İDMAN


Bakıda keçirilən yelkənli qayıq yarışının qalibləri müəyyənləşib

Bakı, 11 may, AZƏRTAC

“Azərbaycan Xəzər Dəniz Gəmiçiliyi” QSC (ASCO) və Azərbaycan Yelkənli İdman Federasiyasının (AYİF) birgə təşkilatçılığı ilə ümummilli lider Heydər Əliyevin anadan olmasının 96-cı ildönümünə həsr olunmuş yelkənli qayıq yarışı (“Baku Sailing Regatta-2019”) keçirilib.

AZƏRTAC xəbər verir ki, ASCO-nun mətbuat katibi Mehman Mehdiyevin sözlərinə görə, ümumilikdə, 30 yelkənçinin iştirak etdiyi reqatada idmançılar dörd sinif (“Optimist”, “Laser-standard”, “Laser-radial”, “Laser 4.7”) üzrə yarışıblar. Onlar “Azərbaycan Xəzər Dəniz Gəmiçiliyi” QSC-nin “Xəzər”, "CMS properties" şirkətinin “Dənizçi” idman klubları, Azərbaycan Yelkənli İdman Federasiyasının üzvləridirlər.

Mehman Mehdiyev bildirib ki, yarışın təşkilində məqsəd idmanın bu növünə marağı artırmaq və sağlam həyat tərzini gənclər arasında təbliğ etməkdir.

Həmçinin yarış çərçivəsində Dənizkənarı Milli Parkda müxtəlif əyləncəli proqramlar, oyunlar və viktorinalar da keçirilib.

Qaliblər yerli və beynəlxalq hakimlər tərəfindən müəyyənləşdirilib. I, II və III yerlərin sahibləri mükafatlandırılıb.

Mükafatları gənclər və idman nazirinin müavini İsmayıl İsmayılov, Bakı şəhər Gənclər və İdman Baş İdarəsinin rəisi Raqif Abbasov, “Azərbaycan Xəzər Dəniz Gəmiçiliyi” QSC-nin sədrinin müavinləri Nəzrəddin Əhmədzadə və Cəbrayıl Mahmudlu, Azərbaycan Yelkənli İdman Federasiyasının prezidenti Qüdrət Qurbanov təqdim edib.

“Optimist” sinfi üzrə ümumi yarışda I, II və III yerləri müvafiq olaraq AYİF-in üzvləri Murad Hacızadə, Ayla Babayeva və Kristina Kərimova tutublar. "Optimist" sinfi üzrə qızlar arasında yarışda isə Ayla Babayeva, Kristina Kərimova və Fidan Ağazadə ilk üçlükdə təmsil olunublar. “Laser-standard” sinfi üzrə “Xəzər” idman klubunun üzvü Mixail Protasov, "Dənizçi" idman klubunun üzvü Nikita Vilayev və "Xəzər" klubunun üzvü Roman Fərruxov müvafiq olaraq I, II və III yerlərə layiq görülüblər. “Laser 4.7” sinfi üzrə I, II və III yerləri AYİF-in üzvləri İsmayıl Kərimov, Murad Allahverdi və Fəqan Məmmədzadə qazanıblar. “Laser-radial” sinfi üzrə AYİF-in üzvü Cavid Kərimov I yeri, “Xəzər” idman klubunun üzvləri Vaqif Qasımov və Rauf Abdullayev II və III yeri tutublar.

Azərbaycan Yelkənli İdman Federasiyasının prezidenti Qüdrət Qurbanov qalibləri təbrik edib, gələcək yarışlarda uğurlar arzulayıb.

Qeyd edib ki, ulu öndər Heydər Əliyevin anadan olmasının 96-cı ildönümünə həsr olunan bu yarış ənənə halını alacaq. Gənclərin və azyaşlıların bu idman növünə maraq göstərməsi də yelkənli qayıq yarışının əhəmiyyətini artırır.

Yelkənli qayıq yarışı ikinci ildir ki, təşkil olunur. Keçirilən reqata həm paytaxt sakinlərinin, həm də turistlərin böyük marağına səbəb olub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.