İQTİSADİYYAT


Bakıda Beynəlxalq ClimateLaunchpad startap proqramına start verilib

Bakı, 2 avqust, AZƏRTAC

Azərbaycan startapı qlobal proqramın qalibi olmaq uğrunda 4 mərhələdə mübarizə aparacaq.

Bu barədə AZƏRTAC-a Rəqəmsal İnkişaf və Nəqliyyat Nazirliyinin tabeliyində olan İnnovasiya və Rəqəmsal İnkişaf Agentliyindən bildirilib.

Məlumata əsasən, agentliyin əsas tərəfdaşı olduğu və “Social Innovation Lab” innovasiya mərkəzinin təşkilati dəstəyi ilə dünyanın ən böyük "cleantech" (təmiz texnologiyalar) akselerasiya proqramı olan “ClimateLaunchpad” 2022-nin milli mərhələsinə start verilib.

Altı həftəlik koçinq sessiyalarında iştirak edən Aqua Trap, Ateshgah, Ecoprint, GreenPack, OchseMoto, PORESO, Recepta, RestyIEarth və eHelpers adlı startaplar yerli ekspertlər tərəfindən ClimateLaunchpad-ın müəyyən etdiyi vacib 6 modul üzərində praktiki çalışmaqla ölkə finalına hazırlaşırlar.

Qeyd olunub ki, cari ilin dekabr ayında komandalar münsiflər heyəti qarşısında milli mərhələnin ilk 3 yerini qazanmaq və regional mərhələyə vəsiqə əldə etmək üçün təqdimatlarla çıxış edəcəklər. Ümumilikdə, beynəlxalq proqramda iştirak edən 50-dən çox ölkənin hər birinin ölkə finalında ilk 3 yeri qazanan komandalar 2022-ci ilin sentyabr ayında keçiriləcək Regional Finala vəsiqə qazanmaq uğrunda yarışacaqlar.

Dünya Finalı mərhələsində startaplar innovativ həllərini Avropanın qabaqcıl investorları və sahibkarları qarşısında təqdim edəcəklər. Finalın qalibləri I yer üzrə 10000 avro, II yer üzrə 5000 avro və III yer üzrə 2500 avro pul mükafatı əldə edəcəklər. Həmçinin 16 ən yaxşı startap 6 aylıq "Qlobal ClimateLaunchpad Accelerator" proqramına qəbul olunacaq.

Sözügedən layihə ilə bağlı İnnovasiya və Rəqəmsal İnkişaf Agentliyinin müşaviri Ağahüseyn Əhmədov bildirib: “Bütün dünyanın diqqətinin ekoloji problemlərin həll edilməsinə kökləndiyi bir vaxtda Azərbaycanlı gənclərin də planetimizin müdafiəsinə yönəlmiş innovativ ideyalarla çıxış etməsi sevindiricidir. “Təmiz texnologiyalar”, onların təşviqi və tətbiqi kifayət qədər inkişaf potensialı olan, uzun müddətdə həm iqtisadiyyata, həm də ekologiyaya ciddi qatqılar verə biləcək sahədir. Ümid edirik ki, bu proqram yerli startaplara möhkəm və uğurlu beynəlxalq genişlənmə strategiyaları qurmalarına yardım edəcək”.

Ötən 4 ildə 50-dən çox ölkənin iştirak etdiyi “ClimateLaunchpad” proqramında Azərbaycandan hər il 13 startap olmaqla, ümumilikdə 52 startap akselerasiya proqramını uğurla başa vurub.

Ümumilikdə, son 4 ildə 12 startap hər il dünya finalında Azərbaycanı təmsil edib. 2017-ci ildə ölkə finalının qalibi olmuş “CO2Catalyser” startapı həm də dünya finalında 105 startap arasında ən yaxşı 15 startapdan biri olmağa nail olub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.