CƏMİYYƏT
“Azərbaycanda miqrasiya siyasəti: nailiyyətlər və inkişaf perspektivləri” mövzusunda elmi-praktiki konfrans keçirilib
Bakı, 17 fevral, AZƏRTAC
Fevralın 17-də Xəzər Universitetində Dövlət Miqrasiya Xidmətinin (DMX) yaradılmasının 10-cu ildönümünə həsr olunmuş “Azərbaycanda miqrasiya siyasəti: nailiyyətlər və inkişaf perspektivləri” mövzusunda respublika elmi-praktiki konfrans öz işinə başlayıb.
AZƏRTAC xəbər verir ki, konfransın keçirilməsində məqsəd dövlətin miqrasiya siyasəti sahəsində həyata keçirilən tədbirlərin və aparılan işlərin cəmiyyətdə daha geniş təbliğ olunması, miqrasiya sahəsi üzrə aktual mövzuların ictimaiyyətin diqqətinə çatdırılması və həmin mövzularda tədqiqat və araşdırma işlərinin aparılmasına elm sahəsində fəaliyyət göstərən insanların cəlbi, həmçinin onların apardıqları elmi-tədqiqatların nəticələrinin müzakirəsinin təşkil edilməsidir.
Tədbirdə əvvəlcə DMX-nin keçdiyi inkişaf yolunu əks etdirən qısametrajlı film nümayiş olunub.
Dövlət Miqrasiya Xidməti rəisinin müavini, III dərəcəli dövlət miqrasiya xidməti müşaviri Pərviz Musayev çıxış edərək Prezident İlham Əliyevin rəhbərliyi ilə respublikamızın iqtisadi, siyasi və hərbi qüdrətinin, beynəlxalq nüfuzunun gündən-günə yüksəldiyini, bu istiqamətdə qazanılan uğurların həyatımızın bütün sahələrinin dinamik inkişafına əlverişli zəmin yaratdığını, ölkənin hərtərəfli inkişafının təzahürü kimi Azərbaycana gələn əcnəbilərin sayının ilbəil əhəmiyyətli dərəcədə artdığını diqqətə çatdırıb. O, Xidmətin yaranma tarixi, fəaliyyət istiqamətləri, 10 il ərzində əldə edilən nailiyyətlər barədə konfrans iştirakçılarına ətraflı məlumat verib.
Bildirib ki, bu gün Azərbaycan Respublikasının Dövlət Miqrasiya Xidməti əcnəbilərin və vətəndaşlığı olmayan şəxslərin olduğu və yaşadığı yer üzrə qeydiyyatı, ölkədə olma müddətinin uzadılması, ölkə ərazisində müvəqqəti və daimi yaşamaq istəyən əcnəbilərə icazənin, haqqıödənilən əmək fəaliyyəti ilə məşğul olmaq üçün iş icazələrinin, sığınacaq axtaran əcnəbilərə qaçqın statusunun verilməsi məsələləri ilə məşğul olur, vətəndaşlıq məsələlərinin həllində iştirak edir və qanunsuz miqrasiyaya qarşı mübarizə aparır. Dövlət Miqrasiya Xidmətinin yaradıldığı vaxtdan miqrasiya proseslərinə dövlət nəzarətinin gücləndirilməsi məqsədi ilə zəruri normativ-hüquqi aktlar qəbul edilib, bir sıra institusional və təşkilati tədbirlər həyata keçirilib.
Miqrasiya proseslərinin vahid və çevik prosedurlar əsasında tənzimlənməsi, sənədləşmənin sadələşdirilməsi məqsədilə imzalanmış müvafiq Fərmana əsasən 2009-cu il iyulun 1-dən miqrasiya proseslərinin idarəolunmasında “bir pəncərə” prinsipinin tətbiq edilməsinə başlanılıb. Bu prinsip üzrə vahid dövlət orqanının səlahiyyətləri Azərbaycan Respublikasının Dövlət Miqrasiya Xidmətinə həvalə edilib.
Qanunvericiliyin müasir dövrün tələblərinə uyğunlaşdırılması məqsədilə Azərbaycan Respublikasının 2013-cü il 2 iyul tarixli Qanunu ilə Azərbaycan Respublikasının Miqrasiya Məcəlləsi qəbul edilib. Beynəlxalq təcrübə, Avropa İttifaqı qanunvericiliyi, o cümlədən Beynəlxalq Miqrasiya Təşkilatı və BMT-nin Qaçqınlar üzrə Ali Komissarlığının Azərbaycandakı nümayəndəliyinin təklifləri nəzərə alınmaqla hazırlanmış Azərbaycan Respublikasının Miqrasiya Məcəlləsi 2013-cü il avqustun 1-dən qüvvəyə minib. 2009-cu ildə Azərbaycan Respublikası Prezidenti tərəfindən imzalanmış Sərəncama uyğun olaraq, Dövlət Miqrasiya Xidmətinin Vahid Miqrasiya Məlumat Sisteminin fəaliyyəti təmin edilib, daha sonra VMMS-nin “Giriş-Çıxış və Qeydiyyat” İdarələrarası Avtomatlaşdırılmış Məlumat Axtarış Sisteminə və Ədliyyə Nazirliyinin Əhalinin Dövlət Reyestrinə inteqrasiyası təmin olunub, həmçinin Vergilər Nazirliyinin Avtomatlaşdırılmış Vergi İnformasiya Sistemi ilə məlumat mübadiləsi yaradılıb.
Görülmüş işlərin nəticəsidir ki, bu gün Dövlət Miqrasiya Xidmətinin Vahid Miqrasiya Məlumat Sistemi vasitəsilə hər bir əcnəbinin və vətəndaşlığı olmayan şəxsin hansı tarixdə ölkəyə daxil olması, harada yaşaması, işləməsi və nə vaxt ölkəni tərk etməsi tam nəzarət altındadır.
Bununla belə, dövlət orqanlarının fəaliyyətində şəffaflığın artırılması və korrupsiyaya şərait yaradan halların aradan qaldırılması üçün əhaliyə elektron xidmətlərin göstərilməsi zəruriliyi nəzərə alınaraq, Azərbaycan Respublikası Prezidenti tərəfindən imzalanmış “Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında” 2011-ci il 23 may tarixli Fərmana uyğun olaraq 2011-ci il 1 sentyabr tarixindən Dövlət Miqrasiya Xidməti tərəfindən elektron xidmətlərin göstərilməsinə başlanılıb.
Hazırda Xidmət tərəfindən əhaliyə göstərilən 11 elektron xidmətdən hamısı “Elektron hökumət” portalına qoşulub.
2016-cı ildə Dövlət Miqrasiya Xidməti tərəfindən təyin olunmuş cərimələrin “ASANPAY” ödəniş sistemi vasitəsilə ödənilməsinə başlanıb. Bu da sərhəd buraxılış məntəqələrində əcnəbilər və vətəndaşlığı olmayan şəxslərin sürətli keçidinin təmin edilməsinə imkan verir.
Vətəndaşlara göstərilən xidmətlərin daha keyfiyyətli, rahat, yeni üslubda və müasir innovasiyaları tətbiq etməklə həyata keçirilməsinin, vətəndaşlara münasibətdə etik qaydalara, nəzakətli davranışa əməl edilməsinin, vətəndaş məmnunluğunun təmin olunmasının zəruriliyini nəzərə alaraq, yaradılmış və Azərbaycan brendi olan “ASAN xidmət” mərkəzlərində DMX tərəfindən bir neçə xidmət növü təqdim olunur.
Ölkədə miqrasiya sahəsində həyata keçirilən proseslərdə ictimaiyyətin fəallığının artırılması, bu sahədə qeyri-hökumət təşkilatları ilə qarşılıqlı fəaliyyətin dərinləşdirilməsi məqsədilə 2015-ci ildə Dövlət Miqrasiya Xidməti yanında İctimai Şura yaradılıb və vətəndaş cəmiyyəti ilə birgə sıx əməkdaşlıq təmin edilib.
Azərbaycanda miqrasiya sahəsində həyata keçirilən tədbirləri, görülən işləri yüksək qiymətləndirən BMT QAK-ın Azərbaycandakı nümayəndəsi Furio De Angeles Dövlət Miqrasiya Xidməti ilə əməkdaşlıq əlaqələrinin uğurlu inkişafından və qarşılıqlı fəaliyyətin gələcək perspektivlərindən danışıb.
BMqT-nin Azərbaycandakı nümayəndəsinin rəhbəri Serhan Aktoprak miqrantların hüquqlarının müdafiəsinin təmin olunması sahəsində Dövlət Miqrasiya Xidməti ilə sıx əməkdaşlıq etdiklərini bildirib və keçirilən konfransın miqrasiya sahəsində yüksək ixtisaslı kadrların hazırlanmasına və elmi işlərin sistemləşdirilməsinə töhfə verəcəyinə əminliyini ifadə edib.
Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı elmi-praktiki konfransın ali təhsil ocağında keçirilməsindən məmnunluğunu ifadə edib. Miqrasiya Xidməti ilə əməkdaşlığın qurulmasında və möhkəmləndirilməsində konfransın əhəmiyyətindən danışıb, səslənən fikirlərin, aparılan müzakirələrin faydalı olacağını bildirib.
Sonra Xəzər Universitetinin miqrasiya araşdırmaları mərkəzinin təqdimatı olub.
Elmi-praktiki konfrans 3 mövzu - “Miqrasiya siyasəti və insan hüquqları”, “Qaçqınlar və sığınacaq axtaran şəxslərin beynəlxalq himayəsi” və “Qloballaşma dövründə miqrasiya prosesləri: çağırışlar və cavab tədbirləri” üzrə plenar iclaslarla davam etdirilib. Konfransda AMEA-nın, dövlət qurumlarının, ali təhsil ocaqlarının elmi fəaliyyətlə məşğul olan magistr, aspirant və alimlərinin təqdimatları və məruzələri dinlənilib, müzakirələr aparılıb.
Elmi-praktiki konfransın yekununda qətnamə qəbul edilib.