REGİONLAR


Azərbaycan polisinin 100 illik yubileyi cənub bölgəsində təntənə ilə qeyd olunub

Astara-Masallı-Lerik, 2 iyul, AZƏRTAC

İyulun 2-də Azərbaycan Polisinin 100 illik yubileyi ölkəmizin cənub bölgəsində təntənə ilə qeyd olunub.

AZƏRTAC-ın bölgə müxbiri xəbər verir ki, Astarada keçirilən tədbirin iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad edib.

Sonra tədbir iştirakçıları Heydər Əliyev Mərkəzində Ulu Öndərin zəngin və mənalı ömür yolunu əks etdirən eksponatlarla və fotoşəkillərlə tanış olublar.

Tədbir rayon polis şöbəsində davam etdirilib.

Astara Rayon İcra Hakimiyyətinin başçısı Qəzənfər Ağayev polis əməkdaşlarını əlamətdar gün münasibətilə təbrik edərək onlara ən xoş arzularını çatdırıb. Ölkəmizdə cinayətkarlığa qarşı mübarizədə və ictimai təhlükəsizliyin təmin edilməsində polis işçilərinin xidmətlərindən danışan Q.Ağayev Astara Rayon Polis Şöbəsinin kollektivinin də bu sahədə layiqli əməyinin olduğunu diqqətə çatdırıb.

Yubiley tədbirində Astara Rayon Polis Şöbəsinin rəisi, polis polkovniki Azər Cahangirov, rayon icra hakimiyyətinin hüquq şöbəsinin müdiri Bəsti Əliyeva, rayon prokuroru Qabil Qasımov, Astara Rayon Məhkəməsinin sədri Zamin İbrahimov, Dövlət Təhlükəsizliyi Xidmətinin Astara rayon şöbəsinin rəisi Elxan Abışov, rayon veteranlar təşkilatının sədri Rafiq Əliyev, rayon ziyalılar cəmiyyətinin sədri Mircəfər Babazadə və başqaları çıxış edərək Azərbaycan Polisinin yarandığı gündən cinayətkarlığa qarşı mübarizədə və ictimai asayişin qorunmasındakı fəaliyyətini yüksək dəyərləndiriblər.

Rayon Polis Şöbəsinin məsul işçisi Ceyhun Abdulov daxili işlər naziri, general-polkovnik Ramil Usubovun peşə bayramı və yubiley münasibətilə şəxsi heyətə təbrik məktubunu oxuyub. Sonra Azərbaycan Polisinin yaranmasının 100 illik yubileyi ilə bağlı məruzə dinlənilib.

Tədbirdə xidmətdə fərqlənən polis əməkdaşlarının bir qrupuna fəxri fərman, diplom və mükafatlar təqdim edilib.

x x x

Azərbaycan Polisinin yaranmasının 100 illik yubileyi münasibətilə Masallıda keçirilən tədbirin iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək, dahi şəxsiyyətin xatirəsini dərin ehtiramla anıblar.

Masallı Rayon İcra Hakimiyyətinin başçısı Rafil Hüseynov tədbirdə çıxış edərək rayonda xidmət edən polis əməkdaşlarına əlamətdar gün münasibətilə təbriklərini çatdırıb, Azərbaycan Polisinin keçdiyi çətin, məsuliyyətli və şərəfli yoldan danışıb.

R.Hüseynov 2 iyul - polis işçilərinin peşə bayramının 1998-ci ildə ulu öndər Heydər Əliyevin Fərmanı ilə təsis olunduğunu, Prezident İlham Əliyevin diqqət və qayğısı sayəsində Azərbaycan Polisinin ictimai asayişin qorunması sahəsində əldə etdiyi nailiyyətləri qeyd edib.

Diqqətə çatdırılıb ki, Azərbaycan Respublikasının Prezidenti İlham Əliyevin 2018-ci il 29 iyun tarixli Sərəncamına əsasən Azərbaycan Polisinin yaranmasının 100 illik yubileyi münasibətilə və ölkədə ictimai təhlükəsizliyin və asayişin təmin edilməsində, cinayətkarlığa qarşı mübarizədə xüsusi xidmətlərinə, qarşıya qoyulmuş tapşırıqları yerinə yetirərkən fərqləndiklərinə görə Daxili İşlər Nazirliyinin bir qrup əməkdaşı, o cümlədən Masallı Rayon Polis Şöbəsinin rəisi, polis polkovniki Habil Əmiraslanov “Vətən uğrunda” medalı ilə təltif olunub.

Tədbirdə rayon polis şöbəsinin rəisi, polis polkovniki Habil Əmiraslanovun Azərbaycan Polisinin 100 illik yubileyi ilə bağlı məruzəsi dinlənilib.

Yubiley tədbirində çıxış edən rayon prokurorunun müavini İlham Səlimov, rayon veteranlar şurasının sədri Məmmədağa Şiriyev və digərləri Azərbaycan Polisinin keçdiyi 100 illik tarixi yoldan, cinayətkarlığa qarşı mübarizədə və ictimai asayişin qorunmasında polis işçilərinin şərəfli əməyindən danışıblar.

Sonda səmərəli fəaliyyətinə görə fərqlənən şöbənin bir qrup əməkdaşına fəxri fərman və hədiyyələr təqdim olunub.

x x x

Lerikdə Azərbaycan Polisinin 100 illiyinə həsr olunmuş ümumrayon tədbirində rayon icra hakimiyyətinin məsul işçiləri, Milli Məclisinin deputatı İqbal Məmmədov, rayonun hüquq-mühafizə orqanlarının, idarə, müəssisə və təşkilatların rəhbərləri, ictimaiyyətin nümayəndələri iştirak ediblər.

Tədbir iştirakçıları əvvəlcə ulu öndər Heydər Əliyevin abidəsi önünə gül dəstələri düzərək xatirəsini ehtiramla yad ediblər.

Yubiley tədbirində çıxış edən Lerik Rayon İcra Hakimiyyətinin başçısı Rövşən Bağırov polis əməkdaşlarını peşə bayramları münasibətilə təbrik edərək, onlara çətin və şərəfli peşələrində uğurlar arzulayıblar.

Polis orqanlarının keçdiyi şərəfli yoldan, xalqımızın Ümummilli Lideri, müasir müstəqil dövlətimizin memarı və qurucusu Heydər Əliyevin dövlət strukturlarının, o cümlədən polis orqanlarının inkişafı və təkmilləşməsi üçün göstərdiyi diqqət və qayğıdan danışan R.Bağırov Ulu Öndərin siyasətinin Prezident İlham Əliyev tərəfindən inamla və uğurla davam etdirildiyini diqqətə çatdırıb.

Ümumrayon tədbirində rayon polis şöbəsinin rəisi, polis polkovniki Hüseynəli Məlikovun Azərbaycan Polisinin 100 illik yubileyi ilə bağlı məruzəsi dinlənilib.

Tədbirdə Milli Məclisin deputatı İqbal Məmmədov, rayon prokuroru Bəhruz İbrahimov, rayon məhkəməsinin hakimi Atabəy Kiçibəyov, Dövlət Təhlükəsizliyi Xidmətinin Lerik rayon şöbəsinin rəisi Mirzə Kərimov, Səfərbərlik və Hərbi Xidmətə Çağırış üzrə Dövlət Xidmətinin Lerik rayon şöbəsinin rəisi Arif Həsənov, təqaüddə olan polis əməkdaşı Şahgəldi Əliyev çıxışlarında polis əməkdaşlarını bayram münasibətilə təbrik edib və onlara şərəfli fəaliyyətlərində uğurlar arzulayıblar.

Sonda polis şöbəsinin bir qrup əməkdaşına rayon icra hakimiyyətinin fəxri fərmanı təqdim edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.