Azərbaycanlı alim Türkiyədə “İslam mədəniyyətində əlyazma sənətləri” mövzusunda araşdırma aparıb

Bakı, 17 sentyabr, AZƏRTAC

Əlyazmaşünas alim, ilahiyyat üzrə fəlsəfə doktoru Səbinə Nemətzadə İstanbulda İslam Araşdırmaları Mərkəzində (İSAM) “İslam mədəniyyətində əlyazma sənətləri” mövzusunda araşdırma aparıb. Alim yeni nəşr olunan “Əlyazmaların bədii tərtibat xüsusiyyətlərində dini-fəlsəfi aspektlər” monoqrafiyasını mərkəzə hədiyyə edib.

Azərbaycan Milli Elmlər Akademiyasından AZƏRTAC-a bildirilib ki, monoqrafiyanın İSAM-da keçirilən təqdimat mərasimində tədqiqatın yeni müstəvidə aparıldığı və müasir dövr üçün aktuallığı vurğulanıb.

Əsər Türkiyənin elmi mühiti tərəfindən maraqla qarşılanıb.

S.Nemətzadə monoqrafiyanın nüsxələrini Atatürk Kitabxanasına, Atatürk Mədəniyyət, Dil, və Tarix Qurumuna, Türk Tarix Qurumuna, Mərmərə Universitetinə də təqdim edib.