İQTİSADİYYAT
BÖLGƏLƏRİN SOSİAL-İQTİSADİ İNKİŞAFINDA YENİ MƏRHƏLƏ BAŞLANIR
Müşavirədə çıxış edən rayon ictimaiyyətinin nümayəndələri, iş adamları xatırlatmışlar ki, Prezident İlham Əliyev seçkiqabağı görüşləri, o cümlədən Şamaxı rayonuna səfəri zamanı qarşıdakı beş ildə ölkədə 600 min yeni iş yerinin açılması üçün lazımi tədbirlər görüləcəyini bəyan etmişdir. Prezidentin imzaladığı Fərmanda bu məsələ öz əksini geniş şəkildə tapmışdır. Bu sahədə Şamaxı rayonunda da müvafiq tədbirlər həyata keçirilməkdədir. Bunun sayəsində rayonda işsizliyin səviyyəsi xeyli azalmışdır. Məsələn, bu yaxınlarda rayon mərkəzində istifadəyə verilən xalçaçılıq və tikiş sexlərində 250 nəfərdən çox şamaxılı yeni iş yeri tapmışdır. “Şirvan göl” özəl müəssisəsi də xeyli iş yeri açacaqdır. Bu istiqamətdə hazırlanmış fəaliyyət proqramının həyata keçirilməsi rayonda işsizliyin aradan qaldırılması ilə yanaşı, sahibkarlığın gələcək inkişafına geniş yol açacaqdır.
Çıxış edənlər Prezident İlham Əliyevin Nazirlər Kabinetinin birinci iclasında dediyi “Azərbaycan təkcə Bakıdan və Abşerondan ibarət deyildir. Azərbaycanın hər bir regionu inkişaf etməlidir” - fikrini xüsusi vurğulamışlar. Belə ki, regionların inkişafının təmin edilməsi üçün yerli resurslar nəzərə alınmaqla müvafiq dövlət proqramları hazırlanaraq həyata keçiriləcəkdir. Artıq Şamaxı rayonunda aqrar sektorda islahatların ikinci mərhələsinə başlamaq üçün lazımi tədbirlər görülməsinə başlanmışdır. Eyni zamanda, rayonda texniki servis mərkəzinin yaradılması işi sürətləndiriləcəkdir. Fermerləri texnika və kreditlə təmin etmək, rayonda toxumçuluq və damazlıq bazası yaratmaq üçün geniş tədbirlər nəzərdə tutulmuşdur.
Müşavirədə vurğulanmışdır ki, Şamaxı rayonunun böyük daxili imkanları var. Bunlardan istifadə olunması üçün ət, süd məhsulları, meyvə və tərəvəz şirələri istehsalı üzrə kiçik emal müəssisələr açılmalı, turizm inkişaf etdirilməli və infrastruktur yaxşılaşdırılmalıdır.
Çıxış edənlər son vaxtlar rayonda sosial məsələlərin həlli sahəsində görülmüş işlərdən də bəhs etmişlər. Bildirilmişdir ki, 6 milyard manatlıqdan çox tikinti, abadlıq və yaşıllaşdırma işləri görülmüş, əhalinin elektrik enerjisinə, təbii qaza və içməli suya olan tələbatının daha dolğun ödənilməsi üçün tədbirlər görülmüşdür. Yaxın günlərdə Şamaxı şəhərinin su və kanalizasiya sisteminin tamamilə yenidən qurulmasına başlanması ilə uzun illərdən bəri davam edən problem həll olunacaqdır.
Müşavirədə ölkə Prezidentinin Fərmanının icrası ilə əlaqədar rayon üzrə hazırlanmış geniş tədbirlər planının həyata keçirilməsi üçün müvafiq qurumlara konkret tapşırıqlar verilmişdir.