Lənkəran, 18 iyun, Bağır Əliyev, AZƏRTAC

Sürətlə inkişaf edən Azərbaycanda turizm sahəsinin inkişafına xüsusi önəm verilir, dövlətimiz tərəfindən bu sahədə kompleks tədbirlər həyata keçirilir. Ölkəmizdə hər il beynəlxalq səviyyəli tədbirlərin keçirilməsi respublikamızın turizm potensialını bütün dünyaya tanıdır.

AZƏRTAC xəbər verir ki, Azərbaycanın turizm məkanlarından biri olan cənub bölgəsində də bu sahədə mühüm işlər görülüb. Bölgənin turizm və istirahət mərkəzləri yay turizm mövsümünə tam hazırdır.

Əvvəlki illərdən fərqli olaraq cənub bölgəsində yay turizm mövsümü bu il mart ayından başlayıb. Mart ayından başlayaraq ölkəmizə, eləcə də cənub bölgəsinə böyük turist axını olub.

2007-ci ildə Lənkərana gələn turistlərin sayı 4700 nəfər olmuşdusa 2016-cı ildə bu rəqəm 15 mini ötüb. Bu ilin 5 ayında isə rayona gələn turistlərin sayı 6 mindən çox olub. Onlardan 15 faizi xarici turistlərdir.

Astarada turizmin inkişafı məqsədilə həyata keçirilən infrastruktur layihələr rayona turistlərin axına səbəb olub. Ötən il rayona gələn turistləri sayı 5000 nəfəri ötüb. Bu, 2012-ci illə müqayisədə 10 dəfə çoxdur.

İyunun 8-də Azərbaycan Prezidentinin Astara şəhərində park-bulvar kompleksinin genişləndirilməsi ilə bağlı imzaladığı Sərəncam cənub bölgəsində turizmin inkişafına göstərilən diqqət və qayğının bariz nümunəsidir.

Masallıya gəldikdə isə, ötən il bu rayona 24730 turist səfər edib ki, onlardan da 1600-ü xarici olub. Bu ilin birinci rübündə isə rayona 4200 turist gəlib. Onlardan 500-dən çoxu əcnəbilərdir.

Lənkəran Turizm İnformasiya Mərkəzi cənub bölgəsinin turizm potensialının təbliği sahəsində müxtəlif səpkili tədbirlər həyata keçirib.

Mərkəzin direktoru İlqar Əzimov bildirib ki, ingilis və Azərbaycan dillərində Lənkəranın turizm potensialını əks etdirən nəfis şəkildə hazırlanmış buklet, flayer və digər çap materialları hazırlanaraq sərgilərdə nümayiş olunub, turistlərə təqdim olunmaq üçün rayonda yerləşən mehmanxana və mehmanxana tipli obyektlərə, muzeylərə və Heydər Əliyev Mərkəzinə paylanılıb.

Eyni zamanda, rayonun turizm potensialını təbliğ edən orijinal flayer və təqvim, Lənkəranın turist marşrut xəritəsi hazırlanaraq gələn qonaqlara verilib. Hazırda isə cənub bölgəsinin turist xəritəsi üzərində iş gedir.

Aprelin 6-9-da Bakı şəhərində təşkil olunmuş turizm və səyahətlər sərgisində cənub bölgəsində yerli sənətkarlar tərəfindən hazırlanmış milli suvenirlər təqdim olunub. Sərgidən sonra yerli suvenirlərə maraq çoxalıb.

Mayın 6-7-də Lənkəranda keçirilən “Avropa günləri” çərçivəsində rayonun turizm potensialını əks etdirən sərgi də Avropadan olan qonaqların böyük marağına səbəb olub. Heç də təsadüfi deyildir ki, bu tədbirdən sonra bir sıra Avropa ölkəsinin səfirləri Lənkərana səfər edib.

Yeni turizm mövsümünün başlaması ilə bağlı Azərbaycan Respublikası Mədəniyyət və Turizm Nazirliyi və Lənkəran Turizm-İnformasiya Mərkəzinin əməkdaşlarından ibarət işçi qrupu cənub bölgəsində yerləşən turizm və istirahət mərkəzlərində, çimərliklərdə monitorinqlərin aparıldığını qeyd edən İ.Əzimov bölgənin turizm və istirahət mərkəzlərinin, çimərliklərin yeni mövsümə tam hazır olduqlarını bildirib.

Hazırda cənub bölgəsində 100-ə yaxın mehmanxana və mehmanxana tipli obyekt fəaliyyət göstərir və onların siyahısı ildən ilə artmaqdadır. Bu obyektlərdə göstərilən xidmətin səviyyəsi də beynəlxalq standartlara uyğun təşkil olunub.

Qonşu İran İslam Respublikasından turistlərin bölgəyə cəlb olunması ilə bağlı bir sıra maarifləndirici tədbirlər həyata keçirilib.

Lerik rayonunun “Relax” turizm istirahət mərkəzində İran İslam Respublikasının 35 vilayətinin turizm təmsilçilərinin iştirakı ilə konfrans və infotur təşkil olunub. Tədbir çərçivəsində iranlı qonaqlara cənub bölgəsinin turizm obyektlərinin bukletlet, flayer, vizitka və digər çap materialları paylanılıb.

Turizm İnformasiya Mərkəzi və Regional Miqrasiya Xidmətinin birgə təşkilatçılığı ilə cənub bölgəsində fəaliyyət göstərən mehmanxana və mehmanxana tipli obyektlərin nümayəndələri üçün əcnəbi vətəndaşların Azərbaycan Respublikasına gələrkən qeydiyyat qaydaları ilə bağlı tədbiri təşkil olunub. Tədbir çərçivəsində Miqrasiya Xidmətinin məsul əməkdaşları tərəfindən əcnəbi vətəndaşların otellərə daxil olarkən otellər tərəfindən onların qeydə alınma qaydaları izah olunub.

Turizm İnformasiya Mərkəzi tərəfindən internet resursları, “facebook” və digər sosial şəbəkələr vasitəsilə də cənub bölgəsinin turizm potensialı haqqında geniş məlumatlar verilib. “Qrinviç tour”, “Royal travel” və digər turizm şirkətləri ilə əməkdaşlıq çərçivəsində yerli və əcnəbi turistlər üçün turlar təşkil olunub.

Hazırda Lənkəran, Lerik və Astara rayonlarını əhatə edən turizm marşrutları tam hazırdır.

Mərkəz digər rayonların Turizm İnformasiya Mərkəzləri ilə də sıx əməkdaşlıq edir. Şəki Turizm İnformasiya Mərkəzi tərəfindən göndərilən Almanıyadan olan turistlər üçün Lənkəran və Lerik rayonlarına tur təşkil olunub.

Mərkəz bölgədə fəaliyyət göstərən otellər və turizm obyektləri ilə də sıx əlaqə saxlayır və turizmlə bağlı müxtəlif tədbirlər həyata keçirir.

İlk dəfə olaraq Lənkəranın nəfis şəkildə bələdçi kitabının hazırlanıb. Bölgəyə gələn turistlərin tələbatı nəzərə alınaraq kitab üç dildə - Azərbaycan, ingilis və rus dillərində hazırlanıb.

Bu il cənub bölgəsinə Rusiya Federasiyası və İran İslam Respublikasından olan turistlər daha çox maraq göstərirlər. Əksər mehmanxanalarda iyul ayı üçün Rusiya Federasiyasından olan turistlər tərəfindən sifarişlər qəbul olunub. Lənkəranda fəaliyyət göstərən müasir tipli böyük mehmanxanalarda iyul-avqust ayları üçün bütün otaqlar bron olunub.

Hazırda cənub bölgəsi üzrə Turizm-Rekreasiya Zonasının yaradılması ilə bağlı hazırlıq işləri gedir. Bu zonanın yaradılması isə bölgənin turizm imkanlarından daha səmərəli istifadəsi təmin edəcək.