CƏMİYYƏT


Cərrah Vüsal Hacıyev: Transplantasiya əməliyyatından sonra orta hesabla 15 il və daha çox yaşamaq mümkündür

Bakı, 13 iyul, AZƏRTAC

“Mənim Almaniya səhiyyəsi ilə tanışlığım sırf təsadüf nəticəsində olub. Çexiyada təhsil aldığım illərdə yaxın qohumlarımızdan birini ürək problemləri ilə əlaqədar Berlinə müalicəyə aparmışdılar. Həmin vaxt mənə zəng edib tərcüməçi kimi onlara yardımçı olmağımı xahiş etdilər. Yay tətili olduğundan Çexiyadan Almaniyaya getdim”, - deyə ürək cərrahı Vüsal Hacıyev söhbət açır. Onun dediyinə görə, bu səfər onda Qərb ölkəsinin səhiyyə sisteminə, müasir texnologiyalardan istifadə bacarığına böyük maraq oyadıb. Berlindəki əməliyyat nəticəsində “əli bu dünyadan üzülən” xəstə məşhur ürək cərrahı Roland Hetzerin apardığı əməliyyatla həyata qaytarılıb. Həmin hadisədən sonra o, təhsilini başa vurduqdan sonra Almaniyaya üz tutmağa qərar verib.

Vüsalın həkim olmaq istəyi isə daha əvvəldən - hələ orta məktəb illərində oxuduğu vaxtlarda başlayıb. Yay tətili vaxtı ailələri ilə birlikdə Türkandakı bağ evlərində istirahət edəndə onu ən çox həyətdəki bitki və canlılar aləmi maraqlandırıb. Tay-tuşları top qovanda, velosiped yarışına çıxanda Vüsal həyətdə öz guşəsinə çəkilib böcək, soxulcan, qurbağa üzərində “əməliyyat aparıb”. Elə bu maraq hissi də onu həkimlik peşəsinin cığırlarına salıb.

Vüsal orta təhsilini əvvəlcə Bakının Sabunçu rayonundakı 72 nömrəli liseydə, sonra isə Şirvan liseyində alıb. 2001-ci ildə dövlət təqaüdü hesabına Çexiyanın Marianske-Lazne şəhərində dil hazırlığı kurslarında oxuyub. 2002-ci ildə həmin ölkədə Çarlz Universitetinin I tibb fakültəsinə qəbul olunub. Dördüncü kursda oxuyarkən alman dili kursuna gedib.

Təhsilini başa vurandan sonra yenidən Berlindəki Alman Ürək Mərkəzinə gedərək namizədlik dissertasiyası müdafiə etmək üçün “Transplantasiyadan sonra trikuspit qapağın çatışmazlığının risk faktorları” mövzusunda elmi iş götürüb. 2013-cü ilədək professor Roland Hetzerin rəhbərliyi altında işləyib. Sonra professor onu Kotbus şəhərində özünün rəhbərlik etdiyi klinikaya göndərib və artıq beş ildir ki, azərbaycanlı ürək cərrahı həmin şəfa ocağında çalışır.

“Bu illər ərzində professor Hetzerlə birlikdə 4 minə yaxın müxtəlif ürək əməliyyatlarında, təxminən 50-yədək ürək transplantasiyasında iştirak etmişəm. Sərbəst şəkildə isə 400-dən artıq ürək əməliyyatları aparmışam”, - deyə gənc cərrah söhbət açır. Yaşlılarda ürək cərrahiyyəsində ən çox aorta-koronar damarın şuntlaması əməliyyatı aparılır və statistikaya görə, həmin əməliyyatlardan sonra ölüm faizi 1 faizdən də aşağıdır. Ondan sonra ən çox ürək qapağı əməliyyatları aparilir. Ağır ürək çatışmazlığı olan xəstələrdə süni ürək implantasiyası və ürək transplantasiyası edilə bilər. Elmi araşdırmalar göstərir ki, uğurlu transplantasiya əməliyyatından sonra orta hesabla 15 il və daha artıq ömür sürmək mümkündür.

Tibb üzrə fəlsəfə doktoru Vüsal Hacıyev 2016-cı ildən Avropa Ürək Cərrahları Assosiasiyasının üzvüdür. O, vaxtaşırı müxtəlif ölkələrdə keçirilən elmi konqres və seminarlara dəvət alıb. 2016-cı ildə o, Vaşinqtonda ürək cərrahlarının konqresində məruzə ilə çıxış edib. Ötən ay Bakıda keçirilən “Bakı Ürək günləri” konqresində “Trikuspit qapaq çatışmazlığının qarşısının alınması” və “Ürək çatışmazlığının mürəkkəb müalicəsi” mövzularında məruzə ilə çıxış edib. Bu ilin oktyabrında isə İtaliyanın Milan şəhərində keçiriləcək konfransa dəvət alıb.

Gənc kardiocərrah Bakıda ziyalı ailəsində anadan olub. Atası Vahid Əməkdar Mühəndisdir, anası Sitarə paytaxtın 46 nömrəli məktəbində informatika müəllimi işləyir. Ziyalı ailəsində doğulub boya-başa çatan Vüsal ata-anası üçün sevinc mənbəyi, uzaq Almaniyanın Kotbus şəhərində yerləşən klinikada neçə-neçə xəstə üçün ümid çırağı, bizim üçün qürur yeridir. Onun əllərindən şəfa gözləyən xəstələri yenidən həyata qaytaranda isə özünü dünyanın xoşbəxti hesab edir...

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.