İQTİSADİYYAT
“Auto Azerbaijan” şirkətinin kollektivi Anım Günü ilə əlaqədar şəhidlərimizin xatirəsini yad edib
Bakı, 27 sentyabr, AZƏRTAC
“Hyundai” markasının Azərbaycandakı rəsmi distribüteri “Auto Azerbaijan” şirkətinin kollektivi 27 sentyabr - Vətən müharibəsində şəhid olanların xatirəsinə həsr edilmiş Anım Günü ilə əlaqədar şəhidlərimizi ziyarət edib və məzarları önünə gül və çiçəklər düzüblər.
Şirkətdən AZƏRTAC-a bildirilib ki, ziyarət zamanı vətənimizin ərazi bütövlüyü uğrunda canlarından keçmiş və xalqımızın qürur mənbəyinə çevrilmiş Vətən müharibəsi şəhidlərinin xatirəsi 1 dəqiqəlik sükutla yad edilib.
Həmçinin Vətən müharibəsində iştirak edən şirkət əməkdaşları ilə görüş zamanı çıxış edən şirkət rəhbərliyi bildirib: “Ali Baş Komandanımız İlham Əliyevin qətiyyətli addımı, siyasi iradəsi və Silahlı Qüvvələrimizin yüksək şücaəti və döyüş hazırlığı nəticəsində 30 ilə yaxın bir müddətdə davam edən Qarabağ problemi 44 günlük tarixi Qələbə ilə başa çatdı. Bundan sonra hər bir Azərbaycan vətəndaşının üzərinə böyük məsuliyyət düşür. Belə ki, dövlətimizin ərazi bütövlüyü uğrunda canından keçən bütün şəhidlərimizi, sağlamlığını itirmiş qazilərimizi, bütün şəhid və qazi ailələrini daim diqqət mərkəzində saxlamaq hər birimizin milli və mənəvi borcudur”.
Allah bütün şəhidlərimizə rəhmət eləsin!
Bu yaxınlarda 25 illiyini qeyd edən “Auto Azerbaijan” şirkəti “Hyundai” markasının Azərbaycandakı rəsmi distribüteridir. 1996-cı ildən bəri fəaliyyət göstərən şirkət “Hyundai” avtomobillərinin satışını, servis xidmətlərini və orijinal ehtiyat hissələrini təqdim edən yeganə rəsmi şirkətdir. Ölkəmizdə ilk avtomobil dilerlər şəbəkəsi olaraq fəaliyyətə başlayan “Hyundai Azərbaycan” hazırda 74 mindən çox müştəri portfelinə sahibdir. İstər paytaxtdakı, istərsə də, bölgələrdəki müştərilər üçün tam əlçatan olmağı hədəf götürən şirkət, “Hyundai” markasının ölkə üzrə 11 satış və servis mərkəzindən ibarət dilerlər şəbəkəsini formalaşdıraraq avtomobil sektorunda ən geniş xidmət şəbəkəsinə sahibdir.
Bununla belə “Auto Azerbaijan” şirkətinin fəaliyyəti təkcə bizneslə məhdudlaşmır. Mövcud olduğu cəmiyyətin bir hissəsi olmaqla onun gələcək inkişafı üçün məsuliyyət daşıdığını dərk edən şirkət yalnız öz müştərilərini və biznes maraqlarını düşünmür, ümumilikdə hər bir Azərbaycan vətəndaşının qarşılaşdığı problemlərin bir hissəsini aradan qaldırmaq üçün hər zaman səmərəli addımlar atır.
2010-cu ildən Azərbaycanda keçirilən, “Sən də varsan”, “Ailəsini qəzada itirmiş uşaqlara yardım”, “Yaşıl ofis”, “Zolağı pozma”, “Ağıllı Bala” yayımları ilə birlikdə hazırladığı uşaqlar üçün “Yol Hərəkəti Qaydaları” məlumat kitabçası və sair müxtəlif korporativ sosial məsuliyyət layihələrini özündə birləşdirən “Hyundai Azərbaycan”ın “Gələcəyimiz üçün əl-ələ” layihəsi şirkətin həyata keçirdiyi korporativ sosial məsuliyyət proqramının bir hissəsidir.