İmişli, 11 noyabr, Aydın Yavərzadə, AZƏRTAC

Vətən müharibəsi şəhidi Şaiq Teymurovun ad günündə xatirəsi anılıb. Şəhidin məzarı ziyarət olunub, həmçinin şəhidlərin xatirəsinə inşa edilən abidə önündə anım mərasimi keçirilib.

AZƏRTAC-ın bölgə müxbiri xəbər verir ki, şəhid Şaiq Teymurovun anım günündə ailəsi ilə bərabər, rayon icra hakimiyyətinin və hüquq-mühafizə orqanlarının əməkdaşları, məktəblilər kənd ictimaiyyəti iştirak edib. Öncə şəhidin məzarı üzərinə gül dəstələri düzülüb, ruhuna dualar oxunub.

Sonra Aranlı kəndinin Vətən uğrunda canını fəda edən şəhidlərinin xatirəsinə inşa olunan abidə-kompleksin önündə anım mərasimi keçirilib. Çıxış edənlər Ali Baş Komandan İlham Əliyevin rəhbərliyi altında müzəffər Azərbaycan Ordusunun 44 gün ərzində qazandığı parlaq Qələbədən söhbət açıblar. Bildirilib ki, döyüşlər zamanı qəhrəmancasına vuruşaraq canlarını fəda edən şəhidlər öz qanları ilə tarix yazdılar və onlar daim qəlblərdə yaşayacaqlar.

Daha sonra məktəblilər Vətənə, qəhrəmanlara həsr olunan şeirlər səsləndiriblər. Şaiqin ölümündən sonra təltif edildiyi “Cəsur döyüşçü” medalı atasına təqdim olunub.

Bildirilib ki, Şaiq 1992-ci il noyabrın 6-da İmişlinin Aranlı kəndində dünyaya göz açıb. Hələ azyaşlı ikən həmyaşıdlarından seçilən Şaiq vətənpərvərliyi ilə fərqlənib.

Şəhidin atası Vidadi Teymurov deyir ki, Şaiq idmançı idi. Əlbəyaxa döyüş növləri üzrə nailiyyətləri var idi. Həqiqi hərbi xidməti bitirdikdən sonra ordu sıralarında qalmaq istəyirdi. Çünki onun idealı Mübariz İbrahimov idi. O, ordu sıralarına qoşulmaq üçün müraciət etdi. Nəhayət öz arzusuna çatdı və bir kəşfiyyatçı olaraq Vətənin keşiyində dayandı. Onun döyüş yolu Füzuli istiqamətində olub. Öz qrupu ilə birlikdə düşmənin səngərinə daxil olaraq 31 ermənini məhv edib, postu ələ keçirib. Daha sonra ermənilərin yerləşdiyi ərazidə minaatan batareyanı məhv etmək üçün tapşırığı yerinə yetirərkən şəhid olub.

Şəhid anası Elmira Teymurova öz övladı haqqında fəxrlə danışır. “O, hər zaman Vətən sevgisi ilə yaşayırdı və torpaqlarımızın işğaldan azad edilməsi ən böyük arzusu idi. Çoxlu arzuları olsa da, ən böyük sevgisi Vətən sevgisi idi. “Hətta torpaqlarımız işğaldan azad olsun, o yerlərdə toy-büsat edəcəyəm” söyləyirdi”, - deyə anası bildirib.

Qeyd edək ki, Şaiq Teymurov sentyabrın 29-da Füzuli istiqamətində şəhidlik zirvəsinə ucalıb. “Vətən uğrunda”, “Füzulinin azad olunmasına görə”, “Cəsur döyüşçü” medalları ilə təltif edilib.