Bakı, 2 fevral, AZƏRTAC

“Azərsu” ASC ekspertlərindən ibarət nümayəndə heyəti Azərbaycan Milli Elmlər Akademiyası (AMEA) Yüksək Texnologiyalar Parkında (YT Park) olub.

AMEA-dan AZƏRTAC-a bildirilib ki, qonaqlar YT Park və onun rezidenti olan Təcrübə-Sənaye Zavodunun istehsal prosesi, eləcə də burada hazırlanan müxtəlif çeşidli məhsullarla tanış olublar.

Qonaqlara 130 illik tarixə malik “Millers Oil” şirkətinin istehsalat obyekti, istehsal sahəsi və məhsulları haqqında ətraflı məlumat verilib. Bildirilib ki, şirkət premium klass mühərrik yağlarının hazırlanması və dünya standartlarına cavab verən neft məhsulları istehsalının artırılması ilə məşğuldur. Xarici markalı avtomobillərdə istifadəsi mümkün olan yüksəkkeyfiyyətli məhsullar “Azərsu” ekspertlərinin böyük marağına səbəb olub. Onlar YT Park və bu müəssisənin rezidentlərinin fəaliyyətini yüksək qiymətləndirərək birgə əməkdaşlıqda maraqlı olduqlarını bildiriblər.

Sonra “Azərsu”dan olan nümayəndə heyəti beynəlxalq standartlara cavab verən, akkreditasiyadan keçmiş Strateji Elmi Analitik Sınaq Mərkəzinin fəaliyyəti ilə tanış olub. Onlara laboratoriya avadanlığı, akkreditasiya sahəsi və xidmətlər barədə geniş məlumat verilib.

YT Parkın rezidentləri “Azərsu”nun keyfiyyət üzrə menecerləri və texniki ekspertlərinin çoxsaylı suallarını cavablandırıblar.

Görüşdə, həmçinin YT Parkda istehsal olunan yağ və sürtkü məhsullarının dövlət satınalınması məsələləri və gələcəkdə iki qurum arasında anlaşma memorandumunun imzalanmasına dair müzakirələr aparılıb, müvafiq qərarlar qəbul edilib.