SİYASƏT


Dünya birliyi münaqişələrin həlli üçün konkret addımlar atmalıdır

Bakı, 27 avqust (AZƏRTAC). Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov avqustun 27-də İraqın ölkəmizdəki səfiri Heydər Şiyə Qubeyşi Əl-Barrak ilə görüşüb.

Komitədən AZƏRTAC-a bildiriblər ki, görüşdə son dövrlərdə İraqda cərəyan edən proseslərdən, bunun nəticəsində qaçqın və məcburi köçkün probleminin yaranmasından söhbət açılıb. Baş nazirin müavini Əli Həsənov Azərbaycan hökumətinin İraqda gedən proseslərdən narahatlığını ifadə edib. Əli Həsənov vurğulayıb ki, dünyada baş verən bu cür münaqişələr nəticəsində milyonlarla günahsız insan əziyyət çəkir, qaçqın və məcburi köçkünlərin sayı getdikcə artır. Lakin çox təəssüf ki, dünya buna göz yumur, milyonlarla günahsız insanın həlak olmasına, qaçqın və məcburi köçkün vəziyyətinə düşməsinə biganəlik göstərir. Bunların bariz nümunəsi kimi İraqda baş verənləri, Ermənistan-Azərbaycan, Dağlıq Qarabağ münaqişəsini, bunların nəticəsində yaranmış qaçqın və məcburi köçkün problemini diqqətə çatdıran Əli Həsənov qeyd edib ki, dünya birliyi, nüfuzlu beynəlxalq qurumlar münaqişələrin həlli üçün konkret addımlar atmaq əvəzinə təəssüf ki, öz missiyalarını yalnız nəticəsiz bəyanatlar verməklə, kağız üzərində qətnamələr qəbul etməklə yerinə yetirir, bu da onlara bəslənilən inam və etimadı gündən-günə azaldır.

BMT Təhlükəsizlik Şurasının Ermənistanın işğalçı qoşunlarının Azərbaycan ərazisindən çıxarılmasını tələb edən 4 qətnaməsinin 20 ildən çoxdur ki kağız üzərində qalmasını, ATƏT-in Minsk qrupunun həmsədrlərinin münaqişənin həllində heç bir konkret nəticə əldə edə bilməməsini, 1 milyon 200 min vətəndaşımızın hələ də qaçqın və məcburi köçkün vəziyyətində yaşamasını bu inamsızlığın nəticəsi kimi dəyərləndirən Baş nazirin müavini bütün bunların arxasında siyasi güclərin iqtisadi maraqlarının dayandığını da istisna etməyib.

Cərəyan edən hadisələr nəticəsində İraqın da qaçqın problemi ilə üzləşdiyi, yüz minlərlə iraqlının evlərini tərk etmək məcburiyyətində qaldığı bildirilib. Vurğulanıb ki, BMT-nin Qaçqınlar üzrə Ali Komissarlığı tərəfindən bu il iyunun 20-də verilmiş bəyanatda da iraqlı qaçqınların ümumi sayının 1 milyon 400 min nəfərə çatdığı və bu göstəriciyə görə İraqın dünyada ikinci yerdə qərarlaşdığı qeyd edilib.

Diplomat hər iki dost ölkənin bu cür ağır problemlərlə üzləşməsindən təəssüfləndiyini bildirib.

Görüşdə bu cür ədalətsizliklərin aradan qaldırılacağına əminlik ifadə edilib.

Səfir İraqı Azərbaycan üçün ərəb dünyasının, Azərbaycanı isə İraq üçün Cənubi Qafqazın qapısı adlandırıb.

Görüşdə qarşılıqlı maraq doğuran digər məsələlər də müzakirə olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.