CƏMİYYƏT
FHN: Vətən uğrunda canlarını fəda etmiş şəhidlərimiz heç zaman unudulmayacaq
Bakı, 27 sentyabr, AZƏRTAC
Sentyabrın 27-də Prezident, Müzəffər Ali Baş Komandan İlham Əliyevin rəhbərliyi ilə Azərbaycan tarixinin ən şanlı səhifələri qızıl hərflərlə yazılır. Çoxəsrlik dövlətçilik tariximizin şərəf və mübarizlik rəmzinə çevrilən İkinci Qarabağ müharibəsində Ermənistan üzərində qazanılmış parlaq Qələbə 2020-ci ilin hüdudlarına sığmayacaq bir tarixi hadisəyə çevrilib. Rəşadətli Azərbaycan Ordusu şəhidlərimizin qisasını döyüş meydanında alaraq düşmənin işğal altında saxladığı əzəli torpaqlarımızı azad etdi, ölkəmizin ərazi bütövlüyünü bərpa etdi.
AZƏRTAC xəbər verir ki, bu barədə Fövqəladə Hallar Nazirliyinin 27 sentyabr Anım Günü ilə bağlı yaydığı məlumatda deyilir.
Məlumatda bildirilib ki, müqəddəs vəzifənin öhdəsindən şərəflə gələn, Vətən uğrunda canlarını fəda etmiş şəhidlərimizin əziz xatirəsi daim uca tutulur, ruhlarına böyük ehtiram göstərilir. Azərbaycan xalqı Vətənin mübariz və qəhrəman övladları ilə fəxr edir. Xalqımız heç zaman öz qəhrəmanlarını unutmayacaq.