İQTİSADİYYAT


Astarada sakinlərin təbii qazla bağlı problemi dinlənilib

Bakı, 24 may, AZƏRTAC

“Azəriqaz” İstehsalat Birliyinin növbəti “Açıq mikrofon” aksiyası Astara rayonunda reallaşıb.

AZƏRTAC xəbər verir ki, Birliyin Qazın balansı və hesabatı şöbəsinin rəis müavini Ceyhun Abdullayev, Lənkəran Regional Qaz İstismarı İdarəsinin rəisi Namiq Məmmədov və qurumun digər məsul şəxsləri aksiyaya üz tutan sakinlərin qaz təchizatı ilə bağlı müraciətlərini dinləyiblər. Daxil olan müraciətlər əsasən təbii qazla təmin edilməyən kəndlərin, bir sıra yaşayış məntəqələrinin qaz almayan genişlənən hissələrinin mavi yanacaqla təmin edilməsi ilə bağlı olub. Aksiyaya Siqanlı, Mardəsən, Ucakərən, Maşxan kəndlərindən, habelə Kijəbə qəsəbəsindən qatılan sakinlər təbii qaz olmaması səbəbindən üzləşdikləri çətinliklərdən söz açıblar. Bundan başqa, Astara Olimpiya İdman Kompleksinin direktoru Aslan Ağayev bu cür aksiyaların təşkilinə görə qurumun rəhbərliyinə təşəkkür edərək, kompleksdə istehlak olunan təbii qaza görə yaranan debitor borcun hissə-hissə ödənişinə şərait yaradılması ilə bağlı xahiş edib. Aksiyada sakinlərlə yanaşı, sahibkarlar da səyyar qəbul otağının imkanlarından yararlanıblar. Daxil olan bütün müraciətlərlə bağlı yerindəcə izahatlar verilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.