Respublikanın daxili işlər və prokurorluq orqanları tərəfindən ölkədə kriminogen duruma nəzarət olunması, asayişin mühafizəsi, baş vermiş ağır və xüsusilə ağır, ictimai rezonans doğurmuş cinayətlərin açılması, cinayət törədərək istintaqdan yayınanların tapılıb-tutulması, silah-sursatın və narkotiklərin qanunsuz dövriyyəsinin qarşısının alınması məqsədi ilə zəruri əməliyyat-axtarış və istintaq tədbirləri uğurla davam etdirilir.

2002-ci il yanvarın 28-dən 29-na kecən gecə silahlı cinayətkar qrupun metronun “28 May” stansiyası yaxınlığındakı valyutadəyişmə məntəqələrindən birinə basqın edəcəyi barədə Nərimanov Rayon Polis İdarəsinə daxil olmuş əməliyyat məlumatı əsasında keçirilmiş təxirəsalınmaz tədbirlər nəticəsində Bakı şəhər sakinləri, əvvəllər məhkum olunmuş Yusif Qasımov, Natiq Ələkbərov və Rüfət Bağırov saxlanılmışlar.

Cinayətkar qrupun üzvlərindən “Makarov”, “Kolt”, “Baykal” və “Brauninq” tipli 4 tapança, 32 ədəd patron, 1beşbarmaq, 5 maska, 6 patron darağı, 0,06 qram heroin və 2 milliqram heroin məhlulu götürülmüşdür.

Bu cinayətkar qrupun ətrafında aparılmış əməliyyat-istintaq tədbirləri ilə müəyyən edilmişdir ki, onlar hələ ötən il mayın 26-na keçən gecə Nərimanov rayonu ərazisində vətəndaş Əzim Heybətovun idarə etdiyi avtomaşını saxlamış, sürücünü tapança ilə hədələyərək avtomaşını ələ keçirmişlər. Bundan sonra yüksək sürətlə idarə etdikləri həmin avtomaşınla “Samsunq” mağazasının yaxınlığında vətəndaş Oqtay Əliyevi vurub ağır xəsarət yetirmiş, Təbriz küçəsində dayanmış “Jiquli” markalı avtomaşını əzmişlər. Hadisə yerinin yaxınlığında olan Nərimanov rayon Vergilər Müfəttişliyində xidmət aparan polis nəfəri Əliəşrəf Əhmədov və şəhər sakini Namiq Musayev onları zərərsizləşdirməyə cəhd göstərərkən cinayətkarlar tapançadan atəş açaraq hər ikisini yaralamış, avtomaşını qoyub qaçmışlar.

Cinayətkar əməllərini davam etdirən silahlı qrup 3 gün sonra – mayın 29-da, saat 16.50-də Birləşmiş Universal Səhmdar Bankın 2 nömrəli Nərimanov rayon filialına gələrək, əməkdaşları silahla hədələmiş, burada yerləşən valyutadəyişmə məntəqəsinin xəzinədarı Aydın Rzayevin 640 min manat pulunu almışdır.

Quldurlar növbəti cinayətlərini avqustun 17-də Binəqədi rayonu ərazisində törətmişlər. Belə ki, saat 18.45-də “Teksun” firmasının yaxınlığında tapançadan atəş açaraq, İran İslam Respublikasının vətəndaşı Şükihipur Əlirza Xosrov oğlunun idarə etdiyi həmin firmaya məxsus “Jiquli” markalı avtomaşının təkərlərini deşmiş, avtomaşında olan Binyamin Əliyevə hədə-qorxu gələrək, 13 milyon manat pulunu əlindən almışlar.

Oktyabrın 12-də isə həmin cinayətkar dəstə, Bakı şəhər avtovağzalında, Quba rayonunun valyutadəyişmə məntəqələrindən birində işləyən Tərlan Xudaverdiyevə silahlı basqın edərək, 30 min ABŞ dollarını ələ keçirmişlər.

Dekabrın 5-də onlar şəhər avtovağzalı yaxınlığında yeni quldur cinayəti törətmişlər. Quba rayon sakini Bəşir Kazımovun idarə etdiyi “RAF” markalı mikroavtobusu saxlatmış, sürücünü odlu silahla hədələyərək, 5 milyon manat pulunu alıb hadisə yerindən qaçmışlar.

Quldur dəstənin üzvlərinin dekabrın 8-də daha bir ağır cinayət törətdikləri müəyyən edilmişdir. Həmin gün saat 13.30-da onlar BUSbankın Səbail rayonundakı 2 nömrəli valyutadəyişmə məntəqəsinə gələrək, xəzinədar Zahid Zərbəliyevi tapança ilə hədələyib 5 milyon manat pulunu almışlar. Bu zaman hadisə yerinə gəlmiş 21-ci Polis bölməsinin sahə müvəkkili, polis kapitanı Hikmət Quliyevi və vətəndaş Hikmət Əzimovu odlu silahla yaralayaraq aradan çıxmağa müvəffəq olmuşlar.

Silahlı dəstənin digər cinayət əməllərinin aşkarlanması üçün zəruri istintaq-əməliyyat tədbirləri davam etdirilir.

Bu il yanvarın 23-də Nəsimi Rayon Polis İdarəsi əməkdaşlarının, əməliyyat məlumatı əsasında həyata keçirdikləri tədbirlər nəticəsində Maştağa qəsəbəsinin sakini, əvvəllər məhkum olunmuş Əminağa Əliyev yaxalanmışdır. Ondan 1 ədəd “TT” markalı tapança, 24 ədəd patron, 1 qumbara, 2 bıçaq və 0,11 qram heroin götürülmüşdür.

Əminağa Əliyevin ətrafında aparılmış əməliyyat-istintaq tədbirləri zamanı müəyyən edilmişdir ki, o, hələ ötən il aprel ayının 13-də bir neçə şəxslə birlikdə Bakıxanov qəsəbəsindəki “Fidan” restoranının yaxınlığında “Xəyal” Ticarət Mərkəzinin işçisi Cavanşir Babayevə silahlı basqın edərək, 29 milyon manat pulunu almışdır. Bu hadisədən 3 gün sonra isə Əminağa Əliyev daha 2 nəfərlə birlikdə maska və hərbi geyimdə “Xəyal” Ticarət Mərkəzinə gəlib satıcı Elman Novruzovu ölümlə hədələmiş, 35 milyon manat pulu götürərək hadisə yerindən qaçmışdır.

Bu dəstənin törətdiyi başqa cinayətlərin də aşkarlanması və azadlıqda qalan üzvlərinin tutulması istiqamətində tədbirlər davam etdirilir.

Cari ilin əvvəllərindən başlayaraq, respublikanın ayrı-ayrı bölgələrində baş vermiş bir sıra qətllərin də üstü açılmışdır. Yanvarın 10-da Bakı şəhər sakinləri Ceyran Qocəliyeva və Mələknisə Səfərova yaşadıqları Mirzağa Əliyev küçəsindəki 95 nömrəli mənzildə başları kəsilməklə qətlə yetirilmişlər. Həyata keçirilmiş istintaq-əməliyyat tədbirləri ilə müəyən edilmişdir ki, ağır cinayət hadisəsini ər-arvad Elşad və Rübabə Qurbanovlar törətmişlər. İstintaq araşdırmaları ilə məlum olmuşdur ki, bu şəxslər qonşularına məxsus əmlakı talamaq, varidatı ələ keçirmək məqsədi ilə onları amansızlıqla öldürmüş, qızıl-zinət əşyalarını aparmışlar.

Yanvarın 3-də saat 24.00 radələrində Gəncə şəhərinin Fikrət Əmirov küçəsində sahibsiz “Jiquli” markalı avtomobil aşkar edilmiş, “Üçbulaq” adlanan ərazidə isə maşının sahibi Hilal Bəşirovun odlu silahla qətlə yetirilmiş meyidi tapılmışdır.

İstintaq-əməliyyat tədbirləri nəticəsində həmin cinayətin Zaur və Tofiq Rəhimov qardaşları tərəfindən tamah məqsədi ilə törədildiyi tam sübuta yetirilmiş, onlar cinayət məsuliyyətinə cəlb edilərək həbs olunmuşlar. Həmin şəxslərdən cinayətinin aləti olan “Makarov” tipli tapança, mərhumun gödəkçəsi və qol saatı, həmçinin onun avtomaşınından çıxarılmış maqnitofon götürülmüşdür.

Daha bir neçə uğurlu əməliyyat-axtarış tədbirləri Daxili İşlər Nazirliyi Mütəşəkkil Cinayətkarlıqla Mübarizə İdarəsinin əməkdaşları tərəfindən həyata keçirilmişdir. Cinayətkar aləmdə nüfuz sahibi olan, dəfələrlə məhkum edilmiş Sabirabad rayon sakini Hikmət Muxtarov yaxalanmış və ondan satış məqsədi ilə gəzdirdiyi 13 qrama yaxın heroin götürülmüşdür.

Yanvarın 10-da isə həmin idarə əməkdaşlarının keçirdikləri növbəti tədbir zamanı Sumqayıt şəhər sakini Hüseynxan Əsgərov, Bakı şəhər sakinləri, əvvəllər məhkum olunmuş Eldar Ələsgərov, Güloğlan Mürsəlov və Teymur Abbasov 675 ədəd saxta yüzlük ABŞ dollarını satarkən tutulmuşlar.

Respublikanın daxili işlər və prokurorluq orqanları əvvəllər cinayət törədərək istintaqdan qaçıb gizlənənlərin axtarışı istiqamətində aparılan tədbirləri də davam etdirirlər. Nəticədə barələrində həbs qəti-imkan tədbiri seçilərək axtarışı elan olunmuş şəxslərdən təkcə bu ilin yanvar ayında 275 nəfəri tutulmuşdur. Onlardan biri dövləti cinayət törətdiyinə, 6 nəfəri qəsdən adam öldürdüyünə, 4-ü quldurluğa, 5-i isə soyğunçuluğa görə axtarışda idi.

Qeyd edilməlidir ki, Zaqatala-Balakən bölgəsində baş vermiş məlum hadisələrdə cinayətkar dəstənin rəhbərlərindən olan Abdulhəmid Bulayev də Azərbaycan və Rusiya daxili işlər orqanları əməkdaşlarının birgə tədbirləri nəticəsində Rusiya Federasiyasının ərazisində yaxalanmışdır.

Potensial təhlükə mənbəyi, tamah-zorakı yönümlü cinayətlərin əsas aləti olan qanunsuz saxlanılan silah-sursatın yığılması işi də respublika daxili işlər və prokurorluq orqanlarının diqqət mərkəzində olmuşdur.

Təkcə yanvar ayında qanunsuz saxlanılan 41 avtomat, 38 tapança, 155 müxtəlif növ tüfəng, 84 qumbara, 3 qumbaraatan, 1 pulemyot, 1 minaatan və 20 minə yaxın patron götürülmüşdür.

Göstərilən müddət ərzində narkotik vasitələrin və psixotrop maddələrin qanunsuz dövriyyəsinə qarşı da fəal mübarizə aparılmışdır. Bu qəbildən 186 fakt aşkar edilmiş, 5 kiloqramdan çox narkotik vasitə və digər güclü təsiredici maddələr, o cümlədən 4 kiloqramdan artıq marixuana, 622 qram tiryək, 300 qrama yaxın heroin götürülmüşdür.

Daxili İşlər Nazirliyi və Respublika Prokurorluğu vətəndaşlarımızı əmin edir ki, Azərbaycan Respublikasının Prezidenti cənab Heydər Əliyevin rəhbərliyi ilə ölkədə əmin-amanlığın qorunub saxlanılması, qanunçuluğun və hüquq qaydalarının möhkəmləndirilməsi, cinayətkarlıqla mübarizənin gücləndirilməsi, vətəndaşların konstitusiya hüquqlarının hərtərəfli təmin olunması sahəsində görülən işlər bundan sonra qətiyyətlə davam etdiriləcəkdir.