SİYASƏT


“Euractive” platforması “Qafqaz: Ermənistanın “yeni ərazilər üçün yeni müharibəsi” sərlövhəli məqalə yayıb

Brüssel, 29 iyul, AZƏRTAC

İyulun 12-dən etibarən işğalçı erməni qüvvələri tərəfindən Azərbaycan-Ermənistan sərhədinin Tovuz istiqamətində törədilmiş hərbi təxribatlar və bununla bağlı xarici ölkələrdəki azərbaycanlı icmanın üzvləri tərəfindən keçirilən aksiyalar zamanı dinc nümayişçilərə qarşı radikal erməni qüvvələri tərəfindən törədilən vandalizmlər fonunda Ermənistanın məkrli simasının beynəlxalq arenada bir daha ifşa edilib. Xüsusilə Brüsseldə – Avropanın siyasi paytaxtında məhz Avropa İttifaqı müstəvisində Azərbaycanın haqq sözünün dünya ictimaiyyətinə çatdırılması istiqamətində mühüm nəticələr əldə olunub. Belə ki, son günlər “Euractive”, “EU Reporter”, “Diplomat Magazine”, Avropa İttifaqının siyasəti üzrə ixtisaslaşmış və geniş oxucu kütləsinə malik digər bu kimi multimedia platformalarında Ermənistanın son hərbi təxribatları barədə silsilə yazılar dərc edilib. Məhz bu məqalələr ölkəmizin maraqlarının və ədalətli mövqeyinin dünya birliyinə düzgün və vaxtında çatdırılması üçün etibarlı mexanizm kimi nəzərdən keçirilməlidir. Hesab edirik ki, müvafiq istiqamətdə davamlı fəaliyyət Aİ də daxil olmaqla bütün çoxtərəfli əməkdaşlıq platformlarında Azərbaycanın işğal olunmuş Dağlıq Qarabağ bölgəsinin və ətraf ərazilərinin azad edilməsi istiqamətində aparılan danışıqlarda siyasi qərarvericilərə təsirsiz ötüşməyəcək.

AZƏRTAC xəbər verir ki, bu kontekstdə “Euractive” müstəqil media şəbəkəsində yayımlanmış “Qafqaz: Ermənistanın “yeni ərazilər üçün yeni müharibəsi” sərlövhəli məqalədə Ermənistanın işğalçı siyasəti açıq-aydın ifşa edilir.

Məqalənin müəllifi, Təkmil İdarəçilik Beynəlxalq Fondunun təsisçisi və direktoru Ceyms Uilson hazırda dünyanın ən aktual problemi fonunda Ermənistanın eqoist siyasətini təhlil etməklə onun mənfur niyyətini ortaya qoyur. Bildirir ki, Avropa və bütün dünya koronavirusla mübarizə aparmaq və pandemiyadan təsiri ilə zəifləmiş iqtisadiyyatını dirçəltmək üçün yollar axtararkən, iyulun 12-də Ermənistan Azərbaycanla sərhəddə təxribat törətdi. Müəllif əminliklə bəyan edir ki, istənilən rasional təhlilə əsasən, sərhəddə baş verən son atışmalarda yalnız Ermənistan amili var idi.

Dağlıq Qarabağdan 300 kilometr şimalda - iki ölkənin sərhədində gedən döyüşlərin 20 nəfərədək hərbi və mülki şəxsin həyatını itirməsi ilə nəticələndiyini bildirən müəllif Aİ-nin tərəflərə ünvanladığı çağırışları xatırladır.

Ceyms Uilson tərəflər arasında münaqişənin əsas səbəbinin beynəlxalq səviyyədə Azərbaycanın tərkib hissəsi kimi tanınan, lakin hazırda Ermənistanın işğalı altında olan Dağlıq Qarabağın olduğunu xatırladır. Qeyd edir ki, Azərbaycan torpaqlarının Ermənistan tərəfindən işğal edilməsi faktı dünya ictimaiyyəti tərəfindən yekdilliklə qəbul olunub.

Müəllif yazıda Ermənistanın üçüncü tərəflərin hərbi və siyasi dəstəyinə acizanə ehtiyacı olduğunu bildirir. Qeyd edir ki, Rusiyanın rəhbərlik etdiyi Kollektiv Təhlükəsizlik Müqaviləsi Təşkilatına (KTMT) güvənən Ermənistan Moskvanın və KTMT-nin Dağlıq Qarabağ məsələsində Ermənistana hərbi dəstək verməməsindən təəccüblənir.

Məqalədə, həmçinin koronavirus pandemiyasının Ermənistanı siyasi, sosial, iqtisadi təsirləri təhlil olunur. Bildirilir ki, hələ ilin əvvəlində - mart ayında ölkədə fövqəladə vəziyyət elan edilib və bunun nəticəsində iqtisadi fəaliyyət iflasa uğrayıb, işsizlik artıb, səhiyyə sistemi böhranla üzləşib.

Ermənistanın siyasi idarəçiliyindəki problemlərə toxunan Ceyms Uilson bildirir ki, baş nazir Nikol Paşinyan böhranın idarə edilməsində səmərəsiz fəaliyyətinə və pandemiya ilə mübarizədə uğursuzluğuna görə müxalifət tərəfindən sərt tənqid olunur. Diqqətə çatdırılır ki, diqqəti pandemiyanın idarə edilməsindəki uğursuzluqdan yayındırmaq üçün Paşinyanın Azərbaycanla sərhəddə təxribata ehtiyacı var idi. Bu dəfə təxribatlar əvvəlcədən hazırlanmışdı. İyulun 10-da Ermənistanın yenilənmiş milli təhlükəsizlik strategiyası vasitəsilə Rusiya ilə ittifaqına və KTMT-yə üzvlüyünə diqqət çəkildi. Başqa sözlə, atışmadan bir neçə gün əvvəl Kremlə kollektiv təhlükəsizliyə dair xatırlatma göndərildi. Hərbi baxımdan Azərbaycanın şimal-qərb bölgələri erməni hərbçilər üçün asan qənimət kimi görünə bilərdi. Ermənistan Azərbaycan ərazisinə irəliləməyi və yeni ərazilər işğal etməyə ümid edirdi. Bu yeni taktika həm də Ermənistanın müdafiə naziri David Tonoyanın “Yeni ərazilər uğrunda yeni müharibə” strateji doktrinasına uyğun gəlir.

Bu regionun döyüş meydanı kimi seçilməsinin digər səbəbinin yaxınlıqdan keçən əsas enerji infrastrukturları olduğunu bildirən Ceyms Uilson deyib: “Son onilliklərdə Azərbaycan tərəfindən təşəbbüsü və birbaşa iştirakı ilə inşa edilmiş Bakı-Tbilisi-Ceyhan neft, Bakı-Tbilisi-Ərzurum qaz kəmərləri, Bakı-Tbilisi-Qars dəmir yolu Avropa ilə Asiya arasında vacib enerji və nəqliyyat dəhlizləridir. Azərbaycan və Türkiyə ilə münasibətdə düşmənçilik siyasəti sayəsində bu cür vacib layihələrdən kənar qalmış Ermənistan iqtisadi və siyasi təzyiq göstərmək üçün bu infrastrukturları hədəf almaqla təhdid edir”.

Müəllif hesab edir ki, Ermənistanın tərəfindən başladılan sərhədyanı toqquşmalar genişmiqyaslı müharibəyə, gələcəkdə isə böyük geosiyasi qarşıdurmaya çevrilə bilər.

Sonda müəllif bildirir ki, Avropa İttifaqı Qafqazda dayanıqlı sülhə nail olmaq üçün bölgə ilə bağlı diplomatiyasını gücləndirməli, Paşinyanın regionu heç kimin xeyrinə olmayacaq müharibəyə sürükləyən təxribatçı hərəkətlərdən çəkindirmək istiqamətində fəal səylər göstərməlidir.

Pərvanə Qarayeva

AZƏRTAC-ın xüsusi müxbiri

Brüssel

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.