İQTİSADİYYAT
Azərbaycanın Rəqəmsal Ticarət Qovşağı ABŞ-da təqdim edilib
Bakı, 3 may, AZƏRTAC
Azərbaycanın Rəqəmsal Ticarət Qovşağı ABŞ-da təqdim edilib.
“B.EST Solutions” Azərbaycan şirkətindən AZƏRTAC-a bildirilib ki, aprelin 30-dan mayın 2-dək Vaşinqtonda biometriya və identifikasiyanın idarə edilməsi üzrə aparıcı qlobal tədbir olan “Connect:ID” keçirilib. Tədbir çərçivəsində təşkil olunan konfrans və sərgidə sənaye, hökumət və adi istehlakçıların nümayəndələri son layihələrlə tanış olub, həm fiziki, həm də rəqəmsal identitet konsepsiyasını formalaşdıran siyasət və texnologiyalarla bağlı məsələləri müzakirə ediblər.
“Science Media Partners Ltd” Britaniya şirkəti və “The International Biometrics + Identity Association” (IBIA) Amerika Ticarət Assosiasiyasının dəstəyi ilə təşkil olunan konfrans identifikasiyanın, onun istifadə sferasından (aviasiya və sərhəd nəzarəti, o cümlədən səhiyyə, maliyyə, təhsil və s.) asılı olmayaraq, təhlükəsiz texnologiyalar vasitəsilə audentifikasiyanın öyrənilməsinə həsr olunub. “Connect:ID” layihələrin işlənib hazırlanması, öyrənilməsi və identifikasiyanın qabaqcıl texnologiyalarının tətbiqi məqsədilə qabaqcıl sahə mütəxəssislərini, dövlət strukturlarının nümayəndələrini və istifadəçiləri birləşdirir.
Müzakirələrin əsas mövzuları uçot yazıları, mobil identitetlər və Internet of Things - gələcəyin texnologiyalarına həsr olunub. Bundan əlavə kiber-dolandırıcılıq, rəqəmsal məkanda şəxsiyyətin identifikasiyası, şəxsi məlumatların oğurlanması, milli təhlükəsizlik və kiber-müdaxilə təhdidləri problemlərinə baxılıb. Müzakirələrdə, həmçinin “Konfidensiallıq çox ola bilərmi?”, “Konfidensiallıqla anonimlik arasında necə bir əlaqə var?” kimi fundamental məsələlər yer alıb. Biometriya, milli identifikasiya konsepsiyası, eləcə də mobil texnologiyalara münasibətdə rəqəmsal identifikasiya sahəsində genişlənmələr kimi mövzular işıqlandırılıb.
Konfransın iki sessiyasında Azərbaycan paralel olaraq “Mobil identitet: Azərbaycanda “Asan İmza” ilə sosial, maliyyə və texnoloji inteqrasiyanın uğurlu artımı” və “Azərbaycan hökumətinin Rəqəmsal Ticarət Qovşağı” təqdimatları ilə təmsil olunub. “FutureTrust” Avropa layihəsi çərçivəsində Avropa İttifaqı ilə Azərbaycan arasında transsərhəd elektron xidmətlərin reallaşdırılmış modeli təqdim edilib, eləcə də Avropa dövlətləri ilə artıq mövcud olan prinsip üzrə Amerika kontinenti ölkələri ilə transsərhəd ticarət əməkdaşlığının imkanları müzakirə edilib.
Qeyd edək ki, Azərbaycanın Rəqəmsal Ticarət Qovşağının tərəfdaşı olan “B.EST Solutions” 2017-ci ildən “FutureTrust” Avropa layihəsinin assosiativ üzvü hesab edilir. Buraya Almaniya, Böyük Britaniya, Portuqaliya, Avstriya, Gürcüstan, Türkiyə, Cənubi Afrika Respublikası, Serbiya, Estoniya, Norveç, İsrail və İsveçrə kimi ölkələr daxildir. “FutureTrust” proqramlara “eIDAS” qoşmağa və layihənin pilot versiyasını nümayiş etdirməyə imkan verən həlləri təqdim edib.
Çıxış edənlər “FutureTrust”ın həm işgüzar, həm də texniki aspektlərini müzakirə edib, eləcə də transsərhəd etibarlılığında onun vacibliyini xüsusilə qeyd ediblər. “Asan İmza” gücləndirilmiş mobil elektron imzanın operatoru olan “B.EST Solutions” Azərbaycan şirkətinin rəhbəri Yana Krimpe Azərbaycan Respublikasının Prezidenti və İqtisadi İslahatların Təhlili və Kommunikasiya Mərkəzinin təşəbbüsü ilə yaradılan Rəqəmsal Ticarət Qovşağı haqqında məruzə ilə çıxış edib. Qeyd edilib ki, bu Qovşaq Azərbaycan ilə Avropa, eləcə də Azərbaycanın ticarət tərəfdaşları olan digər ölkələr arasında transsərhəd elektron xidmətlərin inkişafına istiqamətlənib.
Stroz Friedberg şirkətinin vitse-prezidenti Brayan Hörd, Oksford Universiteti və Corc Vaşinqton Universitetinin hüquq üzrə professoru Conatan Terli, ABŞ-ın Gömrük və Sərhəd Xidmətinin Torpaq Əməliyyatları üzrə komissar köməkçisinin müavini Con Vaqner, ABŞ-ın Səhiyyə və Sosial Xidmətlər Departamentinin səhiyyə məsələləri, tibbi resurslar administrasiyası üzrə baş məsləhətçisi Matt Kuin, IATA aviasiya dəstəyinin rəhbəri Selin Kanu, “Connect:ID” konfransının həmsədri Mark Loki, eləcə də rəqəmsal identifikasiya üzrə ixtisaslaşan qabaqcıl şirkətlərin, elektron hökumətlərin, Elektron İdentitet və təhlükəsizlik üzrə Avropa Assosiasiyası, həmçinin ABŞ və Avropanın nüfuzlu ali məktəblərinin nümayəndələri tədbirin əsas məruzəçiləri olublar.
Yana Krimpe öz çıxışlarında “ASAN xidmət”, elektron hökumətin innovativ xidmətləri, e-gömrük və e-vergi, “Asan İmza”nın 195 saylı “Çağrı mərkəzi”nə inteqrasiyası da daxil olmaqla bu kimi innovativ layihələri təqdim edib, ölkədə həyata keçirilən islahatlardan danışıb. O, həmçinin konfrans iştirakçılarını AZINNEX konsorsiumu ilə tanış edib, Azərbaycan innovasiyalarının digər ölkələrdə tətbiqi imkanlarını müzakirə edib. Azərbaycanda “Asan İmza” mobil identifikatoru 2014-cü ildə buraxılıb. Ölkədə keçirilən innovasiyalar və aparılan islahatlar sayəsində Azərbaycan regionda biznes üçün əlverişli və ən şəffaf ölkələrdən birinə çevrilib ki, bu da Dünya Bankının “Biznesin aparılmasının sadəliyi” reytinqində öz müsbət əksini tapıb.