Bakı, 14 noyabr, AZƏRTAC

Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə şanlı Ordumuz tərəfindən tarixi şəhərimizin, Qarabağın tacı olan əzəli torpağımız qədim Şuşanın işğaldan azad edilməsinin ardınca böyük Qələbənin qazanılması Azərbaycan xalqının tarixində yeni bir əbədi tarix yazdı. Bu Qələbə Azərbaycan xalqının əzəli və tarixi, dədə-baba yurdlarının 30 ildən sonra azad edilməsini reallaşdırdı, 1 milyona yaxın soydaşımızın çoxillik Vətən həsrətinə və nisgilinə son qoydu.

Prezident İlham Əliyevin bu tarixi Qələbənin qazanılmasında nümayiş etdirdiyi qətiyyətli mövqeyi xalqımıza, o cümlədən hər birimizə böyük sevinc və qürur hissi yaşatdı. Azərbaycan Ordusunun qəhrəman əsgər, çavuş, gizir, zabit və generallarının yüksək peşəkarlığa, qibtə olunacaq Vətən sevgisinə malik olduğunu bütün dünyaya əyani şəkildə göstərdi və sübut etdi. Digər tərəfdən, əsrlərlə yalanı, riyakarlığı dövlət strategiya və taktikasının əsası hesab edən mənfur Ermənistanın, onun qaniçən, ikiüzlü rəhbəri Nikol Paşinyanın və erməni xalqının iç üzünü bütün dünyaya göstərdi.

Bu fikirləri AZƏRTAC-a açıqlamasında Milli Məclisin deputatı Səbinə Xasayeva bildirib.

Deputatın sözlərinə görə, beynəlxalq ictimaiyyət nəhayət anladı ki, Azərbaycan xalqı haqq işi uğrunda apardığı mübarizədə tam haqlıdır. Eyni zamanda, bu Qələbədən sonra Birləşmiş Millətlər Təşkilatının, ATƏT-in və bir sıra nüfuzlu beynəlxalq təşkilatların haqqın, ədalətin qorunmasında və bərpasında qeyri-fəal və bitərəf qaldığını, bir çox hallarda isə haqqı nahaqqa verdiklərini tam sübut etdi. Həmçinin regional problemlərin həllində qonşu ölkələrin oynadığı mühüm rolu önə çəkdi. Bu zəfər, habelə dünyada artmaqda olan böhranların və regional toqquşmaların müsbət həllində Türkiyə-Rusiya münasibətlərinin əvəzolunmaz rolunu və dəyişməz mövqeyini əsaslı şəkildə təsdiq etdi.

“Üçrəngli bayrağımızın 44 gün ərzində Cəbrayılda, Füzulidə, Zəngilanda, Qubadlıda, Şuşada və ən mühüm strateji yüksəkliklərimizdə dalğalanması Müzəffər Ali Baş Komandan İlham Əliyevin yüksək və məğlubedilməz sərkərdəlik qabiliyyətinin, ordumuzun, xalqımızın qırılmaz gücünün, möhkəm iradəsinin, birliyinin və vəhdətinin çox parlaq və sönməz bir nümunəsidir. Heç şübhəsiz, bu şanlı, tarixi Qələbənin böyük əhəmiyyəti və əvəzolunmaz yeri qədirbilən xalqımız tərəfindən həmişə yüksək qiymətləndiriləcək, tarixdə əbədi qalacaq və heç vaxt unudulmayacaq”, - deyə S.Xasayeva vurğulayıb.

Deputat bildirib ki, Prezident İlham Əliyev bir neçə gün əvvəl Mərkəzi Tibbi Klinikada müalicə olunan hərbi qulluqçularımızla görüşündə qeyd etdiyi kimi, bu Qələbənin qazanılmasında şanlı və qəhrəman Azərbaycan əsgər və zabitlərinin əvəzsiz rolu danılmazdır. Ona görə də bütün Azərbaycan xalqı Vətənin xilaskarı olan bu insanları həmişə minnətdarlıq hissi ilə xatırlayacaq, dövlətimiz onların müalicə edilib tez bir zamanda sağalması və dinc həyata qayıtması üçün hər şeyi edəcəkdir.

Səbinə Xasayeva hazırda Ermənistanda mövcud vəziyyət və beynəlxalq təşkilatların buna münasibətindən də danışıb. O deyib: “Ermənistandan işğal altındakı torpaqları geri qaytarmağı tələb etdiyi üçün illərdir Azərbaycan Prezidentinə qarşı xarici mediada hədyanlar yazanların, bunu sifariş edənlərin əsl kimlikləri, simaları bu gün ortadadır. Onlar işğalçı Ermənistanın xilası üçün açıq şəkildə və utanmadan hər şey edirlər. Belələri Bərdə, Gəncə və digər şəhərlərimizdə mülki insanlara qarşı Ermənistanın müharibə cinayətlərindən danışmaq əvəzinə, Azərbaycana və onun Liderinə qarşı uydurmalarını davam etdirirlər. Bu gün bir sıra Qərb ölkələrinin, o cümlədən Fransanın, Kanadanın Ermənistana dəstək bəyanatları onların hakim dairələrinin həqiqi simalarını və mahiyyətini aydın əks etdirir”.

S.Xasayeva bildirib ki, müharibədə sarsıdıcı məğlubiyyətə uğramış Paşinyan iqtidarı ölkə daxilində baş qaldıran narazılıq və xalq qəzəbini söndürmək üçün amansız repressiyalara başlayıb, amma Qərb bunu görmür. Ermənistanda vətəndaşların dinc etiraz aksiyalarını qeyri-mümkün edən yüksək cərimələr tətbiq olunur. Ölkədə hakimiyyəti, hətta bələdiyyələri belə tənqidə görə 1200 avro cərimə tətbiq edilir. Buna görə sosial şəbəkə istifadəçiləri və jurnalistlər hakimiyyətin özbaşınalığı və cinayətlərini açıq şəkildə tənqid edə bilmirlər. Müharibə zamanı rusiyalı jurnalist Oleq Kaşin Qarabağda və Ermənistanda baş verən hadisələr haqqında həqiqəti yazdığı üçün onun akkreditasiyası ləğv olunub və ölkədən çıxarılıb. Amma beynəlxalq jurnalist təşkilatları yenə susublar. Bu gün regionda yaşanmış müharibə və dağıntılara görə təkcə Paşinyan yox, onu hakimiyyətə gətirən, bütün cinayətlərinə göz yuman Qərb dairələri və təşkilatları da məsuliyyət daşıyırlar.

“Doğma torpaqlarımızın düşmən tapdağından azad olunması Azərbaycan xalqının ərazi bütövlüyümüzü bərpa etməklə siyasi-iqtisadi qüdrətini ölçüyəgəlməz dərəcədə artırmağa və yüksəltməyə imkan verəcək. Qarabağ dövlətimizin gücü və qüdrəti sayəsində tezliklə beynəlxalq ticarət və turizm mərkəzinə çevriləcək”, - deyə deputat qeyd edib.