Bakı, 15 dekabr, AZƏRTAC

COVID-19-a qarşı peyvəndləmə prosesinin qlobal neft tələbatına təsirlərini müşahidə etmək bir neçə ay çəkəcək.

AZƏRTAC xəbər verir ki, bu barədə Beynəlxalq Enerji Agentliyinin (IEA) neft bazarına dair aylıq hesabatında deyilir.

Bildirilir ki, bəzi ölkələrdə yeni növ koronavirus epidemiyasına qarşı peyvəndlərin tətbiqinə başlanması və peyvəndin asanlıqla əldə ediləcəyi il bağlı gözləntilər qlobal iqtisadi fəaliyyətin gözləniləndən daha tez normallaşma prosesinə qədəm qoyacağına dair ümidləri artırıb. Peyvənd kampaniyalarının təsiri ilə qlobal ümumi daxili məhsulun gələn ilin sonuna qədər pandemiyadan əvvəlki səviyyəyə qayıtması gözlənilsə də, IEA bunun neft tələbatında əksinin bir neçə ay çəkəcəyini bildirib. 2021-ci il üzrə qlobal neft tələbatı proqnozu da təyyarə yanacağı və kerosin tələbatındakı azalma gözləntiləri səbəbindən aşağı salınıb: “Neft qiymətlərindəki bahalaşma bir çox ölkədə başlanan peyvənd proqramlarının təsiri ilə qismən izah olunur. Bununla belə, peyvənd olunmuş, iqtisadi cəhətdən aktiv əhali sayına çatmaq və bunun da neft tələbatına təsirini hiss etməyimiz bir neçə ay çəkəcək”.

İlin sonuna doğru yeni bir tətil dövrünün yaxınlaşdığına da işarə edən IEA bu müddətdən sonra COVID-19-a yoluxma hadisələrində yeni artımların ola biləcəyini və buna görə yeni məhdudlaşdırma tədbirlərinin tətbiq oluna biləcəyini vurğulayıb.

ABŞ qasırğa səbəbindən neft hasilatındakı məhdudiyyətlərin geridə qalması və Liviyada istehsalın artması səbəbindən qlobal neft tədarükü noyabr ayında 1,5 milyon barrel artaraq gündəlik orta hesabla 92,7 milyon barrelə çatıb.