CƏMİYYƏT


Avropa İttifaqı və Ümumdünya Səhiyyə Təşkilatı COVID-19 əleyhinə vaksinasiyaya dəstək məqsədilə təşviqat kampaniyasına start verib

Bakı, 3 oktyabr, AZƏRTAC

Avropa İttifaqının (Aİ) maliyyələşdirdiyi və Ümumdünya Səhiyyə Təşkilatının (ÜST) həyata keçirdiyi COVID-19 əleyhinə Vaksinasiyaya Dəstək layihəsi yerli tərəfdaşlarla birgə ölkədə pandemiyanın növbəti dalğasının yaranmasının qarşısının alınması və risk qrupları arasında peyvənd olunmağı təbliğ etmək məqsədilə “Mən seçirəm” adlı təşviqat kampaniyasına start verib.

ÜST-nin Azərbaycandakı nümayəndəliyindən AZƏRTAC-a bildirilib ki, oktyabr-dekabr aylarını əhatə edəcək maarifləndirmə kampaniyası əsas etibarilə, COVID-19 virusunun ən çox təsir etdiyi yaşlılar və yanaşı xəstəliyi olan insanların ağır xəstələnmə riskini nəzərə alaraq peyvəndləməni bu qruplar arasında təbliğ etmək məqsədi daşıyır. Kampaniya həssas əhali qrupları ilə yanaşı ölkə ictimaiyyətinə yönəlmiş mesajları da ehtiva edir.

Kampaniyanın təşviqat materialları “ASAN xidmət” və yüksək sayda risk qrupları nümayəndələrinin müraciət etdiyi “DOST” mərkəzlərində, o cümlədən “Əczaçılar Klubu” İctimai Birliyinin vasitəsilə respublikanın müxtəlif bölgələrində apteklərdə nümayiş olunacaq. Əsasən yaşlılar və yanaşı xəstəliyi olan insanlara vaksinasiyaya çağırış məzmunlu posterlərlə yanaşı, “ASAN Radio” və digər radio kanallarda maarifləndirici sosial çarxların yayımlanması da planlaşdırılır.

Ölkədə pandemiya ilə əlaqədar məhdudiyyətlərin azaldığı bir vaxtda insanların COVID-19 virusu əleyhinə qoruyucu tədbirləri fərdi təşəbbüslər əsasında davam etdirməsi və peyvəndin ilkin və “buster” dozalarını vurdurması pandemiyanın kəskin fazasının 2022-ci ilin sonunadək yekunlaşması və risk qrupları arasında xəstəlikdən ağırlaşmanın və ölümlərin qarşısının alınmasına mühüm töhfə verəcək.

COVID-19 ilə effektiv mübarizə üçün peyvəndləməni təşviq edən kampaniya Avropa İttifaqı və Ümumdünya Səhiyyə Təşkilatının Azərbaycanda pandemiyaya qarşı dövlət qurumlarına texniki dəstək məqsədi daşıyan davamlı dəstəyinin tərkib hissəsidir. Aİ və ÜST-nin COVID-19 pandemiyası ilə mübarizəni dəstəkləmək və gündəlik immunlaşdırma proqramlarını gücləndirməklə ölkənin səhiyyə sisteminə dəstək olmağa davam edir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.