Balakən, 15 oktyabr, Mustafa Dadaşov, AZƏRTAC

Oktyabrın 15-də Balakən şəhərinin B.Səmədov küçəsində 44 günlük Vətən müharibəsində şəhidlik zirvəsinə ucalan Kamal Məmmədovun xatirəsinə inşa edilən bulaq kompleksinin açılışı olub.

Bu münasibətlə keçirilən mərasimdə rayon icra hakimiyyətinin rəsmiləri, hüquq-mühafizə orqanlarının, idarə, müəssisə və təşkilatların rəhbərləri, ictimaiyyət nümayəndələri, şəhidin yaxınları iştirak ediblər.

Rayon icra hakimiyyətindən AZƏRTAC-ın bölgə müxbirinə bildirilib ki, mərasimin əvvəlində Dövlət Himni səsləndirilib, ərazi bütövlüyümüz uğrunda canlarından keçən şəhidlərin xatirəsi bir dəqiqəlik sükutla yad olunub.

Mərasimdə rayon icra hakimiyyəti başçısının birinci müavini Turan Dibirov çıxış edərək, Vətən müharibəsində Müzəffər Ali Baş Komandan İlham Əliyevin rəhbərliyi ilə Azərbaycan Ordusunun işğal altındakı torpaqlarımızı azad etdiyini, bu möhtəşəm Qələbənin şəhidlərimizin qanı, canı bahasına əldə edildiyini bildirib, ölkəmizin ərazi bütövlüyü uğrunda gedən döyüşlərdə şəhid olmuş qəhrəman Vətən övladlarının xatirəsinin həmişə ehtiramla yad olunacağını vurğulayıb.

Digər çıxış edənlər 44 günlük Vətən müharibəsində Müzəffər Ali Baş Komandan İlham Əliyevin rəhbərliyi ilə qazanılan tarixi Qələbədən danışıb, Kamal və onun kimi şəhidlərimizin qanının yerdə qalmadığını, erməni silahlı qüvvələrinin darmadağın edilərək torpaqlarımızın azad olunduğunu diqqətə çatdırıblar.

Sonra məktəblilər vətənpərvərlik mövzusunda şeirlər söyləyiblər.

Şəhidin ailə üzvləri göstərilən diqqət və qayğıya görə ölkə rəhbərliyinə minnətdarlıqlarını bildiriblər.

Tədbir iştirakçıları daha sonra rayon Şəhidlər xiyabanında Kamal Məmmədovun məzarını ziyarət edib, üzərinə gül-çiçək düzüblər.

Qeyd edək ki, Kamal Məmmədov 1998-ci il iyulun 30-da Balakən rayonunun Qullar kəndində anadan olub. O, 2015-2019-cu illərdə Azərbaycan Texniki Universitetinin “Maşınqayırma və robototexnika” fakültəsində ali təhsil alıb. Azərbaycan Silahlı Qüvvələrinin əsgəri olan Kamal Məmmədov 2020-ci il sentyabrın 27-də torpaqlarımızın işğaldan azad olunması uğrunda başlanan Vətən müharibəsi zamanı Talış kəndi və Suqovuşanın azadlığı uğrunda gedən döyüşlərdə iştirak edib. Kamal Məmmədov oktyabrın 16-da Suqovuşan istiqamətində gedən döyüşlər zamanı qəhrəmancasına şəhid olub, Balakən şəhərindəki Şəhidlər xiyabanında torpağa tapşırılıb.

Azərbaycanın ərazi bütövlüyünün təmin edilməsi uğrunda döyüşlərdə göstərdiyi igidliyə görə Prezident İlham Əliyevin müvafiq Sərəncamına əsasən Kamal Məmmədov ölümündən sonra “Vətən uğrunda” və “Suqovuşanın azad olunmasına görə” medalları ilə təltif edilib.