ELM VƏ TƏHSİL


Bakı Slavyan Universiteti Azərbaycan ilə Rusiya arasındakı humanitar əlaqələrin inkişafında xüsusi rol oynayır

Bakı, 28 sentyabr, AZƏRTAC

Ölkəmizdə səfərdə olan “Vahid Rusiya Gənclər Qvardiya”sı Ümumrusiya İctimai Təşkilatının nümayəndə heyəti sentyabrın 28-də Bakı Slavyan Universitetində (BSU) olub.

BSU-dan AZƏRTAC-a bildirilib ki, qonaqlar universitetin “Arzu” rəqs ansamblının təqdimatında slavyan xalqlarının, Azərbaycanın və Türkiyənin milli rəqslərindən ibarət bədii kompozisiya ilə qarşılanıblar.

Görüşdə universitetin rektoru, professor Nurlana Əliyeva BSU-nun yaranma tarixi barədə məlumat verib, Azərbaycanda, o cümlədən rəhbərlik etdiyi ali təhsil ocağında rus dilinin tədrisi və təbliğinin mühüm yer tutduğunu diqqətə çatdırıb. Vurğulanıb ki, Azərbaycan ilə Rusiya arasında əlaqələr ulu öndər Heydər Əliyev prinsipləri əsasında qurulub və bu münasibətlər hazırda dövlətlərimizin başçıları tərəfindən inkişaf etdirilir. Rektor ölkələrimiz arasında elmi, iqtisadi və humanitar əlaqələrin möhkəmləndirilməsi istiqamətindəki xidmətlərinə, yüksək hazırlıqlı mütəxəssislər yetişdirilməsi üçün müvafiq şəraitin yaradılmasında göstərdiyi qayğıya görə 2001-ci ildə Rusiya Federasiyasının Prezidenti Vladimir Putinə BSU-nun fəxri doktoru adı verildiyini xatırladıb. Qeyd edilib ki, Azərbaycan xalqı uzun illər rus dili vasitəsilə Avropa və dünya ədəbiyyatı ilə tanış olub. Eyni zamanda, Azərbaycan ədəbiyyatı və mədəniyyəti rus dili vasitəsilə dünyaya tanıdılıb.

N.Əliyeva Prezident İlham Əliyevin və Azərbaycan Respublikasının Birinci vitse-prezidenti Mehriban Əliyevanın çıxışlarında BSU-nun ölkələrimiz arasındakı humanitar əlaqələrin inkişafında xüsusi rol oynaması barədə fikirlərini xatırladıb. Bildirilib ki, universitetin əsas amalından biri də bu etimadı doğrultmaqdır. Rusistikanın ən yaxşı ənənələrini Qafqaz regionunda qoruyub saxlamağa və inkişaf etdirməyə qadir olan BSU-da Sankt-Peterburq və Moskva mərkəzləri, həmin şəhərlərdə isə Azərbaycan dili, ədəbiyyatı, mədəniyyəti ilə bağlı mərkəzlər fəaliyyət göstərir.

“Vahid Rusiya Gənclər Qvardiya”sı Ümumrusiya İctimai Təşkilatının Tatarıstan regional şöbəsinin rəhbəri Dinar Bariyev BSU-da rus dilinin tədrisinə xüsusi diqqət ayrıldığına görə universitetin rəhbərliyinə minnətdarlığını bildirib. O, Azərbaycan-Rusiya əlaqələrindən, bu ölkələrin gənclərinin sıx əməkdaşlıq etmələri üçün geniş imkanların olmasından danışıb.

Sonra qonaqlar universitetdəki Sankt-Peterburq və Moskva mərkəzləri ilə tanış olub, F.Dostoyevski, A.Çexov və L.Tolstoyun yubileyləri ilə bağlı BSU-da silsilə tədbirlərin təşkili barədə müzakirələr aparıblar.

Daha sonra rusiyalı qonaqlar BSU-da rus dili ixtisası üzrə təhsil alan tələblərlə görüşüblər.

Görüşdə BSU-da fəaliyyət göstərən “Azərbaycanda rus dili və ədəbiyyatı” jurnalının rəhbəri, professor Flora Naciyeva qeyd edib ki, bu dərgi ölkəmizdə rus ədəbiyyatı və mədəniyyətinin xalqımızın ictimai-mədəni həyatında yerini, xalqlarımız arasında tarixi və müasir əlaqələri və s. məsələləri əhatə edir, gündəmdə saxlayır. O deyib: “Təsadüfi deyil ki, yüksək elmi səviyyəyə malik bu dövri nəşr Azərbaycanın, Rusiyanın elm və təhsil mərkəzlərinə, dövlət qurumlarına, elm və mədəniyyət xadimlərinə, slavyan ölkələrinin universitetlərinə göndərilir”.

Sonda BSU-dakı Moskva mərkəzinin fəaliyyətini əks etdirən videoçarx nümayiş olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.