ELM VƏ TƏHSİL


Elmi sessiya: “Cəfər Cabbarlının sənət idealları və müasir dövr”

Bakı, 25 aprel, AZƏRTAC

Aprelin 25-də Azərbaycan Milli Elmlər Akademiyasının (AMEA) Humanitar Elmlər Bölməsi “Cəfər Cabbarlının sənət idealları və müasir dövr” mövzusunda elmi sessiya təşkil edib.

AZƏRTAC xəbər verir ki, tədbiri açan AMEA-nın vitse-prezidenti, akademik İsa Həbibbəyli elmi sessiyanın Prezident İlham Əliyevin “Cəfər Cabbarlının 120 illiyinin qeyd edilməsi haqqında” 2018-ci il 17 dekabr tarixli Sərəncamına əsasən təşkil olunduğunu qeyd edib. Sərəncam çərçivəsində respublikanın müxtəlif elmi-tədqiqat və təhsil müəssisələrində, eləcə də AMEA-da silsilə tədbirlər keçirildiyini deyən akademik sözügedən sənədin Cəfər Cabbarlı irsinə yeni yanaşmalara, eləcə də onun itmiş əsərlərinin üzə çıxmasına təkan verdiyini söyləyib. O, Ədəbiyyat İnstitutunun əməkdaşı, filologiya üzrə elmlər doktoru, professor Asif Rüstəmli tərəfindən ədibin “Kazım bəy” romanının, indiyədək dərc edilməyən məktublarının tapıldığını və tezliklə çap olunacağını diqqətə çatdırıb.

Akademik vurğulayıb ki, görkəmli ədib milli ədəbiyyatın parlaq ənənələrini qorumaqla yanaşı, ədəbi-mədəni, ictimai mühitdə yenilik və müasirlik uğrunda mübarizəni yaradıcılığının əsas qayəsinə çevirib. Onun zəngin bədii irsi müasirliyini, aktuallığını həmişə saxlayır.

Cəfər Cabbarlının teatr və kino sənətlərinin inkişafındakı müstəsna xidmətlərindən danışan akademik deyib ki, dramaturgiyamızın təşəkkülü və yüksəlişi tarixində yeni mərhələnin təməlini qoyan ədibin əsərləri milli teatrda mühüm hadisə kimi dəyərləndirilib. O, XX əsr Azərbaycan dramaturgiyasını yeni mərhələyə qaldırıb, sentimental, realist, romantik ədəbi cərəyanların ən mükəmməl nümunələrini yaradıb. Yazıçının “Oqtay Eloğlu”, “Almaz”, “Sevil” və digər pyeslərindəki vətənpərvərlik ruhu, qadın azadlığı ideyaları bu gün də cəmiyyət üçün aktualdır. Ədib yeni obrazlar və süjetlərlə ədəbiyyatımızı zənginləşdirib.

AMEA-nın vitse-prezidenti qeyd edib ki, Cəfər Cabbarlı öz əsərləri ilə yanaşı, digər dramaturqların əsərlərinə də səhnə həyatı verib. Onun rejissorluq etdiyi tamaşalar uzun illər tamaşaçıların bir neçə nəslinin estetik zövqünün formalaşmasında əvəzsiz rol oynayıb.

Humanitar Elmlər Bölməsinin akademik-katibi Teymur Kərimli Cəfər Cabbarlının çoxşaxəli yaradıcılığından danışıb. Ədibin yaradıcılığının əsas qayəsini yenilik, müasirlik uğrunda mübarizə təşkil etdiyini, onun şəxsiyyət azadlığı, humanizm, milli azadlıq və istiqlal ideallarının carçısı olduğunu söyləyib. Qeyd edib ki, Cəfər Cabbarlı lirik şeirlərində romantik, satirik şeirlərində Mirzə Ələkbər Sabir, Molla Nəsrəddin ədəbi məktəblərinin nümayəndəsi kimi çıxış edib.

Elmi sessiyada, həmçinin filologiya elmləri doktoru, professor Şirindil Alışanlının “Cəfər Cabbarlının sənəti zamanın sınağında”, sənətşünaslıq üzrə fəlsəfə doktoru, dosent Vidadi Qafarlının “Azərbaycan teatrında Cəfər Cabbarlı fenomeni”, filologiya üzrə fəlsəfə doktoru, dosent Ağaverdi Xəlilovun “Cəfər Cabbarlının yaradıcılığında dövrün sosial-mədəni refleksləri” və filologiya üzrə fəlsəfə doktoru Aytən Quliyevanın “Cəfər Cabbarlının arxivində ədəbi məktublar” mövzusunda məruzələri dinlənilib.

Sessiya çərçivəsində ədibin əsərlərindən ibarət sərgi də təşkil olunub.

Sonda “Zülmətdən doğan işıq” sənədli filmi nümayiş olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.