CƏMİYYƏT
Bakıda “Uşaq hüquqları: bərabər imkanlar” mövzusunda “dəyirmi masa” keçirilib
Bakı, 20 noyabr, AZƏRTAC
Noyabrın 20-də Ailə, Qadın və Uşaq Problemləri üzrə Dövlət Komitəsi BMT-nin Uşaq Fondu (UNICEF) ilə birgə “Uşaq hüquqları: bərabər imkanlar” mövzusunda “dəyirmi masa” keçirib.
AZƏRTAC xəbər verir ki, tədbirdə dövlət və qeyri-dövlət qurumlarının nümayəndələri, istedadlı uşaqlar iştirak ediblər.
Tədbirdə Ailə, Qadın və Uşaq Problemləri üzrə Dövlət Komitəsinin sədri Hicran Hüseynova 20 noyabr - Ümumdünya Uşaq Günü münasibətilə iştirakçıları təbrik edib. O bildirib ki, Ümumdünya Uşaq Günü 1954-cü ildən BMT Baş Assambleyasının təşəbbüsü ilə bütün dünyada qeyd edilir. Baş Assambleya, həmçinin 1959-cu il noyabrın 20-də Uşaq hüquqları Bəyannaməsini, 1989-cu ilin həmin günündə isə Uşaq Hüquqları haqqında Konvensiyanı qəbul edib. Hazırda uşaq hüquqlarının müdafiəsi dünyada ən aktual məsələlərdən biridir. Çünki müasir dünyada uşaq hüquqları müxtəlif şəraitlərdə pozulur. Evdə, məktəbdə, müəssisələrdə və icmalarda uşaqlar fiziki və psixoloji təzyiqlərə məruz qalırlar. Əfsuslar olsun ki, hazırda dünyada uşaqların hüquqlarının qorunması arzuolunan səviyyədə deyil. Burada bir çox problemlər mövcuddur. Münaqişə zonaları, müharibələr uşaqların həyatına mənfi təsir göstərir, onların gələcək həyatına zərbə vurur.
Azərbaycanın bir çox beynəlxalq konvensiyalara qoşulduğunu qeyd edən Komitə sədri deyib: “Nəzərə almaq lazımdır ki, uşaq hüquqlarının qorunması təkcə dövlətin deyil, həm də cəmiyyətin və hər bir ailənin işidir. Dövlətimizin də bu istiqamətdə uşaq siyasəti var. Daim uşaq problemləri dövlətin diqqət mərkəzindədir. Bu istiqamətdə müxtəlif qanunlar qəbul edilib, fərmanlar imzalanıb. Bundan başqa, ölkəmizdə müəyyən uşaq qurumları da fəaliyyət göstərir. Bütün bunların əsasında uşaqların hüquqlarının qorunması, təhsilə çıxışı, sosial problemləri, istedadlı uşaqların imkanlarının genişləndirilməsi və s. kimi məsələlər durur. Azərbaycan bu sahədə mühüm tədbirlər həyata keçirib və keçirməkdədir. Ölkəmizdə təşkil edilən uşaq forumları, mühüm beynəlxalq uşaq tədbirlərinin keçirilməsi artıq bir ənənəyə çevrilib”.
UNICEF-in Azərbaycandakı Nümayəndəliyinin rəhbəri Edvard Karvard tədbirdə çıxış edərək Uşaq Hüquqları Konvensiyası barədə danışıb. Bildirib ki, BMT tərəfindən qəbul edilən bu sənəd dünyanın hər bir yerində yaşayan uşaqların Konvensiya ilə müəyyən olunmuş hüquqlarını təmin edir. Konvensiya uşaqların yaşaması və inkişafı üçün zəruri olan minimum standartları müəyyənləşdirir. Konvensiyanı ratifikasiya etmiş bütün dövlətlər bu öhdəlikləri yerinə yetirməlidirlər. Bu Konvensiya uşaqların hüquqlarını təmin edən birinci universal kodeksdir. Konvensiyaya əsasən uşaqlar iqtisadi, sosial, mədəni və hətta siyasi hüquqlara malikdirlər.
Azərbaycan Respublikasının İnsan Hüquqları üzrə Müvəkkili (Ombudsman) Elmira Süleymanova uşaqları bu əlamətdar gün münasibətilə təbrik edib. Ombudsman deyib ki, noyabrın 20-si bütün dünyada Ümumdünya Uşaq Günü kimi qeyd olunur. Ölkəmizdə keçirilən tədbirlər uşaq hüquqlarının təbliğinə, hüquq düşüncəsinin, hüquq mədəniyyətinin inkişaf etdirilməsinə, uşaq hüquqlarının müdafiəsinə və onların problemlərinin həllinə öz töhfəsini verir.
Uşaq Hüquqları Konvensiyasının yaranma tarixi barədə də söz açan Elmira Süleymanova Konvensiyanın məqsədi, eləcə də Azərbaycan Respublikasının Konstitusiyasında, Uşaq Hüquqları haqqında Qanunda və digər milli qanunvericilik aktlarında nəzərdə tutulmuş hüquq və vəzifələr, uşaq hüquqlarının müdafiə mexanizmləri barədə məlumat verib.
Ombudsman çıxışında ümummilli lider Heydər Əliyevin hər zaman uşaqları diqqətdə saxladığını, onların hüquqlarının müdafiəsi istiqamətində mühüm addımlar atdığını diqqətə çatdırıb. Bildirib ki, Prezident İlham Əliyev tərəfindən uşaqların sağlamlığına, təhsilinə, layiqli vətəndaş kimi hərtərəfli inkişafına yönəlmiş tədbirlər həyata keçirilir, bu istiqamətdə uğurlu islahatlar aparılır. Elmira Süleymanova vurğulayıb ki, ölkəmizin Birinci vitse-prezidenti, Heydər Əliyev Fondunun prezidenti Mehriban Əliyevanın da həyata keçirdiyi sosial layihələr, gördüyü dəyərli işlər uşaqların inkişafına, rifah hallarının yüksəldilməsinə xidmət edir.
Ailə, Qadın və Uşaq Problemləri üzrə Dövlət Komitəsinin əməkdaşı Təbriz Əliyev videoçarx əsasında tədbirdə iştirak edən qonaqlara 20 noyabr - Ümumdünya Uşaq Günü və Uşaq Hüquqları Konvensiyası barədə geniş məlumat verib.
Daha sonra tədbir iştirakçılarının çoxsaylı sualları cavablandırılıb.