İDMAN


Formula 1 Azərbaycan Qran-Prisinin birinci günündə pilotlar arasında gərgin idman mübarizəsi yaşanıb

Bakı, 26 aprel, AZƏRTAC

Aprelin 26-da Bakıda Formula 1 üzrə dünya çempionatının dördüncü mərhələsinə – SOCAR Azərbaycan Qran-Prisinə start verilib.

AZƏRTAC xəbər verir ki, yarışın birinci günündə pilotlar 6 kilometr uzunluğundakı Bakı şəhər halqasında sərbəst yürüşdə güclərini sınayıblar.

Birinci sərbəst yürüş “Williams” komandasının pilotu Corc Rassellin bolidinin drenaj lükünə ilişərək sıradan çıxması ilə əlaqədar ləğv edilib. İkinci sərbəst yürüşdə isə “Ferrari” komandasının pilotları fərqləniblər. Belə ki, Çarls Lekler birinci, Sebastian Fettel isə ikinci olublar. İlk üçlüyü beşqat dünya çempionu Luis Hamilton (“Mercedes”) tamamlayıb.

İkinci sərbəst yürüşdə isə “Racing Point”dən Lens Stroll, “Toro Rosso”dan isə Daniil Kvyat qəza səbəbindən mübarizəni dayandırıblar.

Formula 1 SOCAR Azərbaycan Qran-Prisi çərçivəsində təşkil olunan Formula 2 yarışlarında sərbəst yürüş və sıralanma turu keçirilib.

Qırx beş dəqiqə davam edən sərbəst yürüş nəticəsində “UNI Virtuosi” komandasının pilotu Luka Qiotto bütün rəqiblərini üstələyərək birinci olub. “Carlin” komandasından Nobuhari Matsuşita sərbəst yürüşü ikinci, “MP Motorsport”un sürücüsü Cordan Kinq isə üçüncü yerdə başa vurublar.

“Carlin” komandasının pilotu N.Matsuşita Formula 2 yarışında sıralama turunun qalibi olub. “ART Grand Prix” komandasının sürücüsü Nik de Vries ikinci, “UNI-Virtuosi”nin pilotu L.Qiotti isə üçüncü yeri tutublar.

Aprelin 27-də Formula 1 SOCAR Azərbaycan Qran-Prisində üçüncü sərbəst yürüş və sıralama turu, Formula 2-də isə birinci yarış keçiriləcək. Aprelin 28-də isə Formula 1 SOCAR Azərbaycan Qran-Prisi, həmçinin Formula 2-nin ikinci yarışı təşkil olunacaq.

Xatırladaq ki, Formula 1 yarışı Azərbaycanda dördüncü ildir təşkil olunur. 2016-cı ildə təşkil olunan birinci yarışda – Formula 1 Avropa Qran-Prisində “Mercedes” komandasının almaniyalı pilotu Niko Rosberq qalib gəlib. 2017-ci ildə təşkil olunan Formula 1 Azərbaycan Qran-Prisi “Red Bull Racing” komandasının avstraliyalı pilotu Daniel Rikkiardonun qələbəsi ilə başa çatıb. Ötənilki Qran-Pridə isə “Mercedes” komandasının britaniyalı sürücüsü Luis Hamilton qələbə qazanıb.

Dünyanın məşhur pilotlarının mübarizə apardıqları Bakı şəhər halqası elə qurulub ki, yarış zamanı pilotlar və milyonlarla televiziya tamaşaçıları UNESCO-nun ümumdünya mədəni irs siyahısına daxil olan İçərişəhəri, paytaxtın müasir memarlıq abidələrini və Xəzərin sahilboyu hissəsini özündə birləşdirən ecazkar mənzərəni görə bilirlər. Layihənin müəllifi bütün müasir Formula 1 treklərinin memarı olan Herman Tilkedir. Trekin ən geniş hissəsinin eni 13, ən dar hissəsinin eni isə İçərişəhər ətrafında, o cümlədən 7-ci və 8-ci döngələrdə 7,6 metr təşkil edir. Yarışın start və finiş xətti Azadlıq meydanındadır. Burada, həmçinin “Paddok klub”, komandaların boksları və pit-leyn qurulub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.