CƏMİYYƏT


Dövlət Miqrasiya Xidmətində “Miqrasiya Məktəbi-2” layihəsi fəaliyyətə başlayıb

Bakı, 7 dekabr, AZƏRTAC 

Dövlət Miqrasiya Xidməti (DMX) tərəfindən oktyabrda “Miqrasiya Məktəbi-2”yə qəbulla bağlı elan edilən müsabiqənin nəticələrinə əsasən uğur qazanmış 16 gənc Xidmətin inzibati binasına dəvət olunub.

DMX-dən AZƏRTAC-a bildiriblər ki, ilk dərs günündə layihə iştirakçıları ilə görüşən qurumun rəisi Vüsal Hüseynov təşkil olunan kursun gənclərin miqrasiya sahəsində yeni bilik və təcrübə qazanmalarına töhfə verəcəyini deyib. Bildirib ki, ölkənin inkişafı, həmçinin təhlükəsizliyi baxımından miqrasiya proseslərinin tənzimlənməsi mühüm əhəmiyyət kəsb edir və bu sahədə savadlı, peşəkar mütəxəssislərin hazırlanmasına xüsusi önəm verilir.

Məhz DMX tərəfindən həyata keçirilən Miqrasiya Məktəbi, İnformasiya Texnologiyaları Məktəbi, eləcə də Miqrasiya Könüllüsü layihələri gənclərə miqrasiya sahəsində yeni biliklər və təcrübə əldə etmək imkanı yaradır. Tədris proqramı çərçivəsində miqrasiya sahəsində peşəkar biliklərə yiyələnmək, müasir miqrasiya trendləri barədə məlumat almaq, xidmətin müvafiq struktur bölmələrində təcrübə keçmək imkanı yaradılacağını deyən Vüsal Hüseynov iştirakçılara uğurlar arzulayıb.

Sonra “Miqrasiya Məktəbi-2” layihəsi barədə təqdimat olub.

Xatırladaq ki, altı ay davam edəcək tədris proqramının əsas məqsədi gələcəkdə müxtəlif sahələr üzrə fəaliyyət göstərəcək gənclərin miqrasiya ilə bağlı biliklərini artırmaq, onlarda bu sahəyə maraq oyatmaq, peşəkar vərdişlər aşılamaq və dövlət idarəçiliyinə dair məlumatlandırmaqdır. Tədris prosesində gənclər üçün həm praktik məşğələlər, həm də xidmətin müvafiq struktur bölmələrində təcrübə keçmək imkanı yaradılacaq.

Təlimlər DMX-nin müvafiq sahələr üzrə ixtisaslaşmış əməkdaşları, Miqrasiya Məktəbinin layihə üzrə tərəfdaşlarının nümayəndələri, yerli və beynəlxalq ekspertlər, beynəlxalq və qeyri-hökumət təşkilatlarının nümayəndələri tərəfindən tədris ediləcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.