Gəncə, 15 sentyabr, Rauf Hacıyev, AZƏRTAC

Aqrar Universitetin “Mühəndislik” korpusu əsaslı şəkildə yenidənqurmadan sonra Bilik günündə tələbələrin ixtiyarına verilib.

AZƏRTAC xəbər verir ki, tədbirdə kənd təsərrüfatı naziri Heydər Əsədov, Aqrar Universitetin professor-müəllim heyəti, tələbələr, valideynlər və ictimaiyyət nümayəndələri iştirak ediblər.

Əvvəlcə Dövlət Himni səsləndirilib.

Tədbirdə çıxış edən Aqrar Universitetin rektoru, professor İbrahim Cəfərov qocaman təhsil ocağının şərəfli tarixindən, Azərbaycan elminə verdiyi töhfələrdən danışıb. Bildirilib ki, son illərdə Prezident İlham Əliyevin elmə, təhsilə, o cümlədən kənd təsərrüfatı sahəsinə göstərdiyi diqqət və qayğının nəticəsi olaraq Aqrar Universitet sürətli inkişaf yoluna qədəm qoyub. Hazırda Aqrar Universitet Azərbaycanın elm-təhsil müəssisələri arasında maddi-texniki bazasının, laboratoriyalarının zənginliyi, həmçinin professor-müəllim heyəti və kadr potensialı ilə fərqlənir. Son illərdə “Aqrolizinq” ASC tərəfindən çoxsaylı xarici kənd təsərrüfatı texnikasının, baytarlıq-sanitariya ekspertizası laboratoriyasının, 5 istixananın və digər avadanlıqların ali təhsil ocağına verilməsi burada prosesin keyfiyyətinin yüksəlməsinə zəmin yaradıb.

Diqqətə çatdırılıb ki, Gəncədə ən böyük tədris korpusu kimi tanınan "Mühəndislik" korpusu bilavasitə Kənd Təsərrüfatı Nazirliyinin təşəbbüsü və dəstəyi ilə əsaslı təmir edilib. Binada əsaslı abadlıq və yenidənqurma işləri aparılıb.

Müasir tələblər səviyyəsində yenidən qurulan tədris korpusunda mühəndislik, elektroenergetika və informasiya texnologiyaları üzrə 8 ixtisasda 874 tələbə təhsil alacaq.

İbrahim Cəfərov bildirib ki, universitet bu gün daha sürətlə inkişaf edir, tələbələr üçün yeni imkanlar yaradılır. Universitetdə yüksəkixtisaslı aqrar mütəxəssis hazırlığı məqsədilə dünya standartlarına cavab verən tədris bazası mövcuddur. Tələbələrin biliyinin qiymətləndirilməsi tam şəffaf və obyektiv şəkildə həyata keçirilir.

Qeyd olunub ki, bu il universitetin Azərbaycan, rus və ingilis dili bölmələrinin bakalavriat səviyyəsinə 29 ixtisas üzrə 1162, magistratura səviyyəsinə 30 ixtisas üzrə 158 tələbə qəbul olub, 2 tələbə 600-dən, 10 tələbə isə 500-dən yuxarı bal toplayıb. Universitetin Elmi Şurasının qərarına əsasən, 600 və 500-dən çox bal toplayan tələbələrin aylıq təqaüdlərinə əlavələr edilib.

Ümumilikdə, ötən illərlə müqayisədə bu il tələbə qəbulu planı da yüksək faizlə yerinə yetirilib. 1445 plan yerinə 1162 tələbə qəbul olunub ki, bu da qəbul planının 80,42 faiz yerinə yetirilməsi deməkdir. Qəbul planı 1000-dən artıq olan 9 universitet arasında dövlət sifarişi ilə qəbulun faizinə görə Aqrar Universitet ikinci pilləyə yüksəlib. 12 ixtisas üzrə yalnız dövlət sifarişi ilə 590 nəfər tələbə qəbul olunub ki, bu da 98,33 faiz deməkdir. Yalnız dövlət sifarişli ixtisaslarda müsabiqə balı 150 olduğu halda, minimum keçid balı aqranomluq ixtisasında 201, aqromühəndislik ixtisasında 214, torpaqşünaslıq və aqrokimya ixtisasında 237, yerquruluşu, torpaq və şəhər kadastrı ixtisasında 256 olub.

Magistratura səviyyəsində 30 ixtisas, 67 ixtisaslaşma üzrə isə 208 plan yerinə qarşı 158 tələbə qəbul olunub və bu da 76 faiz deməkdir. Dövlət sifarişi ilə 101 tələbə qəbul olunub. 38 ixtisaslaşma üzrə plan 100 faiz yerinə yetirilib.

Bu gün ADAU-da 4957 tələbə təhsil alır. Onlardan 4613 nəfər bakalavriat, 344 nəfər isə magitrantdır.

Yeni istifadəyə verilən korpusun açılışında çıxış edən kənd təsərrüfatı naziri Heydər Əsədov bildirib ki, Aqrar Universitetdə Prezident İlham Əliyevin göstərişi və Kənd Təsərrüfatı Nazirliyinin dəstəyi ilə artıq 3-cü ildir 12 ixtisas üzrə mütəxəssis hazırlığı yalnız dövlət sifarişi əsasında həyata keçirilir. Sevindirici haldır ki, bu il həmin ixtisaslar üzrə qəbul planı 98,33 faiz yerinə yetirilib. Eyni zamanda, nazir universitetin inkişafı üçün prespektiv məsələlərdən də danışıb.

Sonra nazir Heydər Əsədov yüksək bal toplayan tələbələrə qiymətli hədiyyələr təqdim edib, yeni istifadəyə verilən və eləcə də universitetin digər tədris korpusları ilə tanış olub, tapşırıq və tövsiyələrini bildirib.

Daha sonra nazir tələbə yataqxanasına gəlib, burada yaradılan şəraitlə maraqlanıb, yeməkxanaya baş çəkib, tələbələrlə söhbət edib.

Tələbələr onlar üçün yaradılan şəraitə görə Prezident İlham Əliyevə və nazirliyə minnətdarlıqlarını bildiriblər.

Kənd təsərrüfatı naziri universitetin elmi-tədqiqat institutlarında da olub, alimlərin elmi işləri ilə maraqlanıb.