Bakı, 28 iyul, AZƏRTAC

“Azərsu” Açıq Səhmdar Cəmiyyəti (ASC) Quba rayonunun Qəçrəş kəndində içməli su təchizatının yaxşılaşdırılması layihəsini uğurla başa çatdırıb.

“Azərsu” ASC-nin mətbuat xidmətindən AZƏRTAC-a bildirilib ki, yeni su təchizatı sisteminin açılış mərasimində çıxış edən Quba Rayon İcra Hakimiyyəti başçısının müavini Nəsrulla Vəliyev “Azərbaycan Respublikası regionlarının sosial-iqtisadi inkişafı Dövlət Proqramı”na uyğun olaraq bölgələrdə genişmiqyaslı infrastruktur layihələrinin həyata keçirildiyini bildirib, ölkə rəhbərliyinin kəndlərin içməli su təchizatının yaxşılaşdırılmasını daim diqqətdə saxladığını vurğulayıb. Bildirib ki, son illər bölgələrdə həyata keçirilən su, təbii qaz, yol layihələri regionların inkişafına böyük təkan verib və əhalinin sosial vəziyyətinin yaxşılaşmasına səbəb olub. Bu istiqamətdə əhalinin içməli su təchizatının yaxşılaşdırılması ilə bağlı görülən işlər xüsusi qiymətləndirilməlidir. Qəçrəşdə istismara verilən su təchizatı sistemləri kəndin sosial inkişafına böyük töhfədir.

“Azərsu” ASC-nin “Birləşmiş Sukanal” MMC-nin direktorunun birinci müavini Vəli Həsənov bildirib ki, regionların sosial-iqtisadi inkişafı dövlət proqramlarına uyğun olaraq, regionlarda 43 şəhər və rayon mərkəzində su layihələrinin icrasına başlanıb və artıq 23 şəhərdə işlər başa çatdırılıb. 2016-cı ildə daha 7 rayon mərkəzində su layihələrinin icrası yekunlaşacaq, eyni zamanda, Ağcabədi və Qazax şəhərlərində işlərə başlanılması nəzərdə tutulur. “Azərsu” ASC rayon mərkəzləri ilə yanaşı, içməli sudan əziyyət çəkən kəndlərdə də təxirəsalınmaz tədbirlər görür. Prezident İlham Əliyevin respublikanın hər bir şəhər və kəndinin keyfiyyətli içməli su ilə təmin edilməsi barədə tapşırıqlarına uyğun olaraq, genişmiqyaslı işlər həyata keçirilir. 2013-cü ildə Quba şəhərinin su təchizatı və kanalizasiya sistemlərinin yenidən qurulması layihəsi uğurla başa çatdırılıb. Bu gün açılışını etdiyimiz su təchizatı sistemləri turizm zonası kimi tanınan Qəçrəş kəndinin inkişafına müsbət təsirini göstərəcək. “Azərsu” ASC hazırda Masallı rayonunun Muğan bölgəsində yerləşən 5 kəndin, Yardımlı, Ağsu, İsmayıllı rayonlarının sudan əziyyət çəkən kəndlərinin, həmçinin Biləsuvar rayonu və Taxtakörpü ərazisində məskunlaşan məcburi köçkünlərin su təchizatının yaxşılaşdırılması məqsədilə layihələr icra edir.

Açılış mərasimində çıxış edən sakinlər kəndin ən böyük qayğılarından olan içməli su məsələsinin həllinə göstərdiyi diqqət və qayğıya görə ölkə rəhbərliyinə, “Azərsu” ASC-yə minnətdarlıqlarını bildiriblər.

Quba rayonunun Qəçrəş kəndində icra olunan layihə çərçivəsində mövcud magistral kəmərin 4,4 kilometrlik hissəsi yenidən qurulub, kəndin yüksəklikdə yerləşən hissəsində ümumi tutumu 600 kubmetr olan 2 su anbarı tikilib, kənd daxilində polietilen borularla 2 kilometrlik uzunluğunda paylayıcı şəbəkə yaradılıb. Hazırda paylayıcı şəbəkədən evlərə çıxışların və birləşmələrin verilməsi işləri həyata keçirilir. Layihənin icrası nəticəsində Qəçrəş kəndinin yüksəklikdə yerləşən hissəsində yaşayan 1250 sakinin içməli su problemi öz həllini tapıb.