CƏMİYYƏT


BMT-nin rezident əlaqələndiricisi: Nifrət nitqinin bütün hallarına qarşı qətiyyətlə çıxış etmək mənəvi borcumuzdur

Bakı, 18 iyun, AZƏRTAC

BMT-nin ölkəmizdəki rezident əlaqələndiricisi Vladanka Andreeva Nifrət nitqinə qarşı beynəlxalq mübarizə günü münasibətilə müraciət edib.

Bu barədə AZƏRTAC-a BMT-nin Azərbaycandakı nümayəndəliyindən məlumat verilib.

Müraciətində Nifrət nitqinə qarşı beynəlxalq mübarizə gününün bu il ilk dəfə qeyd olunduğunu bildirən Vladanka Andreeva deyib:

“2021-ci il iyul ayında BMT Baş Assambleyası nifrət nitqinin yayılması və genişlənməsi ilə bağlı qlobal narahatlığı vurğulayaraq, “Nifrət nitqi ilə mübarizədə dinlərarası və mədəniyyətlərarası dialoqun və tolerantlığın təşviqi” haqqında qətnamə qəbul edib.

Təəssüf ki, nifrət nitqi halları dünyanın hər yerində artmaqdadır. Bu, hər kəsə təsir edir.

Nifrət nitqi zorakılığa sövq etmək, sosial birliyi və tolerantlığı zəiflətməklə yanaşı psixoloji, emosional və fiziki zərər vurmaq potensialına malikdir. Yeni kommunikasiya texnologiyaları sayəsində onun miqyası və təsir dairəsi daha da genişlənir”.

BMT-nin Azərbaycandakı rezident əlaqələndiricisi bildirib ki, lazımi diqqət yetirilməsə, nifrət nitqi sülhə və inkişafa zərər vura bilər, çünki o, münaqişələr və gərginliklər, habelə genişmiqyaslı insan hüquqlarının pozulmasına zəmin yaradır.

“Nifrət nitqinə qarşı beynəlxalq mübarizə günü BMT-nin Nifrət Nitqinə qarşı Strategiya və Fəaliyyət Planından irəli gələn təşəbbüsdür. Bu strategiyaya uyğun olaraq, BMT Azərbaycanda və qonşu ölkələrdə dinc, inklüziv və ədalətli cəmiyyətləri qurmaq üçün vətəndaş cəmiyyəti və gənclərin sosial media da daxil olmaqla, nifrət nitqinin qarşısının alınması və müxtəlif vəkillik təşəbbüslərində fəal iştirakını dəstəkləyir.

Nifrət nitqinin bütün hallarına qarşı qətiyyətlə çıxış etmək mənəvi borcumuzdur. Bu bəlaya qarşı mübarizədə hər birimizin vacib rolu var. Heç kim nifrət etmək üçün doğulmur. Nifrət öyrədilir. Lakin o, birgə fəaliyyətlər, dialoq və qarşılıqlı anlaşma ilə unutdurula bilər”, - deyə Vladanka Andreeva müraciətində vurğulayıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.