İQTİSADİYYAT
BANM-da Layihə İdarəetmə Məktəbinin məzun günü qeyd edilib
Bakı, 6 aprel, Elvin Camalov, AZƏRTAC
Aprelin 4-də Bakı Ali Neft Məktəbində (BANM) BP və onun Azəri-Çıraq-Günəşli (AÇG), Bakı-Tbilisi-Ceyhan (BTC), Şahdəniz və Cənubi Qaz Boru Kəməri (CQBK) layihələrindəki tərəfdaşları - SOCAR, TPAO, PETRONAS, Chevron, LUKOIL, NICO, Statoil, INPEX, ExxonMobil, SGC, ITOCHU, ONGC, TOTAL, Eni Layihə İdarəetmə Məktəbinin (LİM) beşinci məzun buraxılışı gününü qeyd ediblər.
AZƏRTAC xəbər verir ki, tədbirdə BANM-ın rektoru Elmar Qasımov, SOCAR-ın kadr, rejim və informasiya texnologiyaları üzrə vitse-prezidenti Xalik Məmmədov, “BP Azerbaijan” şirkətinin əlaqələr, xarici işlər və strategiya üzrə vitse-prezidenti Bəxtiyar Aslanbəyli, gənclər və idman nazirinin müavini Fərhad Hacıyev və digər rəsmilər iştirak ediblər.
Bakı Ali Neft Məktəbinin rektoru Elmar Qasımov bildirib ki, SOCAR-ın Bakı Ali Neft Məktəbində keçirilən bugünkü tədbirdə 52 nəfər məzuna beynəlxalq miqyasda tanınan Corc Vaşinqton Universitetinin layihələri idarəetmə ixtisası üzrə magistr sertifikatı təqdim olunub.
Onun sözlərinə görə, LİM 2011-ci ilin yanvar ayında ölkədə potensialların yaradılması səylərini dəstəkləmək öhdəliyinin bir hissəsi kimi BP-nin əməliyyatçısı olduğu AÇG, BTC, Şahdəniz və CQBK layihələrindəki tərəfdaşlar tərəfindən yaradılıb. Bu layihə mərhələlərlə həyata keçirilib. Layihə başlandığında qarşıya qoyulan məqsədlərdən biri də təlim proqramının icrasını yerli təlimçilərə təhvil vermək olub. LİM 4-cü fazada bu məqsədə nail olub və təlim proqramının keçirilməsi tamamilə yerli heyətə ötürülüb. Hazırda LİM-in bütün təlim heyəti yerli mütəxəssislərdən ibarətdir.
E.Qasımov qeyd edib ki, 2017-ci ildə başlamış 4-cü faza SOCAR-ın Bakı Ali Neft Məktəbi ilə tərəfdaşlıq edən “Twenty Eighty Strategy Execution” şirkəti tərəfindən yerinə yetirilib. Hazırda LİM özünümaliyyələşdirmə mərhələsinə keçib və layihələri idarəetmə sahəsində aparıcı beynəlxalq təlim şirkəti olan “Twenty Eighty Strategy Execution” ilə əməkdaşlıq şəraitində Bakı Ali Neft Məktəbi tərəfindən idarə olunur.
“Layihə İdarəetmə Məktəbində 24 şirkətdən 52 nəfər məzun olub. Həmin şirkətlərə SOCAR, BP, “Paşa Holdinq”, “Paşa Siğorta”, “Azneft”, SOCAR AQŞ, “SOCAR Upstream”, Əmək və Əhalinin Sosial Müdafiəsi Nazirliyi, Bakı Şəhər Halqası, “Gilan Tekstil Park”, “Azerconnect”, “Atlantic Waste Solutions”, “AzIn Telekom” və digərləri daxildir.
SOCAR-ın kadr, rejim və informasiya texnologiyaları üzrə vitse-prezidenti Xalik Məmmədov Layihə İdarəetmə Məktəbini hazırda yerli mütəxəssislərin ixtisaslarının artırılması istiqamətində ən uğurlu layihə adlandırıb və bu layihənin icrasının yüksək səviyyədə həyata keçirildiyi üçün ali məktəbə təşəkkür edib. Xalik Məmmədov SOCAR-ın təlim və biliklərin artırılması istiqamətində öz əməkdaşlarını daim dəstəklədiyini bildirərək qeyd edib ki, bu gün proqramı uğurla başa vuranlar arasında 23 nəfər SOCAR-ın müxtəlif müəssisələrində çalışan əməkdaşlar var.
Tədbirdə həmçinin “BP Azerbaijan”ın vitse-prezidenti Bəxtiyar Aslanbəyli, gənclər və idman nazirinin müavini Fərhad Hacıyev və layihənin icra edilməsində böyük rolu olan Böyük Britaniyanın “Stratex” şirkətinin biznesin inkişafı üzrə meneceri Ed Hyuz çıxış edib və məzunları ürəkdən təbrik ediblər.
Layihə İdarəetmə Məktəbinin məzunu - əmək və əhalinin sosial müdafiəsi nazirinin müavini Mətin Kərimli də tədbirdə çıxış edərək bu proqramın gənc mütəxəssislərin ixtisaslarının artırılması və layihə idarəetməsinin öyrənilməsində əvəzsiz olduğunu və bu məktəbin məzunu olmaqdan sevinc hissi keçirdiyini bildirib.
Daha sonra BANM-ın rektoru Elmar Qasımov, SOCAR-ın vitse-prezidenti Xalik Məmmədov, “BP Azerbaycan”ın vitse-prezidenti Bəxtiyar Aslanbəyli və “Stratex” şirkətinin biznesin inkişafı üzrə meneceri Ed Hyuz tərəfindən hər bir məzuna ABŞ-ın Corc Vaşinqton universitetinin magistr sertifikatı və hədiyyələr təqdim edilib.
Məlumat üçün bildirək ki, LİM layihələrin idarə olunması üzrə beynəlxalq səviyyədə qəbul edilmiş geniş bir təlim proqramı təmin etməklə həm özəl, həm də dövlət sektorundakı şəxslərin layihələri idarəetmə bacarıqlarını təkmilləşdirmək üçün nəzərdə tutulub. Proqramın məqsədi həm layihələrin bilavasitə idarə edilməsinin icrasını təkmilləşdirmək, həm də ölkədə layihələrin idarə olunması üzrə uzunmüddətli bacarıqların yaradılmasını təmin etməkdir. Builki məzunlar hökumət, neft və qaz, sığorta, tikinti və təhsil də daxil olmaqla dövlət və özəl sektordan olan müxtəlif təşkilatları təmsil edirlər.
Qeyd edək ki, LİM-in tədris proqramı yeddi moduldan ibarətdir. Bunlar layihələrin idarə edilməsi, layihəyə rəhbərlik, idarəetmə və əlaqə, risklərin idarə edilməsi, planlaşdırma və xərclərə nəzarət, layihə menecerləri üçün keyfiyyət, layihənin idarə edilməsinin tətbiqi mexanizmləri, layihələri idarəetmə mütəxəssisi imtahanına hazırlıqdır.