SİYASƏT
Deputat: Vətən müharibəsində təmin etdiyimiz Qələbə dünyanın Azərbaycana qarşı baxışlarını dəyişdi
Bakı, 28 sentyabr, AZƏRTAC
Son 200 illik tarixdə ermənilər azərbaycanlıları yaşadıqları torpaqlardan sıxışdırıb çıxarmış və özlərinə dövlət yaradaraq ərazilərinin genişləndirilməsinə nail olmuşlar. Ermənilər əsasən havadarların dəstəyi ilə Azərbaycan torpaqlarının müəyyən hissəsinin ələ keçirilməsinə, həm də zaman-zaman soyqırımlar törətməklə azərbaycanlıların öz ata yurdlarından məcburi şəkildə köçürülməsinə nail ola bilmişlər. Son yeni tariximizdə Qərbi Azərbaycanda yaşayan 300 min soydaşımız illər ərzində qurduğu ata yurdlarını qoyaraq Azərbaycana qaçmağa məcbur edilib. Ermənistan Azərbaycan ərazilərinin 20 faizini işğal etməklə bir milyon vətəndaşımızın ölkə daxilində qaçqın həyatı yaşamasına nail ola bilmişdi.
Bunu AZƏRTAC-a açıqlamasında Milli Məclisin deputatı Azər Badamov söyləyib.
O bildirib ki, Xocalı, Başlıbel, Ağdaban və Bağanis-Ayrım soyqırımları ermənilərin iç üzünü açıb göstərən tariximizin qanlı səhifələri kimi yaddaşlarımıza həkk olunub. Azərbaycan 30 ildə torpaqlarının işğaldan azad olunması və məcburi köçkünlərin öz yurdlarına qaytarılması ilə bağlı beynəlxalq hüququn bərqərar olunması üçün səbir nümayiş etdirdi. BMT Təhlükəsizlik Şurasının qətnamələrinin icra olunması üçün beynəlxalq kürsülərdən dünya ictimaiyyəti Ermənistana təzyiq göstərilməsi ilə bağlı çağırışlar etdi. Hətta Azərbaycan xalqının işğalla heç vaxt barışmayacağını və əgər danışıqlar yolu ilə torpaqlarımızda erməni işğalına son qoyulmazsa, hərb yolu ilə öz gücümüzlə bunu edəcəyimizi dəfələrlə bəyan etdik.
“Təəssüflər olsun ki, beynəlxalq ictimaiyyət ancaq qətnamələr qəbul etməklə kifayətləndi və münaqişənin dinc yolla həlli üçün BMT-dən mandat almış ATƏT-in Minsk qrupu torpaqlarımızda erməni işğalının əbədiləşdirilməsinə çalışdı. Dövlətimizin başçısı prezident seçildiyi ilk gündən ordu quruculuğuna xüsusi diqqət göstərdi. Bu, Silahlı Qüvvələrimizin inkişafında və güclənməsində yeni səhifə açdı. 2016-cı il Aprel döyüşləri, 2018-ci il Günnüt əməliyyatı və 2020-ci ilin Tovuz təxribatlarının qarşısı alınanda müzəffər Ordumuz düşmənə öz gücümüzü qismən nümayiş etdirmişdi və bu, Ermənistan üçün bir mesaj idi. Təəssüf ki, Ermənistan rəhbərliyi mesajlarımızdan nəticə çıxarmadı və 2020-ci il sentyabrın 27-də yenidən genişmiqyaslı təxribata əl atdı. Hətta Ermənistanın məqsədi yeni ərazilər uğrunda yeni müharibə şüarı ilə Azərbaycanla müharibə aparmaq və yeni ərazilərimizi işğal etmək idi. Ali Baş Komandanın çağırışına yekdilliklə qoşulan xalqımız Ordumuzla həmrəylik nümayiş etdirərək “Dəmir yumruğ”a çevrildi”, - deyə deputat qeyd edib.
Onun sözlərinə görə, ermənilərin 30 illik işğal dövründə qurduqları müdafiə sədlərini yüksək pəşəkarlıqla aşan Ordumuz 44 gündə torpaqlarımızın erməni işğalına son qoydu və noyabrın 10-da imzalanmış üçtərəfli Bəyanatla Ermənistanın məğlubiyyəti təsdiq olundu. Azərbaycan son 200 illik tarixində ilk dəfə olaraq öz torpaqlarını döyüş meydanında işğaldan azad etdi. Təbii ki, 44 günlük Vətən müharibəsində qazandığımız Qələbə qəhrəmanlıq səhifəmizdir. Bu Qələbə xalqımıza böyük qürur yaşatdı və bütün dünyada Azərbaycan üçün qalib ölkə imicini formalaşdırdı. Vətən müharibəsində təmin etdiyimiz Qələbə dünyanın Azərbaycana qarşı baxışlarını dəyişdi. Müzəffər Ordumuzun şücaəti və göstərdiyi peşəkar döyüş strategiyası dünyanın inkişaf etmiş ölkələrinin öz ordularına yenidən baxılmasını aktuallaşdırdı və təcrübəmizi hərbi kadrların hazırlanmasında tədrisə daxil etdilər. Beləliklə, bu qüruru bizə yaşadan xalqımızın vətənpərvər igid oğulları oldu. Təəssüf ki, Vətən müharibəsində biz də 2907 nəfər şəhid verdik, 7 nəfər itkin düşdü və mindən çox əsgər yaralandı. Prezident İlham Əliyev bütün şəhid ailələri və qazilərə xüsusi diqqətlə yanaşır. Bu kateqoriyadan olan insanlar dövlət qayğısı ilə əhatə olunub.
“Vətən müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq Prezident İlham Əliyev 27 sentyabrın Vətən müharibəsinin başladığı günün Azərbaycanda Anım Günü kimi qeyd olunması ilə bağlı 2020-ci il dekabrın 2-də Sərəncam imzalayıb. Prezident İlham Əliyevin bu addımı şəhidlərə, onların doğmalarına ali ehtiramın göstəricisidir. Hər il sentyabrın 27-də xalqımız ümumxalq mərasimlərinə qatılmaqla şəhidlərimizə hörmət və ehtiramını bildirərək xatirəsini bir daha yad edəcək. Allah bütün şəhidlərimizə rəhmət eləsin, qazilərimizi isə öz sağlamlıqlarına qovuşdursun”, - deyə Azər Badamov diqqətə çatdırıb.