Bakı, 7 avqust (AZƏRTAC). AZƏRTAC xəbər verir ki, avqustun 7-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.

“Təzə bazar” MMC-nin həyətindəki yarmarkada alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdı. Burada şəhər sakinlərinə Sabirabad, Gədəbəy, Hacıqabul və digər rayonlardan gətirilmiş 11 tondan çox məhsul təklif olunurdu.

Yarmarkada hər həftə iştirak edən gədəbəyli fermer Arzu Tanrıquliyev bu dəfə 1 tondan çox kartof, soğan, pendir və bal satırdı. O, məhsulları ucuz təklif etdiyini və yaradılan şəraitdən razılığını bildirirdi.

Kənd Təsərrüfatı Nazirliyinin nümayəndəsi Zakir Bağırovun verdiyi məlumata görə, yarmarkadakı qiymətlər bazardakından 20-25 faiz ucuzdur. Belə ki, qoyun ətinin kiloqramı 4 manat 50 qəpiyə, mal əti 4 manata, kartof, xiyar, soğan və badımcan 30-50 qəpiyə, yumurtanın biri 8 qəpiyə və s. satılır.

Bakı Rabitə və Nəqliyyat Kollecinin həyətində təşkil olunan yarmarkada mövsümə uyğun meyvə və tərəvəz daha çox idi.

Kənd Təsərrüfatı Nazirliyinin nümayəndəsi Saleh Zərbəliyev məlumat verdi ki, buraya Salyan, Qusar, Astara, Şabran və Quba rayonlarından 89,4 ton kənd təsərrüfatı məhsulları gətirilmişdir. Fermerlərin və şəxsi təsərrüfat sahiblərinin alıcılara təklif etdikləri məhsullar arasında qarpız və yemiş daha çoxdur. Paytaxt sakinləri xiyar, badımcan, lobya, kartof, soğan, yerkökü, acı və şirin bibər, kələm, alça, şaftalı, üzüm, gavalı, yay alması, göyərti, ağartı və s. məhsulları həvəslə alırlar. Yarmarkada qiymətlər də sərfəlidir. Bütün məhsullar bazarlardakından 25-30 faiz, bəziləri hətta yarıbayarı ucuz təklif olunur.

Badamdar qəsəbəsinin mərkəzində, 239 nömrəli məktəbin yaxınlığındakı yarmarkada satışa Ağdaş, Salyan, Masallı və digər rayonlardan gətirilmiş 28 tondan çox kənd təsərrüfatı məhsulu çıxarılmışdı. Burada da bostan məhsulları üstünlük təşkil edirdi.

Qubalı Famil Kərimovun kiloqramını 50-80 qəpiyə təklif etdiyi alma və armudu qəsəbə sakinləri həvəslə alırdılar. Fermerin sözlərinə görə, ikinci dəfədir ki, burada məhsul satır və yaradılmış şəraitdən olduqca razıdır.

Metronun “Əhmədli” stansiyasının yaxınlığında, “Azər” ticarət mərkəzindəki yarmarkada Qəbələ, Şəmkir, Salyan, Ağcabədi, Kürdəmir, Biləsuvar, Quba və digər rayonların fermerləri alıcılara 155 tonadək qarpız, yemiş, şaftalı, kartof, soğan, badımcan, pomidor, ət və süd məhsulları təklif edirdilər.

Kənd Təsərrüfatı Nazirliyinin nümayəndəsi Oqtay Hüseynovun sözlərinə görə, məhsullar bazardakından 25-30 faiz, bəziləri isə 50 faiz ucuz qiymətlərə satılır. Şəhər sakinləri yarmarkada bazarlıq etməyin sərfəli olduğunu bildirirlər.

Kənd Təsərrüfatı Nazirliyinin nümayəndəsi Mustafa Rüstəmovun verdiyi məlumata görə, şənbə günü Suraxanı rayonu ərazisində təşkil olunmuş yarmarkalarda - “Günəş” ticarət mərkəzində və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində satışa Samux, Daşkəsən, Quba, Biləsuvar, Balakən və Cəlilabad rayonlarından gətirilmiş 60 tondan artıq məhsul çıxarılmışdır. Məhsul bolluğu qiymətlərə təsir etmişdir və məhsullar bazarlarla müqayisədə 30-35 faiz ucuz satılır. Hər iki yarmarkada məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.

Biləcəri qəsəbəsi, 284 nömrəli məktəbin yaxınlığındakı yarmarkaya Ağsu və Qazaxdan 12 tonadək meyvə-tərəvəz, o cümlədən lobya, kartof, qarpız, kök, badımcan, pomidor və s. gətirilmişdi. Bu məhsullar şəhər sakinlərinə bazardakından 20-30 faiz ucuz qiymətlərə təklif edilirdi.

Binəqədi rayonu 6 nömrəli Bakı Texniki Peşə Liseyinin qarşısındakı yarmarkada şəhər sakinləri Ağstafa, Bərdə və Goranboydan gətirilmiş meyvə-tərəvəzi, süd məhsullarını ucuz qiymətə həvəslə alırdılar.

######