İQTİSADİYYAT
Azərbaycanda innovasiya sahəsində görülən işlər Avropa İttifaqında təqdim olunub
Bakı, 18 dekabr, AZƏRTAC
Azərbaycanda innovasiya sahəsində görülən işlər Avropa İttifaqında təqdim olunub.
Nəqliyyat, Rabitə və Yüksək Texnologiyalar Nazirliyinin ictimaiyyətlə əlaqələr sektorundan AZƏRTAC-a bildirilib ki, Belçikanın paytaxtı Brüssel şəhərində Tədqiqat və İnnovasiya üzrə Şərq Tərəfdaşlığı Panelinin 6-cı toplantısı keçirilib. Avropa İttifaqının üzv dövlətləri və Şərq Tərəfdaşlığı ölkələrinin təmsil olunduğu tədbirdə Nəqliyyat, Rabitə və Yüksək Texnologiyalar Nazirliyi, Azərbaycan Milli Elmlər Akademiyası, Azərbaycan Sahibkarlar Konfederasiyası və Azərbaycan Tibb Universitetinin nümayəndələri iştirak ediblər.
Toplantıda 2018-ci il üzrə fəaliyyətin müzakirəsi, Şərq Tərəfdaşlığı Proqramı üzrə həyata keçirilən işlər, Avropa İttifaqının innovasiya siyasəti, Şərq Tərəfdaşlığında Tədqiqat və İnnovasiyaların dəstəklənməsi, Avropa Tədqiqat Şurası, Avropa İnnovasiya Şurası, “HORIZON 2020”-nin Kiçik və Orta Müəssisələrin (SME) inkişafına dəstək alətləri, Şərq Tərəfdaşlığının Tədqiqat və İnnovasiya üçün digər dəstək imkanları üzrə fikir mübadiləsi aparılıb.
Nəqliyyat, Rabitə və Yüksək Texnologiyalar Nazirliyi yanında İnformasiya Texnologiyalarının İnkişafı Dövlət Fondunun icraçı direktoru vəzifəsini icra edən Azər Bayramov “Azərbaycanda innovasiya ekosisteminin qurulması” mövzusunda məruzə ilə çıxış edərək, ölkəmizdə innovasiya sahəsində görülən işlər barədə geniş məlumat verib.
Toplantı çərçivəsində keçirilən ikitərəfli görüşlərdə innovasiya sahəsində əməkdaşlıq imkanları, habelə, Tədqiqat və İnnovasiya üzrə Avropa İttifaqının Şərq Tərəfdaşlığı Panelinin növbəti tədbirlərindən birinin Azərbaycanda keçirilməsi müzakirə olunub.