İQTİSADİYYAT


Cənub Qaz Dəhlizi Azərbaycanın regionda lider mövqeyini daha da gücləndirib

Bakı, 12 fevral, Rauf Hacıyev, AZƏRTAC

Azərbaycan iqtisadiyyatı bu gün özünün inkişaf mərhələsini yaşayır. Artan iqtisadi güc ölkəmizi regional iqtisadiyyatın lokomotivi olaraq dünyanın enerji təhlükəsizliyinin etibarlı tərəfdaşlarından birinə çevirib. Tarixi nailiyyətlərimizdən hesab edilən Cənub Qaz Dəhlizinin sonuncu seqmenti olan TAP layihəsinin də yekunlaşdırılması və bu nəhəng layihənin tam sistem kimi işə salınması Azərbaycanın dünyada etibarlı tərəfdaş kimi rolunu daha da gücləndirir.

AZƏRTAC xəbər verir ki, bunu açıqlamasında Milli Məclisin Təbii ehtiyatlar, energetika və ekologiya komitəsinin üzvü Naqif Həmzəyev bildirib.

Deputat qeyd edib ki, Azərbaycan öz enerji resurslarını boru kəmərləri vasitəsi ilə dünya bazarlarına çıxarmağa nail oldu, eyni zamanda, Avropa və Asiya arasında enerji daşınmalarının mərkəzinə çevrilmək imkanını əldə etdi. Neftini dünya bazarlarına bir neçə ixrac marşrutu ilə çıxaran ölkəmiz indi də hasil etdiyi mavi yanacağı üç möhtəşəm kəmərlə birbaşa Xəzərdən Adriatik dənizinin sahillərinə çatdırır. Ölkəmizin təşəbbüskarı olduğu qlobal layihələr Avropanın enerji xəritəsini yenidən tərtib etməklə yanaşı, Azərbaycanın regionda iqtisadi rolunu yüksəldib, lider mövqeyini daha da gücləndirib. Bu da təbii olaraq Azərbaycan iqtisadiyyatının inkişafına, ölkəmizə xarici valyuta axınının təmin edilməsinə müsbət təsir göstərir.

Fevralın 11-də Cənub Qaz Dəhlizi Məşvərət Şurası çərçivəsində nazirlərin videokonfrans formatında keçirilən VII iclasında Prezident İlham Əliyev çıxışında 7 ölkəni birləşdirən Cənub Qaz Dəhlizi layihəsinin mövcud olan ən yüksək ekoloji standartlara cavab verdiyini qeyd edib. Eyni zamanda, dövlətimizin başçısı bildirib ki, biz misilsiz əməkdaşlıq formatına nail olmuşuq. Düzgün hesablanmış maraqlar balansı var ki, burada istehsalçı olan Azərbaycanın maraqları tranzit və istehlakçı ölkələrin maraqları ilə üst-üstə düşür. Məhz bunun nəticəsində bəzilərinin o qədər də real hesab etmədikləri bir layihənin həyata keçirilməsi mümkün olub.

N.Həmzəyev qeyd edib ki, bu cür qlobal layihələr Cənubi Qafqazda müəyyən iqtisadi, siyasi, geopolitik maraqları olan dövlətlərin, beynəlxalq təşkilatların Azərbaycanın sülhə, təhlükəsizliyə, davamlı tərəqqiyə xidmət edən dövlət siyasətinə olan inamın, etibarın sayəsində reallığa çevrilir. Tarixdə ən böyük enerji təhlükəsizliyi və enerjinin şaxələndirilməsi layihəsi olan Cənub Qaz Dəhlizi Azərbaycanın regionda əsas inkişaf mərkəzi olduğunu bir daha nümayiş etdirdi.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.