İQTİSADİYYAT


Dövlət Mülki Aviasiya Agentliyinin nümayəndə heyəti ICAO-nun simpoziumuna qatılıb

Bakı, 1 iyul, AZƏRTAC

Beynəlxalq Mülki Aviasiya Təşkilatı (ICAO) Türkiyənin İstanbul şəhərində “Mülki aviasiya sahəsində geniş miqyaslı dəstək (GISS 2022)” mövzusunda simpozium keçirib.

Rəqəmsal İnkişaf və Nəqliyyat Nazirliyindən AZƏRTAC-a bildirilib ki, Dövlət Mülki Aviasiya Agentliyinin (DMAA) direktoru Arif Məmmədovun rəhbərlik etdiyi nümayəndə heyəti tədbirdə iştirak edib.

Mülki aviasiya sahəsində əməkdaşlığın qlobal səviyyədə, xüsusən də təhsil istiqaməti üzrə genişləndirilməsi məqsədilə təşkil olunmuş simpoziuma 140 ölkədən aviasiya sənayesinin 800-dən çox təmsilçisi qatılıb. Üç gün davam edən tədbir çərçivəsində 9 sessiya təşkil edilib və 60-dan çox iştirakçının çıxışı dinlənilib.

İyunun 29-da ICAO-nun baş katibi Xuan Karlos Salazar ilə DMAA-nın direktoru Arif Məmmədov arasında görüş keçirilib. X.K. Salazarı baş katib vəzifəsinə təyin olunması münasibətilə təbrik edən A. Məmmədov iyunun 1–8-də keçirilmiş ICAO auditinə hazırlıq məqsədilə Təşkilatın Parisdəki Avropa və Şimali Atlantika Bürosu vasitəsilə göstərilmiş texniki dəstəyə görə təşəkkürünü bildirib.

Görüşdə iştirak edən Nikolas Rallonu ICAO-nun Parisdəki Regional Bürosunun direktoru vəzifəsinə təyin olunması münasibətilə təbrik edən A. Məmmədov Azərbaycan mülki aviasiyasının audit zamanı yüksək nəticə əldə etməsində bu qurumun DMAA-ya verdiyi texniki konsultasiyaların əhəmiyyətini xüsusilə vurğulayıb. Keçirilmiş auditin nəticələri üzrə ilkin hesabata görə Azərbaycan tərəfindən ICAO standartlarının implementasiyasının effektivlik göstəricisi 63 faizdən 80 faizədək yüksəlib.

Görüşdə iyulun 3–6-da N.Rallonun Bakıda səfərdə olacağı qeyd olunub.

A.Məmmədov Azərbaycan Respublikasının uçuşların təhlükəsizliyinin təmin olunması ilə bağlı ICAO siyasətinə sadiq qaldığını, əməkdaşlığın möhkəmləndirilməsində maraqlı olduğunu vurğulayıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.