Bakı, 14 may, AZƏRTAC

Davamlı insan inkişafının tədrisinə dünyada 2005-ci ildə başlandığı halda Azərbaycanda bu proses ümummilli lider Heydər Əliyevin rəhbərliyi ilə 1998-ci ildən başlanıb. Bu, ölkənin təhsil siyasətində insan amilinin prioritet təşkil etməsindən xəbər verir. Eyni zamanda, Prezident İlham Əliyev “Təhsil Azərbaycanın davamlı inkişaf strategiyasının ən öncül istiqamətlərindən biridir” fikrini bəyan etməklə ölkəmizdə təhsilin prioritet inkişaf istiqamətini müəyyənləşdirib.

Bunu mayın 14-də Azərbaycan Universitetində keçirilən “Davamlı inkişaf və humanitar elmlərin aktual problemləri - 2018” mövzusunda beynəlxalq konfransın açılışında bu ali məktəbin rektoru Səadət Əliyeva söyləyib.

Universitetdən AZƏRTAC-a bildiriblər ki, S.Əliyeva 2018-ci ilin ölkəmiz üçün bir sıra tarixi hadisələrlə zəngin olduğunu deyib.

Qeyd edilib ki, bu il Prezident İlham Əliyev xalqın iradəsi ilə yenidən dövlət başçısı seçilib. Həmçinin Şərqdə ilk demokratik respublika olan Azərbaycan Xalq Cümhuriyyətinin 100 illiyi və ümummilli lider Heydər Əliyevin anadan olmasının 95-ci ildönümü ölkəmizdə dövlət səviyyəsində qeyd olunur.

Rektor deyib: “Ulu Öndərin anadan olmasının 95-ci ildönümünə həsr edilən bugünkü konfransa böyük maraq var. Konfransda dünyanın 10-dək ölkəsindən, həmçinin Türkiyə, Rusiya, Qazaxıstan və Ukraynadan olan alimlərin iştirakı davamlı inkişaf konsepsiyasına və bu konteksdə humanitar elmlərin aktual problemlərinə elmi marağın olmasından xəbər verir”.

Bildirilib ki, kifayət qədər elmi bazaya malik olan humanitar fənlərdən fərqli olaraq leksikonumuza son bir neçə ildə daxil olan davamlı inkişaf anlayışı müxtəlif elm sahələrinin qovşağında ən intensiv öyrənilən mövzulardan birinə çevrilib. Lakin hələ də tam olaraq öyrənilməmiş bu sahənin ciddi elmi əsaslarının yaradılmasına, fundamental baxışlarının formalaşdırılmasına böyük ehtiyac var. “Davamlı inkişaf və humanitar elmlərin aktual problemləri” mövzusunda beynəlxalq elmi konfransının keçirilməsinin əsas məqsədi bu sahədə çalışan alimlərin yeni ideya və elmi nəticələrinin paylaşılması və müzakirə olunması üçün uyğun platforma təqdim etməkdir.

Konfransın tərəfdaşları “Cambridge International Academics” (İngiltərə), Liepaja Universiteti (Latviya) və “Synergy Group”dur.

Azərbaycan Milli Elmlər Akademiyasının (AMEA) A.Bakıxanov adına Tarix İnstitutunun direktoru, akademik Yaqub Mahmudov, Milli Məclisin deputatı Aydın Mirzəzadə, Rusiyanın ölkəmizdəki səfirinin müşaviri İqor Yeromin, Azərbaycan Respublikasının Prezidenti yanında Bilik Fondunun aparat rəhbəri, professor İsaxan Vəliyev, görkəmli yazıçı Çingiz Aytmatovun oğlu, diplomat Əskər Aytmatov, kulturoloq, professor Fuad Məmmədov, Azərbaycan Dillər Universiteti rektorunun müşaviri Seyfəl Həsənov, ASSOL İctimai Fondunun prezidenti, ictimai xadim Assol Moldokmatova və digər çıxış edənlər konfransda müzakirə olunacaq məsələlərin əhəmiyyətindən söz açıb, tədbirin işinə uğurlar arzulayıblar.

Konfransın plenar iclasında Türkiyənin Anadolu Universitetinin professoru Bülent Açma “Regional innovativ informasiya cəmiyyəti strategiyaları: Cənub-şərqi Anadolu bölgəsi və Türkiyənin cənub-şərqi Anadolu layihəsi”, Rusiya Prezidenti yanında Xalq Təsərrüfatı və Dövlət Qulluğu Akademiyasının professoru Olqa Astafyeva “Mədəniyyət və ərazilərin davamlı inkişafı fənlərarası tədqiqatların gözü ilə” mövzularında məruzələrlə çıxış ediblər.

Sonra konfrans işini iqtisadiyyat, filologiya (dil və ədəbiyyat), kulturologiya, tarix və hüquq, təhsil və İKT, sosial elmlər olmaqla altı bölmədə davam etdirib. Bölmə iclasları mayın 15-dək davam edəcək.

Konfransın ikinci günü iştirakçılar Moskva Dövlət Pedaqoji Universitetinin professoru Yuri Qoryachevin “UNESCO-nun UNITWIN kafedrasının proqramı dayanıqlı inkişaf proqramının gündəliyində” mövzusunda məruzəsini dinləyəcəklər.

Qeyd edək ki, konfransın beynəlxalq elmi komitəsində on ölkədən alimlər təmsil olunurlar. Konfransa Türkiyə, Rusiya, Braziliya, Qazaxıstan, Qırğızıstan, Polşa, Şimali Kipr Türk Respublikası, Ukrayna və digər 15-dək ölkədən alimlərin 232 məqaləsi daxil olub. Konfransa təqdim olunan materiallar toplu halında çap edilib.