Bakı, 19 oktyabr (AZƏRTAC). Azərbaycan Respublikası Dini Qurumlarla İş üzrə Dövlət Komitəsinin (DQİDK) nəşri olan “Dövlət və din” ictimai fikir toplusunun sentyabr-oktyabr nömrəsi çapdan çıxmışdır.

DQİDK-dən AZƏRTAC-a bildirmişlər ki, dövlət başçısı İlham Əliyevin Ramazan bayramı münasibətilə Azərbaycan xalqına təbriki ilə açılan “Rəsmi guşə”də Prezidentin müqəddəs Ramazan ayı münasibətilə müsəlman ölkələrinin Azərbaycandakı səfirlərini və diplomatik nümayəndəliklərinin rəhbərlərini, fəaliyyət müddətinin başa çatması ilə əlaqədar Vatikanın ölkəmizdəki nunsisini qəbul etməsi, Qafqaz Müsəlmanları İdarəsinin təşkil etdiyi iftar mərasimi, dövlət başçısının həmin mərasimdə iştirakı və çıxışı, Şamaxı Cümə məscidində aparılan bərpa və yenidənqurma işləri ilə tanışlığı öz əksini tapmışdır.

Jurnalın bu nömrəsində Qafqaz Müsəlmanları İdarəsinin sədri Şeyxülislam Allahşükür Paşazadənin də Ramazan bayramı münasibətilə təbriki dərc olunmuşdur.

“Azərbaycan gerçəkliyi” rubrikasında oxucular Aydın Əlizadənin “Modernizm, postmodernizm və müasir Azərbaycan” və Elşad Həsənlinin “Müasir Azərbaycan cəmiyyətində milli və dini tolerantlıq millətlərarası münasibətlər kontekstində” məqalələri ilə tanış ola bilərlər.

Toplunun ənənəvi “Cəmiyyət və din” rubrikasında Radif Mustafayevin “Sekulyarlaşma prosesi və müsəlman aləmində Qərb sekulyarizmi”, Məhəmmədəmin Rəhimin “Məzhəblərarası yaxınlaşma prosesində prioritet məsələlər”, Ülkər Məmmədovanın “Şihabəddin Sührəvərdinin traktatlarında dini rəvayətlər” məqalələri yer almışdır.

“İslam həqiqətləri” guşəsinə daxil edilmiş Müşfiq Şükürovun “Quran mətnlərində aşkarlanan dialoq fəlsəfəsi”, Vasif Sadıqlının “Zikr və zikr mərasimləri” məqalələri mövzu baxımından diqqəti cəlb edir.

İctimai fikir toplusunun maraqlı rubrikalarından olan “Tarixə pəncərə” bölməsində dərc olunmuş Ruhəngiz Kərimlinin “Səfəvilər dövlətində Azərbaycan-türk etnosunun yeri” və İbrahim Kazımbəylinin “Abbasabad qalası” məqalələri oxucular tərəfindən böyük maraqla qarşılana bilər.

Jurnalın “Abidələr” guşəsində yer almış Fəxrəddin Səfərlinin “Ordubad şəhər Came məscidinin kitabələri”, Teymur Babayev və Vaqif Əsədovun “Ataçay nekropolunun daş qutu qəbirlərindən tapılmış bəzək əşyaları” adlı məqalələri diqqəti cəlb edir.

Nəriman Qasımoğlunun “Azərbaycanda müsəlman dindarlığının problemləri: tarixi və müasir reallıqlar” və Musa Quluzadənin “Ruhani nüfuzu” məqalələri jurnalın “Publisistika” rubrikası altında verilmiş və günün aktual məsələlərinə həsr olunmuşdur.

Toplunun yeni rubrikalarından olan “Etüd” başlığı altında isə Rəfail Əliyevin “İmadəddin Nəsiminin “Bəhrül-əsrar” (“Sirlər dəryası”) qəsidəsində mənəvi kamilliyə çağırış”, Sənan İbrahimovun “Xilafət dövründə ədəbiyyat” və Cəhanbəxş Kəyaninin “Əttar Nişapurinin əsərlərində inanc və etiqad məsələlərinə dair” məqalələri ilə tanış ola bilərlər.

Jurnalın növbəti yeni rubrikası isə “Kitab öncəsi” adlanır. Redaksiya bu rubrikanın ilki olaraq məşhur “Məhəmməd. İlk mənbələr əsasında onun həyatı” adlı monoqrafiyanın ana dilimizə tərcüməsini dərc etmişdir.