REGİONLAR
Əmlak Məsələləri Dövlət Komitəsinin sədri Göyçayda vətəndaşları qəbul edib VİDEO
Göyçay, 27 noyabr, Şahnəzər Bəşirov, AZƏRTAC
Prezident İlham Əliyevin tapşırığına əsasən, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin həllinə kömək göstərirlər.
AZƏRTAC xəbər verir ki, növbəti belə qəbul noyabrın 27-də Göyçay rayonunda keçirilib. Əmlak Məsələləri Dövlət Komitəsinin sədri Kərəm Həsənov Heydər Əliyev Mərkəzində keçirilən qəbulda Göyçay, Ucar, Kürdəmir, Zərdab və İsmayıllı rayonlarından olan vətəndaşların müraciətlərinə baxıb.
Vətəndaşların müraciətləri əsasən daşınmaz əmlakın qeydiyyatı, o cümlədən torpaq sahələrinin dövlət qeydiyyatı barədə olub. Bir çox vətəndaş onlara ayrılan torpaq sahələri, fərdi həyət evləri və mənzillər, kommersiya məqsədilə istifadə etdikləri qeyri-yaşayış sahələrinə dövlət qeydiyyatı sənədlərinin alınması ilə bağlı müraciət ediblər. Eyni zamanda, bəzi müraciətlər pay torpaqlarının, kənd təsərrüfatı təyinatlı torpaqların dövlət reyestrində qeydiyyatı ilə bağlı olub. Bir neçə vətəndaş isə dövlət əmlakının özəlləşdirilməsi və icarəsi ilə bağlı müraciət edib. Həmçinin vətəndaşlar işlə təmin olunma və digər məsələlərlə bağlı kömək göstərilməsi barədə xahişlərini də çatdırıblar.
Komitə sədri qəbulda səsləndirilən bir sıra müraciətlərin tez bir zamanda həlli üçün göstəriş verib. Vətəndaşlara onların müraciətləri ilə bağlı mövcud qanunvericiliyin tələbləri izah olunub. Araşdırılması zəruri olan müraciətlər isə qeydiyyata alınıb və nəticəsi barədə məlumat veriləcəyi bildirilib.
Qeydiyyatla bağlı “bir pəncərə” prinsipinə toxunan komitə sədri Kərəm Həsənov vətəndaşların diqqətinə çatdırıb ki, artıq həm torpaq, həm də daşınmaz əmlakın qeydiyyatı yalnız Daşınmaz Əmlakın Dövlət Reyestri Xidmətində aparılır. Bir ünvana müraciət uzun prosedurları aradan qaldırıb. Artıq vətəndaşlar sənədləşdirmə işi üçün uzun vaxt sərf etmirlər. Qeyd olunub ki, dövlətimizin başçısının daşınmaz əmlakın qeydiyyatı ilə bağlı verdiyi son Fərman da qeydiyyat sahəsində vətəndaş məmnunluğunun artmasına səbəb olmaqdadır. Belə ki, Fərmanla daşınmaz əmlakın və torpaqların qeydiyyatı üçün əsas hesab olunan zəruri mülkiyyət sənədlərinin siyahısı genişləndirilib. Fərmana əsasən, qeydiyyat üçün tələb olunan sənədlərin siyahısına sovet dövründə yaşayış və bağ evlərinin tikintisinə dair həyətyanı torpaq sahələrinin ayrılması barədə kolxoz və sovxozlar tərəfindən verilmiş əmrlər də aid edilib. Fərman qeydiyyat prosesinin daha geniş hüquqi dairəni əhatə etməsini təmin edib. Eyni zamanda, daşınmaz əmlakın qeydiyyatının sosial əhəmiyyətini bir daha artırıb.
Komitə sədri torpaqlardan təyinatı üzrə istifadə məsələlərinə də toxunub. Bildirilib ki, torpaq üzərində mülkiyyət, istifadə və ya icarə hüququnu pozma və dövlətin mülkiyyətində olan torpaqlara dair qanunsuz qərar vermə ilə əlaqədar cəzalar sərtləşdirilib.
Komitə tərəfindən torpaqların təyinatı ilə bağlı qanunvericiliyə riayət olunması istiqamətində tədbirlər də gücləndirilib. Bakı və regionlarda monitorinqlər həyata keçirilir. Məqsəd respublikada dövlət, bələdiyyə və özəl mülkiyyətə münasibətdə hüquqların və mənafelərin daha səmərəli təmin olunmasıdır.
Qəbul günü birbaşa müraciət edən vətəndaşlar da komitə sədri tərəfindən dinlənilib. Qəbulda 50-yə yaxın vətəndaş iştirak edib. Onların müraciətlərinə baxılıb və həlli istiqamətində zəruri tapşırıqlar verilib.
Vətəndaşlar göstərilən qeydiyyat xidmətlərindən razılıqlarını bildiriblər.