-ci ildən həyatının sonunadək - fasiləsiz olaraq 30 ildən artıq bir müddət ərzində Azərbaycan Elmlər Akademiyasının Coğrafiya İnstitutunda paleocoğrafiya şöbəsinin müdiri vəzifəsində çalışmışdır. O, 1989-cu ildə Elmlər Akademiyasının müxbir üzvü, 2001-ci ildə isə həqiqi üzvü seçilmişdir.
Ələşrəf Məmmədovun Kür çökəkliyinin regional geologiyası və tektonikası, stratiqrafiya, paleocoğrafiya, Azərbaycanın və Qafqazın geoloji inkişafının tarixi, neft-qazlılıq perspektivləri məsələlərinə həsr olunmuş fundamental tədqiqatları Qafqaz bölgəsinin geologiyasının öyrənilməsində mühüm rol oynamış, Azərbaycanın və bir çox xarici ölkələrin geologiya ictimaiyyəti tərəfindən yüksək qiymətləndirilmişdir. Alimin yaxından iştirakı ilə Azərbaycanın geoloji, tektoniki və geotektoniki xəritələri tərtib edilərək dərc olunmuşdur. Onun tərtib etdiyi xəritələr İngiltərədə nəşr olunmuş “Avrasiya şelflərinin mezo-kaynozoyda paleocoğrafiyası” atlasına daxil edilmişdir. Ələşrəf Məmmədov 200-dən çox elmi əsərin, o cümlədən 12 monoqrafiyanın müəllifidir. Onun rəhbərliyi altında bir çox elmlər namizədi və doktoru hazırlanmışdır.
Ələşrəf Məmmədov elmi yaradıcılıqla yanaşı, pedaqoji fəaliyyətlə də məşğul olmuşdur. O, 30 ildən çox Bakı Dövlət Universitetinin coğrafiya fakültəsinin professoru kimi səmərəli fəaliyyət göstərmişdir.
Milli geologiya elminin nüfuzlu nümayəndələrindən olan Ələşrəf Məmmədov bir çox beynəlxalq elmi konqres, simpozium və konfransların təşkilatçısı və iştirakçısı olmuş, xarici ölkələrdə, o cümlədən Amerika Birləşmiş Ştatlarında, Rusiyada, Fransada, İranda, Türkiyədə Azərbaycan elmini həmişə yüksək səviyyədə və ləyaqətlə təmsil etmişdir.
Ələşrəf Məmmədova xas olan məsuliyyət hissi, mənəvi saflıq, insanlara həssas münasibət həmişə ona mənsub olduğu kollektivdə dərin hörmət və rəğbət qazandırmışdır.
Görkəmli alim, gözəl ziyalı və xeyirxah insan Ələşrəf Məmmədovun xatirəsi onu tanıyanların qəlbində daim yaşayacaqdır.
Allah rəhmət eləsin!
Heydər Əliyev, Murtuz Ələsgərov,
İlham Əliyev, Ramiz Mehdiyev,
Artur Rasizadə, Elçin Əfəndiyev,
Hacıbala Abutalıbov, Fatma Abdullazadə,
Mahmud Kərimov, Cəlal Əliyev,
Şahlar Əsgərov, Nəriman Quliyev,
Arif Mehdiyev, Budaq Budaqov,
Akif Əlizadə, Toğrul Şahtaxtinski
Mərhumun cənazəsi vidalaşmaq üçün 2003-cü il avqustun 27-də saat 15-dən 17-dək Azərbaycan Milli Elmlər Akademiyasının Dairəvi salonunda qoyulacaqdır (Hüseyn Cavid prospekti, 31).