Bakı, 4 iyun, AZƏRTAC

İyunun 4-də Müslüm Maqomayev adına Azərbaycan Dövlət Akademik Filarmoniyasında Mədəniyyət Nazirliyi və Bülbül Fondunun təşkilatçılığı ilə Vokalçıların Bülbül adına VII Beynəlxalq müsabiqəsinin açılış mərasimi olub. Tədbir iştirakçıları əvvəlcə Bülbülün şəhərin mərkəzində ucaldılan abidəsi önünə gül dəstələri düzüblər.

AZƏRTAC xəbər verir ki, görkəmli sənətkar Bülbülün anadan olmasının 120 illiyinə həsr edilən tədbirdə mədəniyyət naziri Əbülfəs Qarayev müsabiqənin əhəmiyyətindən danışıb. Bildirilib ki, ölkəmizdə bu sənət yarışının keçirilməsi ənənəyə çevrilib. Nazir deyib: “Hazırda dünyanın opera səhnələrində çıxış edən onlarca ifaçı vaxtilə bu müsabiqənin iştirakçıları olublar. Müsabiqə gənclərin gələcək yaradıcılıq fəaliyyətinə bir qapıdır və açar onların öz əllərindədir. İstedad, bacarıq varsa, onlar öz yollarını tapacaqlar. Əminəm ki, münsiflər heyəti 10-dək ölkəni təmsil edən gənc vokalçıların məharətini ədalətlə qiymətləndirəcək, iştirakçılar isə həm münsiflərin qərarından, həm də qonaqpərvərliyi ilə məşhurlaşmış Bakıdan məmnun qalacaqlar”.

Nazir diqqətə çatdırıb ki, builki müsabiqə Prezident İlham Əliyevin ötən il mayın 11-də imzaladığı “Bülbülün 120 illik yubileyinin keçirilməsi haqqında” Sərəncama uyğun təşkil olunur. Müxtəlif ölkələrin vokal məktəbləri təmsilçilərinin bu tədbirlərdə iştirakı isə yubileyə beynəlxalq status bəxş edir.

Beynəlxalq müsabiqənin ənənəyə sadiq qalaraq bu dəfə də dünya opera ifaçılığı sənətinə dəyərli töhfələr verəcəyini, iştirakçıların yaradıcılıq taleyinə müsbət təsir göstərəcəyini deyən nazir onlara uğurlar arzulayıb.

Bülbül Fondunun prezidenti, Azərbaycanın Rusiyadakı səfiri, Xalq Artisti Polad Bülbüloğlu müsabiqənin bütün regionun mədəni həyatında böyük hadisə, gənc ifaçılar üçün bir imkan olduğunu qeyd edib. O deyib: “Bülbül ailəsi adından Prezident İlham Əliyevə dərin təşəkkürümü bildirirəm ki, Bülbülün 120 illik yubileyinin keçirilməsi ilə bağlı Sərəncam imzalayıb. Müsabiqənin əsası isə ümummilli liderimiz Heydər Əliyev tərəfindən qoyulub. Mədəniyyət Nazirliyi də öz növbəsində böyük işlər görüb. Tədbirin təşkilində əməyi olan hər kəsə təşəkkür edirəm”.

Bülbül Fondunun prezidenti indiyədək keçirilmiş müsabiqələrin tarixi barədə məlumat verib, münsiflər heyətinə başçılıq etmiş İrina Arxipova, Yevgeni Nesterenko kimi dünya şöhrətli vokalçıların əməyini xatırladıb.

Bakıda keçirilən təntənəli müsabiqədə iştirak etməkdən məmnunluğunu bildirən beynəlxalq münsiflər heyətinin sədri, Rusiya Federasiyasının Xalq Artisti, professor Sergey Leyferkus sənət yarışması haqqında fikirlərini bölüşüb. O vurğulayıb ki, bütün istedadını və zəhmətini həm Azərbaycan, həm də dünya mədəniyyətinin inkişafına həsr etmiş dahi sənətkar Bülbülə həsr olunan müsabiqə özlüyündə əlamətdar hadisədir.

Sonra münsiflər heyətinin üzvləri iştirakçılara təqdim edilib.

Bildirilib ki, müsabiqə iştirakçılarının ifalarını musiqi mədəniyyətinin görkəmli nümayəndələri - münsiflər heyətinin sədri, Rusiya Federasiyasının Xalq Artisti, professor Sergey Leyferkus, Azərbaycandan SSRİ Xalq Artisti, professor Fərhad Bədəlbəyli, Gürcüstanın Xalq Artisti, professor Teymuraz Ququşvili, Ukraynadan SSRİ Xalq Artisti, professor Mariya Stefyuk, Rusiya Akademik Böyük Teatrının gənclər proqramının rəhbəri, Əməkdar İncəsənət Xadimi Dmitri Vdovin, Almaniyadan beynəlxalq opera müsabiqələrinin prezidenti Hans-Yoahim Fray qiymətləndirəcəklər. Azərbaycan professional vokal məktəbinin banisi, görkəmli müğənni, tədqiqatçı-alim və pedaqoq, tanınmış ictimai xadim, SSRİ Xalq Artisti, SSRİ Dövlət mükafatı laureatı Bülbülün adını daşıyan müsabiqədə Azərbaycan, Türkiyə, Rusiya, Ukrayna, Qazaxıstan, Moldova, Monqolustan, Özbəkistan və Gürcüstandan gənc istedadlı vokalçılar iştirak edirlər.

Tədbir müsabiqənin birinci turunun dinləmələri ilə davam edib. Müsabiqənin ilk turunda 10 ölkədən 79 vokalçı çıxış edir.

Qeyd edək ki, müsabiqənin seçim turları iyunun 7-dək Azərbaycan Dövlət Akademik Filarmoniyasında olacaq. İyunun 4-dən 6-dək müsabiqənin I və II turları, iyunun 7-də isə Üzeyir Hacıbəyli adına Azərbaycan Dövlət Simfonik Orkestrinin müşayiəti ilə III tur keçiriləcək.

Bülbülün anadan olmasının 120 illiyinə həsr edilən yubiley gecəsi iyunun 8-də Heydər Əliyev Sarayında, iyunun 9-da isə Gəncə Dövlət Filarmoniyasında təşkil olunacaq.