SİYASƏT
Ermənistan ordusunun mülki vətəndaşlarımızı qətlə yetirməsi barədə həqiqətlər Almaniya ictimaiyyətinin diqqətinə çatdırılıb
Bakı, 18 oktyabr, AZƏRTAC
Milli Məclisin Sədr müavini Adil Əliyevin mülki Azərbaycan əhalisinin Ermənistan silahlı qüvvələri tərəfindən qətlə yetirilməsi barədə məqaləsi Almaniya mətbuatında işıq üzü görüb.
Parlamentin Mətbuat və ictimaiyyətlə əlaqələr şöbəsindən AZƏRTAC-a bildiriblər ki, Adil Əliyev Ermənistanın xüsusilə axşam saatlarında mülki əhalinin yaşadıqları evləri hədəfə almasını, cəbhə xətti ilə heç bir əlaqəsi olmayan və cəbhə xəttindən azı 60 kilometr uzaqda yerləşən Gəncə şəhərinin Ermənistan tərəfindən vurulmasını, nəticədə mülki şəxslərin ölməsini və ağır yaralanmasını diqqətə çatdırıb. Habelə Gəncə şəhərinə qarşı hücumla yanaşı, Mingəçevir şəhərində baş vermiş hücuma da diqqət çəkən Adil Əliyev Ermənistanın regionda təcavüzkar siyasət həyata keçirməsini, sülhə qarşı ən böyük maneə olmasını qeyd edib. Ermənistan tərəfinin hazırkı hakimiyyətinin əsas hədəfinin ölkəmizdə yaşayan, döyüş əməliyyatlarında iştirak etməyən və cəbhə xəttindən bəzən yüzlərlə kilometr uzaqda yerləşən mülki əhalinin öldürülməsinin bütün növ beynəlxalq hüquq normalarının pozulması faktı olmasını bir daha Almaniya ictimaiyyətinin diqqətinə çatdırıb.
Habelə, məqalədə Ermənistanın mülki Azərbaycan əhalisinə qarşı həyata keçirdiyi müharibə cinayətlərinin hazırkı deyil, uzun müddətdir davam edən təcavüzkar siyasətinin davamı olmasını bildirib və daha əvvəllər də mülki əhalinin Ermənistan tərəfindən öldürülməsinə diqqət çəkib.
Milli Məclisin Sədr müavini 1949-cu il tarixli Cenevrə Konvensiyası da daxil olmaqla bütün növ humanitar hüququn prinsiplərinin Ermənistan tərəfindən pozulmasını qeyd edərək, Ermənistanın Birləşmiş Millətlər Təşkilatının 4 qətnaməsinin heç birini bu vaxta qədər icra etmədiyini bildirib. O, beynəlxalq ictimaiyyətin Ermənistan tərəfindən aparılan təcavüzkar siyasətlə bağlı ədalətli qərar qəbul etməsinin zəruriliyini vurğulayıb.