CƏMİYYƏT
Azərbaycan-İran münasibətlərinin inkişafında ölkələrimizin media qurumları önəmli rol oynayır
Bakı, 7 noyabr, AZƏRTAC
Azərbaycan Mətbuat Şurasının sədri, Milli Məclisin deputatı Əflatun Amaşov Tehranda İran mətbuatı və xəbər agentlikləri məhsullarının 22-ci beynəlxalq sərgisində iştirak edir.
Sərginin açılış mərasimində Prezident Həsən Ruhani çıxış edərək tədbirin əhəmiyyətindən və medianın cəmiyyət həyatındakı rolundan danışıb. O, medianın dünyada sülhün təmin olunmasındakı missiyasının vacibliyini vurğulayıb, sərgi iştirakçılarına uğurlar arzulayıb.
İran mətbuatı və xəbər agentlikləri məhsullarının 22-ci beynəlxalq sərgisində ölkənin ümumilikdə 900-dən çox qəzet, jurnal, informasiya agentliyi və jurnalist təşkilatının təqdim etdikləri materiallar hər media qurumu üçün ayrılmış guşədə nümayiş olunub. Sərginin məqsədi İran media orqanları arasında əlaqəni gücləndirmək, beynəlxalq media qurumları ilə qarşılıqlı əməkdaşlıq yaratmaqdır.
Səfər çərçivəsində Əflatun Amaşov İranın mədəniyyət və islam irşadı nazirinin müavini Hossein Entezami ilə görüşüb. Söhbət zamanı İran və Azərbaycan arasındakı qarşılıqlı münasibətlərin hazırkı durumundan məmnunluq ifadə olunub. Hər iki ölkənin media qurumlarının əməkdaşlığının bu baxımdan önəmli rol oynayacağı bildirilib. Ə.Amaşov Mətbuat Şurasının fəaliyyət istiqamətlərindən danışıb. O bildirib ki, Mətbuat Şurası həm ayrıca təşkilat kimi beynəlxalq media qurumları ilə birgə təşəbbüslər reallaşdırır, həm də bu və ya digər şəkildə Azərbaycan mediasının xarici media orqanları ilə qarşılıqlı əməkdaşlığının qurulmasına dəstək olur.
Mətbuat Şurası sədrinin Mədəniyyət və İslam İrşadı Nazirliyinin xarici media ilə iş departamentinin direktoru Məhəmməd Cəfər Safi ilə görüşündə son illərdə Azərbaycanın və İranın media qurumları arasındakı münasibətlərdə intensivliyin müşahidə olunduğu, jurnalistlərin qarşılıqlı səfərlərinin təşkil edildiyi diqqətə çatdırılıb. Ə.Amaşov rəhbərlik etdiyi qurumun İranın Azərbaycandakı səfirliyi ilə mövcud istiqamətdə yeni layihəyə start verdiyini söyləyib.
İRNA xəbər agentliyinin icraçı direktoru Məhəmməd Xodadi ilə görüşdə İran və Azərbaycan kütləvi informasiya vasitələri arasında əməkdaşlığın hazırkı durumu, perspektiv vəzifələr ətrafında fikir mübadiləsi aparılıb. Bildirilib ki, hər iki ölkənin jurnalistləri fəaliyyətlərində İran və Azərbaycan xalqlarının adət-ənənə yaxınlığına əsaslanan tarixi bağlılığı qorumağı hədəf seçməlidirlər. Bu baxımdan hazırkı vəziyyətdən məmnunluq ifadə olunub.
Səfər çərçivəsində daha bir görüş İran parlamenti sədrinin birinci müavini, parlamentin türk fraksiyasının rəhbəri Məsud Pezeşkianla keçirilib. Görüşdə Məsud Pezeşkian yeni yaradılmış və tərkibinə 100 deputatın daxil olduğu fraksiyanın perspektiv planlarından söz açıb. Azərbaycan və İran qanunverici orqanları arasındakı əlaqələrin hazırkı durumundan məmnunluq ifadə olunan görüşdə Ə.Amaşov Azərbaycan Xalq Cümhuriyyəti parlamentinin fəaliyyətini əks etdirən ikicildlik kitabı M.Pezeşkiana hədiyyə edib.